ଭଞ୍ଜନଗର,୬ା୫(ବାବୁଲା ପ୍ରଧାନ): ଗଞ୍ଜାମ ଜିଲା ଭଞ୍ଜନଗର କବି ସମ୍ରାଟ ଉପେନ୍ଦ୍ର ଭଞ୍ଜ ମହାବିଦ୍ୟାଳୟ ଇଲୋକ୍ଟ୍ରୋନିକ୍ସ ବିଭାଗ ପକ୍ଷରୁ ବୁଧବାର ଏକ ପାଠଚକ୍ର ଅନୁଷ୍ଠିତ ହୋଇଥିଲା। ଏଥିସହ ଯୁକ୍ତ ୨ ଧନ୍ଦାମୂଳକ ଶିକ୍ଷାନୁଷ୍ଠାନ ପକ୍ଷରୁ ଅବସରପ୍ରାପ୍ତ ଅଧକ୍ଷ ରାଜେନ୍ଦ୍ର କୁମାର ଦାସଙ୍କୁ ବିଦାୟ ସମ୍ବର୍ଦ୍ଧନା ଦିଆଯାଇଥିଲା। ଆୟୋଜିତ ସଭାରେ କଲେଜ ଅଧ୍ୟକ୍ଷ ବିଭାସ କୁମାର ଦାସ ଅଧ୍ୟକ୍ଷତା କରି ପାଠଚକ୍ର ଦ୍ୱାରା ଛାତ୍ରୀଛାତ୍ରଙ୍କ ଜ୍ଞାନ ବୃଦ୍ଧିରେ ସହାୟ ହେଉଛି ବୋଲି କହିଥିଲେ। ଅବସରପ୍ରାପ୍ତ ଅଧ୍ୟକ୍ଷ ରାଜେନ୍ଦ୍ର କୁମାର ଦାସ ମୁଖ୍ୟ ଅତିଥି ଭାବେ ଯୋଗଦେଇ ଇଲୋକ୍ଟ୍ରୋନିକ୍ସ ବିଭାଗ ଛାତ୍ରୀଛାତ୍ରଙ୍କ ପାଇଁ ବର୍ତ୍ତମାନର ଯୁଗରେ ବ୍ୟାପକ ନିଯୁକ୍ତି ସୁଯୋଗ ଅଛି ବୋଲି କହିଥିଲେ। ଏ ଆଇ ଯୁଗରେ ଲୋକଙ୍କ ଆବଶ୍ୟକତା କମିଯାଇଛି। ଆଗକୁ ୬-ଜି ମୋବାଇଲ ସେବା ଆସିବାକୁ ଯାଉଛି। ଏନେଇ ଗବେଷଣା ଚାଲିଛି। ୬-ଜି ସେବା ଆସିଲେ ଶିକ୍ଷା, ସ୍ବାସ୍ଥ୍ୟକ୍ଷେତ୍ରରେ ବ୍ୟାପକ ପରିବର୍ତ୍ତନ ଆସିବ। ଏଲନ ମାସ୍କ ଅସମ୍ଭବ ଜ୍ଞାନ କୌଶଳକୁ ସମ୍ଭବ କରୁଛନ୍ତି। ପୁରାଣ ଯୁଗରେ ଯାହା ଥିଲା ତାହାକୁ ଅମେରିକା, ଚାଇନା ଗବେଷଣା କରି ଆଗକୁ ବଢ଼ୁଛନ୍ତି। ଆମେରିକା, ରୁଷିଆ, ଚାଇନାଠୁ ଆମେ ପଛରେ ପଡ଼ିଯାଇଛେ। ଆମେ ଭାବୁନାହାନ୍ତି। ଚେଷ୍ଟା କରୁ ନାହାନ୍ତି। ବ୍ୟବହାର କରିବା ହିଁ ଆମର ଅଭ୍ୟାସ ହୋଇଯାଇଛି। ପଢ଼ିବା, ମାର୍କ ଆଣିବା ମଧ୍ୟ ଆମର ଅଭ୍ୟାସ। ଏଥିରୁ ବାହାରି ଆଗକୁ ବଢ଼ି ଅଧିକ ଶିଖିବା, ଗବେଷଣା କରିବା ଉପରେ ଦୃଷ୍ଟି ଦେବାକୁ ପଡ଼ିବ ବୋଲି ରାଜେନ୍ଦ୍ର ଦାସ କହିଥିଲେ। ଛାତ୍ର ସତ୍ୟବ୍ରତ ପାଢ଼ୀ ୬-ଜି ଉପରେ ଲିଖିତ ସନ୍ଦର୍ଭଟିକୁ ପଠନ କରିଥିଲେ। ତାଙ୍କୁ ବିଭାଗୀୟ ମୁଖ୍ୟ ଅଧ୍ୟାପକ ବୁଧିନାଥ ବେହେରା ଓ ଅଧ୍ୟାପକ ସତ୍ୟ ନାରାୟଣ ସାହୁ ସହଯୋଗ କରିଥିଲେ।
ପ୍ରାଧ୍ୟାପକ ପ୍ରଶାନ୍ତ କୁମାର ରଥ, ଡ. ରବୀନ୍ଦ୍ର କୁମାର ମିଶ୍ର, ଯୁକ୍ତ ୨ ଧନ୍ଦାମୂଳକ ଶିକ୍ଷାନୁଷ୍ଠାନର ଅଧ୍ୟାପକ ଆର ହରିଶ, ସନାତନ ବେହେରା, ସୁନୀଲ ବ୍ରହ୍ମା ପ୍ରମୁଖ ସମ୍ମାନିତ ଅତିଥି ଭାବେ ଯୋଗ ଦେଇଥିଲେ। କିରାଣି ତପନ ବେହେରା, କର୍ମଚାରୀ ରଶ୍ମିତା ନାଇକ ପ୍ରମୁଖ କାର୍ଯ୍ୟକ୍ରମକୁ ପରିଚାଳନା କରିବାରେ ସହଯୋଗ କରିଥିଲେ।
