ନୂଆଦିଲ୍ଲୀ,୧୮।୭(ପି.ଟି.): ଅଲିମ୍ପିକ୍ ପୂର୍ବରୁ ଭାରତୀୟ ଶୁଟରଙ୍କ ଲାଗି ଟୋକିଓରେ କ୍ୱାରାଣ୍ଟାଇନର ଆବଶ୍ୟକତା ନାହିଁ। ଶନିବାର ବିଳମ୍ବିତ ରାତିରେ ଭାରତୀୟ ଶୁଟରମାନେ ଟୋକିଓରେ ପହଞ୍ଚିଥିଲେ ଓ କ୍ରୀଡ଼ାଗ୍ରାମରେ ସେମାନଙ୍କୁ ରୁମ୍ରେ ରହିବାକୁ ଅନୁମିତ ମିଳିଯାଇଥିଲା। ଶୁଟରମାନଙ୍କୁ କ୍ୱାରାଣ୍ଟାଇନରେ ରହିବାର ଆବଶ୍ୟକତା ନାହିଁ ବୋଲି କୁହାଯାଇଛି। ଭାରତୀୟ ଶୁଟରମାନେ ୧୯ ତାରିଖରୁ ଟ୍ରେନିଂ ଆରମ୍ଭ କରିବେ। ସେମାନେ କ୍ରୋଏସିଆରୁ ଆସି ଟୋକିଓରେ ପହଞ୍ଚିଥିବାରୁ କ୍ୱାରାଣ୍ଟାଇନ୍ର ଆବଶ୍ୟକତା ନାହିଁ ବୋଲି ନ୍ୟାଶନାଲ ରାଇଫଲ ଆସୋସିଏଶନ ଅଫ୍ ଇଣ୍ଡିଆ (ଏନ୍ଆରଏଆଇ) ସମ୍ପାଦକ ରାଜୀବ ଭାଟିଆ କହିଛନ୍ତି। କ୍ରୋଏସିଆର ଜାଗ୍ରେବ୍ରେ ଭାରତୀୟ ଶୁଟରମାନେ ୮୦ ଦିନ ଧରି ବିଭିନ୍ନ ପ୍ରତିଯୋଗିତାରେ ଅଂଶଗ୍ରହଣ କରିବା ସହ ଟ୍ରେନିଂ ନେଇଥିଲେ। ଏଥର ଅଲିମ୍ପିକ୍ରେ ଭାରତର ୧୫ଜଣ ଶୁଟର ଅଂଶଗ୍ରହଣ କରିବେ। ଅସକା ଶୁଟିଂ ରେଞ୍ଜରେ ଶୁଟିଂ ଇଭେଣ୍ଟଗୁଡିକ ଆୟୋଜନ ହେବ। ଉତ୍ତର ପଶ୍ଚିମ ଟୋକିଓର ସାଇତାମା ପ୍ରାନ୍ତରେ ଏହି ଶୁଟିଂ ରେଞ୍ଜ ଅବସ୍ଥିତ। ୧୯୬୪ ଅଲିମ୍ପିକ୍ସର ଶୁଟିଂ ଇଭେଣ୍ଟଗୁଡିକ ମଧ୍ୟ ଏହି ଭେନ୍ୟୁରେ ଆୟୋଜିତ ହୋଇଥିଲା।
