ନରେଶ ଚନ୍ଦ୍ର ପଟ୍ଟନାୟକ
କେନ୍ଦୁଝର,୧ା୪: ଗ୍ରୀଷ୍ମଋତୁରେ ଫଳୁଥିବା ଚାର (ଚାହାର) କୋଳି ଖାଇବାକୁ ଯେପରି ସ୍ବାଦିଷ୍ଟ, ସ୍ବାସ୍ଥ୍ୟପକ୍ଷେ ମଧ୍ୟ ସେପରି ହିତକର। ଏହାଛଡ଼ା ଏହା ମିଠା, କେକ୍ ଆଦିରେ ବ୍ୟବହାର ହେଉଥିବାରୁ ଚାରକୋଳିର ଚାହିଦା ବଜାରରେ ବଢ଼ିବାରେ ଲାଗିଛି। ମଞ୍ଜି କେଜିକୁ ୧ ହଜାରରୁ ଅଧିକ ଟଙ୍କାରେ ବିକ୍ରି ହେଉଥିବାରୁ ଏହା କେନ୍ଦୁଝର ଜିଲାର ଅନେକ ବନବାସୀଙ୍କ ଗୁଜୁରାଣ ମେଣ୍ଟାଇବାରେ ସହାୟକ ହୋଇପାରୁଛି।
କେନ୍ଦୁଝର ଜିଲାର ତେଲକୋଇ, ବାଂଶପାଳ, ହରିଚନ୍ଦନପୁର, ଘଟଗଁା, ପାଟଣା, ଚମ୍ପୁଆ, ଯୋଡ଼ା ଆଦି ବ୍ଲକ୍ ଅଞ୍ଚଳର ଜଙ୍ଗଲରେ ଚାରଗଛ ବହୁ ପରିମାଣରେ ରହିଛି। ବନବାସୀମାନେ ବହୁ କଷ୍ଟରେ ଜଙ୍ଗଲରୁ ଏହାର କୋଳି ସଂଗ୍ରହକରି ପ୍ରାୟ ୬୦ କି.ମି. ଦୂର କେନ୍ଦୁଝର ସହରକୁ ଆଣି ରାସ୍ତାପାର୍ଶ୍ୱରେ ବସି ବିକ୍ରି କରିଥାଆନ୍ତି। କୋଳିର ଚାହିଦା ଜିଲା ଓ ରାଜ୍ୟ ବାହାରେ ଅଧିକ ଥିବାରୁ ବେପାରୀମାନେ କମ୍ ମୂଲ୍ୟରେ କିଣିନେଇ ବାହାରକୁ ପଠାଇ ଅଧିକ ଲାଭବାନ୍ ହେଉଛନ୍ତି। ବିଶେଷକରି ଏହାର ମଞ୍ଜିକୁ ଫଟାଇ ଭିତରେ ଥିବା ସସକୁ ମଧ୍ୟ ଖାଦ୍ୟରୂପେ ବ୍ୟବହାର କରାଯାଏ। ସେଥିରୁ ବିଭିନ୍ନ ପ୍ରକାର ସୁସ୍ବାଦୁ ମିଠା ପ୍ରସ୍ତୁତ ହେବା ସହ କେକ୍ରେ ବ୍ୟବହାର ହେଉଥିବାରୁ ମଞ୍ଜିର ମୂଲ୍ୟ କିଲୋ ପିଛା ୧ ହଜାରରୁ ଅଧିକ ଟଙ୍କାରେ ବିକ୍ରି ହେଉଛି। ଆଗରୁ ଚାରକୋଳି ବହୁ ପରିମାଣରେ ମିଳୁଥିଲା। ତେବେ ଖଣିଖାଦାନ, ପୋଡୁଚାଷ, ଜଙ୍ଗଲପୋଡ଼ି, ଜଙ୍ଗଲ ଜବରଦଖଲ ଆଦି କାରଣରୁ ଗଛ ପଦା ହୋଇଗଲାଣି। ଚାର କୋଳି ସହ ଅନ୍ୟାନ୍ୟ ଫଳମୂଳ ମଧ୍ୟ ମିଳୁନାହିଁ। ବନବାସୀଙ୍କ ଜୀବିକା ଉପରେ କୁପ୍ରଭାବ ପଡୁଛି ବୋଲି ବୈଦ୍ୟ ବିଶାରଦ ହରେକୃଷ୍ଣ ମହାନ୍ତ କହିଛନ୍ତି। ପ୍ରାକୃତିକ ପରିବେଶରେ ଏବଂ ଜଙ୍ଗଲରେ ଆପେ ଆପେ ଏହା ବଢୁଥିବାରୁ ଏହାର ସୁରକ୍ଷା କରିବା ଜରୁରୀ। ଜଙ୍ଗଲର ସୁରକ୍ଷା କରିବା ସହ ମହୁଲ, ଟୋଲ, ହରିଡ଼ା, ବାହାଡ଼ା, ଅଁଳା ଆଦି ଲଘୁ ବନଜାତ ଦ୍ରବ୍ୟ ଭଳି ଚାରକୋଳି ପାଇଁ ପ୍ରୋତ୍ସାହନ ମିଳିଲେ ବନବାସୀଙ୍କ ଅର୍ଥନୀତିରେ ସୁଧାର ଆସିପାରିବ ବୋଲି ଦାବି ହେଉଛି। ଏହାର ସୁରକ୍ଷା ପାଇଁ ବନ ବିଭାଗ ପକ୍ଷରୁ ପଦକ୍ଷେପ ଗ୍ରହଣ କରାଯାଉଛି। ମାତ୍ର ବିଭାଗ କ୍ଷୟକ୍ଷତିର ଭରଣା କରିପାରୁ ନ ଥିବାରୁ ଧୀରେ ଧୀରେ ଚାରକୋଳି ଲୋପପାଇବାକୁ ବସିଛି ବୋଲି ଅବସରପ୍ରାପ୍ତ କେନ୍ଦ୍ର ସରକାରଙ୍କ କ୍ଷେତ୍ର ପ୍ରଚାର ଅଧିକାରୀ ଅଲେଖ ଚନ୍ଦ୍ର ପାତ୍ର କହିଛନ୍ତି।
