ବାଲେଶ୍ୱର ଅଫିସ, ୨୨।୨- ବିବାହ ପାଇଁ ଅରାଜି ହେବାରୁ ପ୍ରେମିକାଙ୍କ ଅଭିଯୋଗକ୍ରମେ ଜେଲ୍ ଯାଇଥିଲେ ପ୍ରେମିକ। ପରେ ବାହା ହେବାକୁ ସମ୍ମତି ଜଣାଇବାରୁ କୋର୍ଟଙ୍କ ନିର୍ଦ୍ଦେଶ ପରେ ପୋଲିସ ପ୍ରେମିକଙ୍କୁ ଜେଲ୍ରୁ ବିବାହ ମଣ୍ଡପକୁ ଆଣିଥିଲା। ସୋମବାର ମନ୍ଦିରରେ ହାତଗଣ୍ଠି ପଡିବା ପରେ ପୁଣି ଜେଲକୁ ଫେରିଯାଇଛନ୍ତି ଯୁବକ। ଜାମିନ ପାଇଁ ପ୍ରେମିକ ଆବେଦନ କରିଥିବାରୁ କୋର୍ଟ ଏହି ବିବାହ ପାଇଁ ନିର୍ଦ୍ଦେଶ ଦେଇଥିଲେ ବୋଲି ବାଲେଶ୍ୱର ଶିଳ୍ପାଞ୍ଚଳ ଥାନା ଆଇଆଇସି ମିନତୀ ବିଶ୍ୱାଳ ପ୍ରକାଶ କରିଛନ୍ତି। ଏଭଳି ଘଟଣା ଘଟିଛି ବାଲେଶ୍ୱର ଜିଲା ବସ୍ତା ଥାନା ରୂପ୍ସା ଅଞ୍ଚଳରେ।
କେନ୍ଦ୍ରାପଡ଼ା ଜିଲା ରାଜକନିକା ଅଞ୍ଚଳ ମତାପଡ଼ା ଗ୍ରାମର ଦେବୀ ପ୍ରସାଦ ମିଶ୍ର ୨୦୧୯ରେ ଏକ ବ୍ୟାଟେରୀ କମ୍ପାନୀରେ ଏରିଆ ମ୍ୟାନେଜର ଭାବେ କାର୍ଯ୍ୟ କରୁଥିବା ବେଳେ ସେଠାରେ କାମ କରୁଥିବା ଜଣେ ସଂଖ୍ୟାଲଘୁ ସମ୍ପ୍ରଦାୟର ଯୁବତୀଙ୍କ ମଧ୍ୟରେ ଗଢ଼ି ଉଠିଥିବା ପ୍ରେମ ସମ୍ପର୍କ। ଏହି ଘଟଣା ଦେବୀପ୍ରସାଦଙ୍କ ପରିବାର ଲୋକେ ଜାଣିବା ପରେ ବିରୋଧ କରିଥିଲେ। ଦେବୀପ୍ରସାଦ ଯୁବତୀଙ୍କଠାରୁ ଦୂରେଇ ଯିବାକୁ ଚେଷ୍ଟା କରୁଥିବା ବେଳେ ଯୁବତୀ ଜଣକ ତାଙ୍କ ଗ୍ରାମରେ ପହଞ୍ଚତ୍ ପରିବାର ଲୋକଙ୍କୁ ବୁଝାଇଥିଲେ। ହେଲେ ପରିବାର ଲୋକେ ଅରାଜି ହେବାରୁ ଯୁବତୀ ଜଣକ ୨୦୨୦ ସେପ୍ଟେମ୍ବର ୨୦ରେ ଶିଳ୍ପାଞ୍ଚଳ ଥାନାରେ ଦେଇଥିଲେ ଲିଖିତ ଅଭିଯୋଗ । ପୋଲିସ ମାମଲା (ନଂ. ୧୯/୨୦) ରୁଜୁ କରି ଦେବୀପ୍ରସାଦଙ୍କୁ ଗିରଫ କରି କୋର୍ଟଚାଲାଣ କରିଥିଲା। କୋର୍ଟରେ ଜାମିନ ନାମଞ୍ଜୁର ହେବାରୁ ଯୁବକଙ୍କୁ ଜେଲ୍ ପଠାଇ ଦିଆଯାଇଥିଲା। ପରେ ଯୁବକଜଣକ ବିବାହ ଲାଗି ସହମତି ପ୍ରକାଶ କରିବାରୁ ଆଇନଜୀବୀ ଜାମିନ ପାଇଁ ଆବେଦନ କରିଥିଲେ। କୋର୍ଟ ଜାମିନକୁ ସ୍ଥଗିତ ରଖି ପ୍ରଥମେ ପୋଲିସ ମାଧ୍ୟମରେ ବିବାହ କାର୍ଯ୍ୟ ସମ୍ପନ୍ନ ପାଇଁ ନିର୍ଦ୍ଦେଶ ଦେଇଥିଲେ। ଯୁବତୀଜଣକ ଧର୍ମ ପରିବର୍ତ୍ତନ କରିବା ପରେ ନିର୍ଦ୍ଦେଶ ଅନୁଯାୟୀ ପୋଲିସ ଯୁବକଙ୍କୁ ଜେଲରୁ ମନ୍ଦିରରେ ସଜାଯାଇଥିବା ବିବାହ ମଣ୍ଡପକୁ ଆଣିଥିଲା।
