ନୂଆଦିଲ୍ଲୀ,୩୦।୧୨: ଭାରତୀୟ ଦଳର ପୂର୍ବତନ ମୁଖ୍ୟ କୋଚ୍ ରବି ଶାସ୍ତ୍ରୀ ୨୦୧୯ ଦିନିକିଆ ବିଶ୍ୱକପ୍ ଲାଗି ଦଳ ଚୟନ ଉପରେ ଅସନ୍ତୋଷ ବ୍ୟକ୍ତ କରିଛନ୍ତି। ଦଳରେ ୩ ଉଇକେଟକିପର ବ୍ୟାଟରଙ୍କୁ ନିଆଯିବାରେ ସେ ଖୁସି ନ ଥିଲେ। ଏପରିକି ନ୍ୟୁଜିଲାଣ୍ଡ ବିପକ୍ଷ ସେମିଫାଇନାଲରେ ପୂର୍ବତନ ଅଧିନାୟକ ମହେନ୍ଦ୍ର ସିଂ ଧୋନୀ, ଦୀନେଶ କାର୍ତ୍ତିକ ଓ ରିଷଭ ପନ୍ତ ଏକତ୍ରିତ ଖେଳିଥିଲେ। ଏଣୁ ଦଳର ଚୟନ ପ୍ରକ୍ରିୟାରେ ବଡ଼ ପରିବର୍ତ୍ତନର ଆବଶ୍ୟକତା ଥିବା ଶାସ୍ତ୍ରୀ କହିଛନ୍ତି।
“ ମୋ ମତରେ ଦଳର ଚୟନ ପ୍ରକ୍ରିୟାରେ କୋଚ୍ ଓ ଅଧିନାୟକଙ୍କ ମତକୁ ଗୁରୁତ୍ୱ ଦିଆଯିବା ଉଚିତ। ମୁଖ୍ୟତଃ ଦଳୀୟ କୋଚ୍ଙ୍କ ପାଖରେ ଯଥେଷ୍ଟ ଅଭିଜ୍ଞତା ଥିଲା ବେଳେ ଏହା ଖୁବ୍ ଗୁରୁତ୍ୱପୂର୍ଣ୍ଣ। ଆଉ ଅଧିନାୟକଙ୍କ ମତକୁ ମଧ୍ୟ ଶୁଣାଯିବା କଥା” ବୋଲି ଶାସ୍ତ୍ରୀ ଷ୍ଟାର ସ୍ପୋଟର୍ସକୁ କହିଛନ୍ତି।
୨୦୧୯ ବିଶ୍ୱକପ୍ ଦଳ ଚୟନ ଉପରେ ଅସନ୍ତୋଷ ବ୍ୟକ୍ତ କରି ଶାସ୍ତ୍ରୀ କହିଛନ୍ତି, ବିଶ୍ୱକପ୍ ଦଳରେ ୩ ଉଇକେଟକିପରଙ୍କୁ ନିଆଯାଇଥିବାରୁ ମୁଁ କଦାପି ଖୁସି ନ ଥିଲି। ଅମ୍ବାତି ରାୟୁଡୁ କିମ୍ବା ଶ୍ରେୟାସ ଆୟାରଙ୍କୁ ଦଳରେ ନିଆଯାଇ ପାରିଥାନ୍ତା। ଧୋନୀ, ପନ୍ତ ଓ କାର୍ତ୍ତିକଙ୍କ ଏକାଠି ଖେଳାଇବାର ଅର୍ଥ ମୁଁ ବୁଝି ପାରୁନାହିଁ। କିନ୍ତୁ ସାଧାରଣ ଆଲୋଚନା ବେଳେ ମୋ ପ୍ରତିକ୍ରିୟା ରଖିବା ଛଡ଼ା ମୁଁ କଦାପି ଚୟନ ପ୍ରକ୍ରିୟାରେ ମୁଣ୍ଡ ଖେଳାଇ ନାହିଁ।
