ଭୁବନେଶ୍ବର, ୮।୨(ବ୍ୟୁରୋ): ନବ ଦାସଙ୍କ ହତ୍ୟା ଘଟିବା କ୍ଷଣି ମୁଖ୍ୟମନ୍ତ୍ରୀ କ୍ରାଇମବ୍ରାଞ୍ଚ ଦ୍ୱାରା ତଦନ୍ତ ପାଇଁ ନିର୍ଦ୍ଦେଶ ଦେଲେ। ଏହା ପର ମୁହୂର୍ତ୍ତରେ ହାଇକୋର୍ଟ ରେଜିଷ୍ଟ୍ରାରକୁ ଚିଠି ଲେଖି ତଦନ୍ତକୁ ତଦାରଖ କରିବା ପାଇଁ କହି କ୍ରାଇମବ୍ରାଞ୍ଚ ଉପରେ ତାଙ୍କ ନିଜର ବିଶ୍ୱାସ ନ ଥିବା ମୁଖ୍ୟମନ୍ତ୍ରୀ ପ୍ରମାଣିତ କଲେ। ଅବସରପ୍ରାପ୍ତ ଜଜ୍ ଜେ.ପି.ଦାସଙ୍କ ତତ୍ତ୍ୱାବଧାନରେ ତଦନ୍ତ କରିବାକୁ ହାଇକୋର୍ଟ କୌଣସି ଜୁଡିସିଆଲ ନିର୍ଦ୍ଦେଶ ଦେଇନାହାନ୍ତି। ବାସ୍ତବରେ ନବ ଦାସଙ୍କ ହତ୍ୟାକାଣ୍ଡର ତଦନ୍ତ ‘କୋର୍ଟ ମନିଟର୍ଡ’ ନୁହେଁ ଏବଂ ତଦାରଖ କରୁଥିବା ଅବସରପ୍ରାପ୍ତ ଜଜ୍ ଜେ.ପି.ଦାସଙ୍କ ନିଯୁକ୍ତି ସମ୍ପର୍ଣ୍ଣ ବେଆଇନ। ହାଇକୋର୍ଟ ଓଡ଼ିଶା ସରକାରଙ୍କ ଆଇନ ଉପଦେଷ୍ଟା ନୁହନ୍ତି। ହାଇକୋର୍ଟଙ୍କୁ କ’ଣ ଲେଖାଗଲା, କିଏ ଲେଖିଲେ ଏବଂ କେଉଁ ଦରଖାସ୍ତ ଉପରେ ହାଇକୋର୍ଟ ଏକ ନ୍ୟାୟିକ ତଦନ୍ତର ନିର୍ଦ୍ଦେଶ ପ୍ରଦାନ କରିଲେ, କେଉଁ ଆବେଦନ କିମ୍ବା ଆଦେଶ ବଳରେ ଜଣେ ଅବସରପ୍ରାପ୍ତ ଜଜ୍ଙ୍କ ଦ୍ୱାରା ତଦନ୍ତର ତଦାରଖ କରାଯାଉଛି, ତା’ର ସ୍ପଷ୍ଟୀକରଣ ରାଜ୍ୟ ସରକାର ରଖିବାକୁ ଭାଜପା ରାଜ୍ୟ କାର୍ଯ୍ୟାଳୟରେ ମଙ୍ଗଳବାର ଆୟୋଜିତ ଖବରଦାତା ସମ୍ମିଳନୀରେ ମୁଖପାତ୍ର ତଥା ବରିଷ୍ଠ ଆଇନଜୀବୀ ପୀତାମ୍ବର ଆଚାର୍ଯ୍ୟ ଦାବି କରିଛନ୍ତି।
