ମୁମ୍ବାଇ, ୧୨ା୫: ବିହାର ମୁଖ୍ୟମନ୍ତ୍ରୀ ନୀତୀଶ କୁମାର ଗୁରୁବାର ମୁମ୍ବାଇରେ ଜାତୀୟତାବାଦୀ କଂଗ୍ରେସ ପାର୍ଟି (ଏନ୍ସିପି) ଅଧ୍ୟକ୍ଷ ଶରଦ ପାଓ୍ବାରଙ୍କୁ ଭେଟିଛନ୍ତି। ଜାତୀୟ ସ୍ବାର୍ଥ ଦୃଷ୍ଟିରୁ ବିରୋଧୀ ଦଳଗୁଡ଼ିକ ଏକାଠି କାର୍ଯ୍ୟ କରିବାର ଆବଶ୍ୟକତା ଉପରେ ଉଭୟ ନେତା ଜୋର୍ ଦେଇଥିଲେ। ନୀତୀଶଙ୍କ ସହ ଏକ ମିଳିତ ଖବରଦାତା ସମ୍ମିଳନୀକୁ ସମ୍ବୋଧିତ କରି ପାଓ୍ବାର କହିଛନ୍ତି, ଦେଶର ସାମ୍ପ୍ରତିକ ସ୍ଥିତିକୁ ନଜରରେ ରଖି ଗଣତନ୍ତ୍ରର ସୁରକ୍ଷା ପାଇଁ ଏକାଠି କାର୍ଯ୍ୟ କରିବା ଗୁରୁତ୍ୱପୂର୍ଣ୍ଣ। ଯଦି ଆମେ ଏକତ୍ର କାର୍ଯ୍ୟ କରିବା ତେବେ ଦେଶ ଚାହୁଁଥିବା ବିକଳ୍ପ ପାଇଁ ସମର୍ଥନ ମିଳିବ ବୋଲି ଏନ୍ସିପି ଅଧ୍ୟକ୍ଷ କହିଛନ୍ତି। ବୁଧବାର କର୍ନାଟକ ବିଧାନସଭା ନିର୍ବାଚନ ଶେଷ ହୋଇଛି। ତାଙ୍କ ପାଖରେ ଥିବା ସୂଚନା ଅନୁଯାୟୀ କର୍ନାଟକ ଜନସାଧାରଣ ଭାଜପାକୁ କ୍ଷମତାରୁ ବାଦ୍ ଦେଇ ଏକ ଧର୍ମନିରପେକ୍ଷ ସରକାର ନିର୍ବାଚନ କରିଛନ୍ତି ବୋଲି ପାଓ୍ବାର କହିଥିଲେ। ଖବରଦାତା ସମ୍ମିଳନୀରେ ନୀତୀଶ ଭାଜପାକୁ ଜୋର୍ଦାର ସମାଲୋଚନା କରିଥିଲେ। ଭାଜପା ଦେଶର ସ୍ବାର୍ଥ ପାଇଁ କାର୍ଯ୍ୟ କରୁନାହିଁ। ଯେତେ ସଂଖ୍ୟାରେ ଅଧିକ ବିରୋଧୀ ଦଳ ଏକାଠି ହେବେ ଦେଶର ସ୍ବାର୍ଥ ପାଇଁ ସେତେ ଭଲ ହେବ। ଏନେଇ ବିଭିନ୍ନ ଦଳ ସହ କଥାବାର୍ତ୍ତା ଚାଲିଛି। ଆମେ ଏକାଠି ବସି ନିଷ୍ପତ୍ତି ନେବା ବୋଲି ନୀତୀଶ କହିଥିଲେ। ଶରଦ ପାଓ୍ବାର ବିରୋଧୀ ମେଣ୍ଟର ମୁଖ୍ୟ ଚେହେରା ହେବେ କି ବୋଲି ପ୍ରଶ୍ନ ହେବାରୁ ଏହାଠାରୁ ଅଧିକ ଖୁସି କଥା କିଛି ନାହିଁ ବୋଲି ବିହାର ମୁଖ୍ୟମନ୍ତ୍ରୀ କହିଥିଲେ। ପାଓ୍ବାର କେବଳ ନିଜ ଦଳ ପାଇଁ କାମ ନ କରି ସମଗ୍ର ଦେଶ ପାଇଁ କିଛି କରିବା ଆବଶ୍ୟକ ବୋଲି ନୀତୀଶ ଖବରଦାତା ସମ୍ମିଳନୀକୁ ସୂଚନା ଦେଇଛନ୍ତି। ଏହି ଆଲୋଚନା ବେଳେ ନୀତୀଶଙ୍କ ସହ ବିହାର ଉପମୁଖ୍ୟମନ୍ତ୍ରୀ ତଥା ଆର୍ଜେଡି ନେତା ତେଜସ୍ବୀ ଯାଦବ ଉପସ୍ଥିତ ଥିଲେ। ସେମାନେ ମାତୋଶ୍ରୀରେ ମହାରାଷ୍ଟ୍ରର ପୂର୍ବତନ ମୁଖ୍ୟମନ୍ତ୍ରୀ ଉଦ୍ଧବ ଠାକ୍ରେଙ୍କୁ ଭେଟିଥିଲେ।
