କଣ୍ଟାବାଞ୍ଜି, ୨୯। ୧(ଡି.ଏନ.ଏ.): ସରକାରୀ ତହବିଲରୁ ଲକ୍ଷାଧିକ ଟଙ୍କା ଖର୍ଚ୍ଚ ହୋଇ ନିର୍ମାଣ ହୋଇଛି କୋଠା। ଉଦ୍ଘାଟନ ବି ହୋଇଛି ବିଧିବଦ୍ଧଭାବେ। ହେଲେ କୌଣସି ନା କାୌଣସି କାରଣରୁ ଏହି ସବୁ କୋଠା ବିଭାଗର କୌଣସି କାମରେ ଆସୁନାହିଁ। ପରିତ୍ୟକ୍ତ ହୋଇ ପଡ଼ିରହି ଅସାମାଜିକ ତତ୍ତ୍ୱଙ୍କ ଆଡ୍ଡାସ୍ଥଳୀ ପାଲଟିଛି। ଅଫିସ କାର୍ଯ୍ୟାଳୟ ଭଡ଼ାଘର କିମ୍ବା ପୁରୁଣା କୋଠାରେ ଚାଲିଛି। ଏହିପରି ଦୃଶ୍ୟ ଦେଖିବାକୁ ମିଳିଛି ବଲାଙ୍ଗୀର ଜିଲା କଣ୍ଟାବାଞ୍ଜିି ଅଞ୍ଚଳରେ।
କଣ୍ଟାବାଞ୍ଜିଠାରୁ ୩ କି.ମି. ଦୂର ହିଆଁଲ ଓ କଣ୍ଟାବାଞ୍ଜି ଚିଲ୍ଡ୍ରେନ ପାର୍କ ନିକଟରେ ନିର୍ମାଣ ହୋଇଛି ୩ ମହଲା ବିଶିଷ୍ଟ ହରିଜନ ଆଦିବାସୀ ହଷ୍ଟେଲ। ନିର୍ମାଣ ସରିବାର ୫ ବର୍ଷ ବିତି ଯାଇଥିଲେ ବି ତାହା କାର୍ଯ୍ୟକ୍ଷମ ନ ହୋଇ ପଡ଼ିରହିଛି। ହିଆଁଲ ଆରଆଇ ଅଫିସ, ଏଲ୍ଆଇ ସେଣ୍ଟର, ଏଏନ୍ଏମ୍ ସେଣ୍ଟର, ଡୁମେରଚୁଆଁର ଏଏନ୍ଏମ୍ ସେଣ୍ଟରର ନୂତନ କୋଠା ଦୀର୍ଘବର୍ଷ ହେଲା ନିର୍ମାଣ ହୋଇ ପଡ଼ିରହିଛି। କାମରେ ନ ଲାଗିବାରୁ କୋଠାର କେତେକ ଅଂଶ ଭାଙ୍ଗିରୁଜି ଗଲାଣି। ମଦ୍ୟପମାନେ ସେହି ସବୁ କୋଠାରେ ଆଡ୍ଡା ଜମାଇଛନ୍ତି। ସେହିପରି କଣ୍ଟାବାଞ୍ଜି-ଜାମୁଟଝୁଲ୍ଲା ରାସ୍ତାରେ ନିର୍ମିତ ସ୍କିଲ୍ ଡେଭଲପମେଣ୍ଟ ସେଣ୍ଟର ଉଦ୍ଘାଟିତ ହେବାର ୩ ବର୍ଷ ପରେ ବି କାର୍ଯ୍ୟକ୍ଷମ ହୋଇପାରିନାହିଁ। ଅନୁରୂପ ଭାବେ କଣ୍ଟାବାଞ୍ଜି ଅବକାରୀ ଥାନା କାର୍ଯ୍ୟାଳୟ ତୁରେକେଲା ରାସ୍ତାରେ ନିର୍ମାଣ ହୋଇଛି। ୨୦୧୮ ମେ ୬ ତାରିଖରେ ତତ୍କାଳୀନ ଖାଦ୍ୟ ଓ ଖାଉଟି କଲ୍ୟାଣ, ସମବାୟ ବିଭାଗ ମନ୍ତ୍ରୀ ସୂର୍ଯ୍ୟନାରାୟଣ ପାତ୍ର ଓ ବିଧାୟକ ଆୟୁବ ଖାଁଙ୍କ ଦ୍ୱାରା ଏହା ଉଦ୍ଘାଟିତ ହୋଇଥିଲେ ସୁଦ୍ଧା କାର୍ଯ୍ୟକ୍ଷମ ହୋଇନାହିଁ। ଦୀର୍ଘଦିନ ଧରି ଅବ୍ୟବହୃତ ହୋଇ ଏହା ପଡ଼ିରହିଛି। ବୁଧବାର କଣ୍ଟାବାଞ୍ଜିି ଗୋରୁ ବଜାର ହେଉଥିବାରୁ ଲାଠୋର, ତୁରେକେଲା ଅଞ୍ଚଳରୁ ହଜାର ହଜାର ସଂଖ୍ୟାରେ ଚାଲାଣ ହେଉଥିବା ଗୋରୁଙ୍କୁ ମଙ୍ଗଳବାର ରାତିରେ ଏହି ଅବକାରୀ ଥାନା ପରିସରରେ ରଖି ଦିଆଯାଇଥାଏ। ଅବକାରୀ ଥାନା କାର୍ଯ୍ୟକ୍ଷମ ନ ହୋଇ ପାରିବା ନେଇ ବିଭାଗୀୟ ସବ୍ଇନ୍ସପେକ୍ଟରଙ୍କୁ ପଚାରିବାରୁ ପାଣିର ସମସ୍ୟା ଥିବାରୁ ଅଫିସ କାମ ହୋଇପାରୁ ନ ଥିବା କହିଛନ୍ତି।
