ଇନ୍ଦୋର,୨୮।୭: ମଧ୍ୟପ୍ରଦେଶର ଇନ୍ଦୋର ରେଳ ଷ୍ଟେଶନର ପାର୍ଶଲ କାର୍ଯ୍ୟାଳୟରେ କିଛି ଲୋକ ବୁଧବାର ହଙ୍ଗାମା ସୃଷ୍ଟି କରିଛନ୍ତି। ସେମାନେ ଅଭିଯୋଗ କରିଛନ୍ତି ଯେ, ୫୦ ଲକ୍ଷ ଟଙ୍କା ମୂଲ୍ୟର ୧୯ଟି କେଶ ପାର୍ଶଲ ଚୋରି ହୋଇଯାଇଛି। ଅଭିଯୋଗକାରୀ ରାକେଶ କରିଛନ୍ତି ଯେ, ୬ ଜୁଲାଇ ୨୦୨୧ରେ ଇନ୍ଦୋରରୁ କୋଲକତାର ହାଓ୍ବଡା ଷ୍ଟେଶନ ଯିବା ପାଇଁ କେଶ ପାର୍ଶଲ କରିଥିଲେ। କିନ୍ତୁ ହାଓ୍ବାଡା ଷ୍ଟେଶନରେ ମାତ୍ର ୩ ବସ୍ତା ପାର୍ଶଲ ରିସିଭ୍ ହୋଇଥିଲା। ରେଳ ବିଭାଗର କିଛି କର୍ମଚାରୀଙ୍କ ଉପରେ ରାକେଶ ଚୋରି ଅଭିଯୋଗ ଆଣିଛନ୍ତି। ସେ କହିଛନ୍ତି ଯେ, ୨୨ ବସ୍ତା ପାର୍ଶଲ ଲୋଡ୍ ହୋଇଥିଲା। କିନ୍ତୁ କୋଲକତାରେ ମାତ୍ର ୩ ବସ୍ତା ପାର୍ଶଲ ହିଁ ରିସିଭ୍ ହୋଇଥିଲା। ବାକି ୧୯ ବସ୍ତା କୁଆଡେ କଲା ବୋଲି ରାକେଶ ପ୍ରଶ୍ନ କରିଛନ୍ତି। ରେଳ ବିଭାଗ କର୍ମଚାରୀମାନେ ବଡ ଘୋଟାଲା କରିଥିବା ସେ ଅଭିଯୋଗ କରିଛନ୍ତି। ରାକେଶଙ୍କ ପାଖରେ ଲୋଡ୍ କରାଯାଇଥିବା ରସିଦ୍ ମଧ୍ୟ ଅଛି। ଯଦି ମୋ ପାର୍ଶଲ ନ ମିଳିଲା ତେବେ ମୁଁ ରେଳ ଷ୍ଟେଶନ ଆଗରେ ମୋ ଜୀବନ ଦେଇଦେବି ବୋଲି ରାକେଶ କହିଛନ୍ତି। ଏଭଳି ଅଭିଯୋଗ ଆସିବା ପରେ ରେଳ ବିଭାଗର ପିଆର୍ଓ ଜିତେନ୍ଦ୍ର ଜୟନ୍ତ ଏହି ଘଟଣା ଆରପିଏଫ୍ ଦ୍ୱାରା ଯାଞ୍ଚ୍ ହେବ ବୋଲି କହିଛନ୍ତି।
ସୂଚନାଯୋଗ୍ୟ, ରାକେଶ ପ୍ରାୟ ୧୦ କୁଇଣ୍ଟାଲ କେଶ ପାର୍ଶଲ କରିଥିଲେ। ଗୋଟିଏ କିଲୋ କେଶ ପ୍ରାୟ ୫ ହଜାର ଟଙ୍କା ହିସାବରେ ୧୦ କୁଇଣ୍ଟାଲ କେଶର ମୂଲ୍ୟ ୫୦ ଲକ୍ଷ ଟଙ୍କା। ଭାରତରୁ ଅଧିକାଂଶ ଝଡା କେଶ ଚାଇନା ରପ୍ତାନୀ ହୁଏ।
