ଜେରୁଜେଲମ୍, ୧୦ା୮: ଗାଜା କିମ୍ବା ଓ୍ବେଷ୍ଟ ବ୍ୟାଙ୍କରେ ପାଲେଷ୍ଟାଇନ୍ ରାଷ୍ଟ୍ର ଗଠନ ହୋଇପାରିବ ନାହଁି ବୋଲି ଇସ୍ରାଏଲ୍ ପ୍ରଧାନମନ୍ତ୍ରୀ ବେଞ୍ଜାମିନ ନେତାନ୍ୟାହୁ କହିବା ସହ ୧୫-ସୂତ୍ରୀ ଗାଜା ଶାନ୍ତି ଯୋଜନାକୁ ପ୍ରତ୍ୟାଖ୍ୟାନ କରିଦେଇଛନ୍ତି। ଫଳରେ ଗାଜା ଯୁଦ୍ଧ ବନ୍ଦ କରିବା ଦିଗରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ଙ୍କ ଉଦ୍ୟମକୁ ଶକ୍ତ ଧକ୍କା ଲାଗିଛି। ନେତାନ୍ୟାହୁ ପ୍ରଧାନମନ୍ତ୍ରୀ ଥିବା ପର୍ଯ୍ୟନ୍ତ ଗାଜା କିମ୍ବା ଓ୍ବେଷ୍ଟ ବ୍ୟାଙ୍କରେ ପାଲେଷ୍ଟାଇନ୍ ରାଷ୍ଟ୍ର ହେବ ନାହିଁ ବୋଲି କହିଥିବା ଇସ୍ରାଏଲୀ ଗଣମାଧ୍ୟମ ପ୍ରକାଶ କରିଛି। ଟ୍ରମ୍ପ୍ଙ୍କ ଦ୍ୱାରା ଘୋଷିତ ୧୫ ସୂତ୍ରୀ ଯୋଜନାକୁ ପ୍ରତ୍ୟାଖ୍ୟାନ କରି ନେତାନ୍ୟାହୁ କହିଛନ୍ତି, ହମାସ୍ ସମ୍ପୂର୍ଣ୍ଣ ନିରସ୍ତ୍ର ନ ହେବା ପର୍ଯ୍ୟନ୍ତ ଗାଜାରୁ ଇସ୍ରାଏଲ୍ ଓହରିଯିବ ନାହିଁ।
ଟ୍ରମ୍ପ୍ ତାଙ୍କ ଶାନ୍ତି ଯୋଜନାକୁ ଏକ ବଡ଼ ସଫଳତା ବୋଲି ଘୋଷଣା କରିଥିବାବେଳେ ନେତାନ୍ୟାହୁ ଏଭଳି ମନ୍ତବ୍ୟ ଦେଇଛନ୍ତି। ହମାସ୍ ମଧ୍ୟ ନିଜର ସର୍ତ୍ତ ରଖୁଥିଲାବେଳେ ନେତାନ୍ୟାହୁ ଶାନ୍ତି ଯୋଜନାକୁ ପ୍ରତ୍ୟାଖ୍ୟାନ କରିଦେବା ପରେ ଆମେରିକା ସମର୍ଥତ୍ତ ଯୋଜନାକୁ କାର୍ଯ୍ୟକାରୀ କରିବାଠାରୁ ବହୁ ଦୂରରେ ଉଭୟ ପକ୍ଷ ରହିଥିବା ସ୍ପଷ୍ଟ ହୋଇଯାଇଛି। ଯାହା ହୋଇଯାଉ ନା କାହିଁକି, ହମାସ୍ ସମ୍ପୂର୍ଣ୍ଣ ନିରସ୍ତ୍ର ନ ହେବା ପର୍ଯ୍ୟନ୍ତ ଇସ୍ରାଏଲୀ ସେନା ଏହାର ବର୍ତ୍ତମାନର ସ୍ଥିତିରୁ ଓହରିବ ନାହିଁ ବୋଲି ଗତ ସପ୍ତାହରେ ଏହାର ଜଣେ ଅଧିକାରୀ କହିଥିଲେ। ନେତାନ୍ୟାହୁ ଏବେ ସେହି ଆଭିମୁଖ୍ୟ ଉପରେ ଜୋର୍ ଦେଇଛନ୍ତି ଓ ଗାଜାରୁ ଇସ୍ରାଏଲ୍ ସେନା ପ୍ରତ୍ୟାହାର କରିବ ନାହିଁ ବୋଲି କହିଛନ୍ତି।
