ଦୁବାଇ, ୨୭।୮(ପି.ଟି.)- ଇଣ୍ଡିଆନ ପ୍ରିମିୟର ଲିଗ୍(ଆଇପିଏଲ୍) ପାଇଁ କିଙ୍ଗ୍ସ ଇଲେଭେନ ପଞ୍ଜାବ ଓ ରାଜସ୍ଥାନ ରୟାଲ୍ସ ଦଳର ଖେଳାଳିମାନେ ବୁଧବାର ଟ୍ରେନିଂ ଆରମ୍ଭ କରିଛନ୍ତି। ଗତ ସପ୍ତାହରେ ଏହି ଦୁଇ ଦଳର ଖେଳାଳିମାନେ ଏଠାରେ ପହଞ୍ଚତ୍ବାପରେ ୬ ଦିନ କ୍ୱାରାଣ୍ଟାଇନ୍ରେ ରହିଥିଲେ। ଏହି ଅବସରରେ ସେମାନଙ୍କର କୋଭିଡ୍-୧୯ ଟେଷ୍ଟ ହୋଇଥିଲା ଏବଂ ରିପୋର୍ଟ ନେଗେଟିଭ୍ ଆସିଥିଲା। କିଙ୍ଗ୍ସ ଇଲେଭେନ ଓ ରୟାଲ୍ସ ଦଳ ଦୁବାଇରେ ଅବସ୍ଥାନ କରୁଛନ୍ତି। ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ(ବିସିସିଆଇ) ଷ୍ଟାଣ୍ଡାର୍ଡ ଅପରେଟିଂ ପ୍ରୋସିଜିଓର(ଏସ୍ଓପି) ଅନୁସାରେ କ୍ୱାରାଣ୍ଟାଇନ୍ର ୧ମ, ୩ୟ ଓ ୬ଷ୍ଠ ଦିବସରେ କୋଭିଡ ଟେଷ୍ଟ ହୋଇଥିଲା। ରିପୋର୍ଟ ନେଗେଟିଭ୍ ଆସିବାପରେ ସେମାନଙ୍କୁ ଟ୍ରେନିଂ ପାଇଁ ଅନୁମତି ମିଳିଥିଲା। କ୍ୱାରାଣ୍ଟାଇନ୍ ଅବସରରେ ଖେଳାଳିମାନଙ୍କୁ ନିଜ ହୋଟେଲ୍ ରୁମ୍କୁ ମଧ୍ୟ ଯିବାକୁ ଅନୁମତି ଦିଆ ଯାଇ ନ ଥିଲା। ମଙ୍ଗଳବାର ଦୁବାଇରେ ପହଞ୍ଚତ୍ଥିବା ଦକ୍ଷିଣ ଆଫ୍ରିକାର ଡେଭିଡ ମିଲର ଓ ହର୍ଡୁସ ଭିଲଜନ ୬ ଦିନିଆ କ୍ୱାରାଣ୍ଟାଇନ୍ ପରେ ଯଥାକ୍ରମେ ରାଜସ୍ଥାନ ଓ ପଞ୍ଜାବ ଦଳରେ ଯୋଗଦେବେ। ସେପ୍ଟେମ୍ବର ୧୯ରୁ ନଭେମ୍ବର ୧୦ ପର୍ଯ୍ୟନ୍ତ ଆଇପିଏଲ ଜୈବ-ସୁରକ୍ଷିତ ପରିବେଶରେ ଅନୁଷ୍ଠିତ ହେବ। ପୂର୍ବରୁ ଦେଶରେ ସାଧାରଣ ନିର୍ବାଚନ ପାଇଁ ୨୦୦୯ରେ ଦକ୍ଷିଣ ଆଫ୍ରିକାରେ ଏବଂ ସମାନ କାରଣ ପାଇଁ ୨୦୧୪ରେ ୟୁଏଇରେ ଆଇପିଏଲର ପ୍ରଥମଭାଗ ଅନୁଷ୍ଠିତ ହୋଇଥିଲା।
ଗୁରୁବାରଠାରୁ ରୟାଲ ଚ୍ୟାଲେଞ୍ଜର୍ସ
ବିରାଟ କୋହଲିଙ୍କ ନେତୃତ୍ୱାଧୀନ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର(ଆରସିବି) ଦଳର ଟ୍ରେନିଂ କ୍ୟାମ୍ପ ଗୁରୁବାରଠାରୁ ଆରମ୍ଭ ହେବ। ”ଖେଳାଳିମାନେ ଗତ କିଛିମାସଧରି ବିଭିନ୍ନ ପରିବେଶରେ ସମୟ କଟାଇଛନ୍ତି। ସେମାନଙ୍କ ଫିଟ୍ନେସ ସ୍ତର ଏବଂ ଟ୍ରେନିଂ ମଧ୍ୟ ସମାନ ନାହିଁ। ତେଣୁ ସମସ୍ତଙ୍କ ପାଇଁ ସମାନ ଟ୍ରେନିଂ ଉପଯୁକ୍ତ ହେବନାହିଁ। ସପୋର୍ଟ ଷ୍ଟାଫ ଟିମ୍ ଏଥିପାଇଁ କାମ କରୁଛନ୍ତି ଏବଂ ଖେଳାଳିଙ୍କ ମାନସିକ, ଶାରୀରିକ ଓ ଭାବାବେଗ ଅନୁସାରେ
କିପରି ସେମାନଙ୍କୁ ଆଗାମୀ ସିଜନ ପାଇଁ ପ୍ରସ୍ତୁତ କରାଯାଇ ପାରିବ ସେଥିପ୍ରତି ଧ୍ୟାନ ଦିଆଯାଉଛି“ ବୋଲି ଆର୍ସିବି କ୍ରିକେଟ ଅପରେଶନ ନିର୍ଦ୍ଦେଶକ ମାଇକ ହେସନ ପ୍ରକାଶ କରିଛନ୍ତି। କୋହଲିଙ୍କ ଦଳ ଏବେ ମଧ୍ୟ ଆଇପିଏଲ ଟାଇଟଲ ସ୍ବାଦ ଚାଖିବା ଅପେକ୍ଷାରେ ଅଛି। ଗତ ସିଜନ ଗୁଡ଼ିକରେ ଦଳ ନିକଟତର ହୋଇଥିଲେ ହେଁ ବିଫଳ ହୋଇଥିଲା। ଖେଳାଳିମାନେ ଆଇସିସି କ୍ରିକେଟ ଏକାଡେମୀରେ ଟ୍ରେନିଂ ନେଇ ସେମାନଙ୍କୁ ପ୍ରସ୍ତୁତ କରିବେ।
