ବେଲ୍ଫାଷ୍ଟ, ୨୮ା୬: ଆୟର୍ଲାଣ୍ଡ ବିପକ୍ଷରେ ଭାରତର ଶକ୍ତିଶାଳୀ ବ୍ୟାଟିଂ ଲାଇନ୍ ଅପ୍ ପୁଣି ବିଫଳ ହୋଇଛି। ସ୍ଥାନୀୟ ସିଭିଲ ସର୍ଭିସ କ୍ରିକେଟ କ୍ଲବଠାରେ ରବିବାର ଖେଳାଯାଇଥିବା ଦ୍ୱିତୀୟ ତଥା ଅନ୍ତିମ ଅନ୍ତର୍ଜାତୀୟ ଟି୨୦ କ୍ରିକେଟ ମ୍ୟାଚରେ ଆୟର୍ଲାଣ୍ଡ ୧ରନରେ ଭାରତକୁ ହରାଇ ଦେଇଛି।
ଆୟର୍ଲାଣ୍ଡ ଦ୍ୱାରା ଧାର୍ଯ୍ୟ ୧୫୫ରନର ବିଜୟ ଲକ୍ଷ୍ୟକୁ ପିଛା କରି ଭାରତ ନିର୍ଦ୍ଧାରିତ ଓଭରରେ ୯ଉଇକେଟ ବିନିମୟରେ ୧୫୩ ରନ୍ କରିପାରିଥିଲା। ଟପ୍ ସ୍କୋରର ତିଳକ ବର୍ମା ୫୫ରନ (୪୬ ବଲ୍, ୩ଚୌକା ୧ ଛକା) କରିଥିଲେ। ହର୍ଷିତ ରାଣା ୨୧ ଓ ଶିବମ ଦୁବେ ୨୦ରନ୍ କରିଥିଲେ।
ଆୟର୍ଲାଣ୍ଡ ପକ୍ଷରୁ ଜୟ ମୁନ୍ଦ୍ରା ଓ ମାଥ୍ୟୁ ହୋଲାର୍ଡ ୩ଟି ଲେଖାଏଁ ଉଇକେଟ ନେଇଥିଲେ। ଆୟୋଜକ ଦଳ ୨ମ୍ୟାଚ ବିଶିଷ୍ଟ ସିରିଜରେ କ୍ଲିନ୍ ସୁଇପ୍ ବିଜୟ ହାସଲ କରିଛି। ଶୁକ୍ରବାର ଅନୁଷ୍ଠିତ ପ୍ରଥମ ଟି୨୦ରେ ଆୟର୍ଲାଣ୍ଡ ୩୪ ରନରେ ଭାରତକୁ ପରାସ୍ତ କରିଥିଲା।
୩ ପେସ୍ ବୋଲର ହର୍ଷିତ ରାଣା (୧/୧୭), ଅର୍ଶଦୀପ ସିଂ (୨/୩୫) ଓ ପ୍ରିନ୍ସ ଯାଦବ (୩/୨୨) ଚମତ୍କାର ବୋଲିଂ ଯୋଗୁ ଟସ୍ ଜିତି ପ୍ରଥମେ ବୋଲିଂ କରିଥିବା ଭାରତ ଆୟର୍ଲାଣ୍ଡ ସ୍କୋରକୁ ୧୫୪/୮ରେ ସୀମିତ କରିଦେଇଥିଲା। ଦଳର ଟପ୍ ସ୍କୋରର ହ୍ୟାରୀ ଟେକ୍ଟର ତାଙ୍କ ୧୦୦ତମ ଅନ୍ତର୍ଜାତୀୟ ଟି୨୦ରେ ୫୩ରନ (୪୭ ବଲ୍, ୫ ଚୌକା ଓ ୧ଛକା) କରିଥିବା ବେଳେ ବେଞ୍ଜାମିନ୍ କାଲିଜ ୩୭ ରନ କରିଥିଲେ। ଏହି ମ୍ୟାଚରେ ବ୍ୟାଟିଂ ଅଲରାଉଣ୍ଡର ସୂର୍ଯ୍ୟାଂଶ ଶେଡ୍ଗେ ଓ ଫାଷ୍ଟ ବୋଲର ପ୍ରିନ୍ସ ଯାଦବ ଭାରତ ତରଫରୁ ସେମାନଙ୍କର ପ୍ରଥମ ପଦାର୍ପଣ କରିଥିଲେ। ଚର୍ଚ୍ଚିତ ସ୍ବଳ୍ପ ବୟସ୍କ ବ୍ୟାଟିଂ ସେନ୍ସେସନ ବୈଭବ ସୂର୍ଯ୍ୟବଂଶୀଙ୍କୁ ଦଳରେ ସାମିଲ କରାଯାଇ ନ ଥିଲା।
