ନୂଆଦିଲ୍ଲୀ, ୧୨ା୯- ଟିମ୍ ଇଣ୍ଡିଆର ମିଡ୍ଲ ଅର୍ଡରରେ ରବିଚନ୍ଦ୍ରନ ଅଶ୍ୱିନଙ୍କୁ ସ୍ଥାନ ଦେବା ଉଚିଚ୍। ଏହା ଦ୍ୱାରା ମଧ୍ୟକ୍ରମ ଶକ୍ତିଶାଳୀ ହେବ। ଭାରତର ଏହି ଭେଟରାନ ଅଫ୍ ସ୍ପିନର ଅଲରାଉଣ୍ଡର ନିଜକୁ ସମସ୍ତ କଣ୍ଡିଶନରେ ଜଣେ ମ୍ୟାଚ୍ ଓ୍ବିନର ପ୍ରମାଣ କରି ସାରିଛନ୍ତି। ତାଙ୍କୁ ଚୟନକର୍ତ୍ତାମାନେ ଅଣଦେଖା କରିବା ଉଚିତ୍ ନୁହେଁ ବୋଲି କହିଛନ୍ତି ଅଷ୍ଟ୍ରେଲିଆର କିମ୍ବଦନ୍ତୀ କ୍ରିକେଟର ଇଆନ ଚାପେଲ।
ଭାରତୀୟ ଦଳରେ ବହୁ ଅଲରାଉଣ୍ଡର ଅଛନ୍ତି। ଅଷ୍ଟ୍ରେଲିଆରେ କ୍ରମାଗତ ଦୁଇଟି ସିରିଜ ଜିତିବା ଏବଂ ବର୍ତ୍ତମାନ ଇଂଲଣ୍ଡରେ ସଫଳତା ହେଉଛି ଏହାର ପ୍ରମାଣ। ଭାରତକୁ ନିଜ ଦେଶରେ ପରାସ୍ତ କରିବା ସହଜ ନୁହେଁ। ଭାରତୀୟ ଟିମ୍ ମ୍ୟାନେଜମେଣ୍ଟ ଇଂଲଣ୍ଡ ବିପକ୍ଷ ଟେଷ୍ଟ ମ୍ୟାଚ୍ଗୁଡ଼ିକ ଲାଗି ଅଶ୍ୱିନଙ୍କ ପରିବର୍ତ୍ତେ ବାମହାତୀ ସ୍ପିନର ରବୀନ୍ଦ୍ର ଜାଡେଜାଙ୍କୁ ଖେଳାଇଥିଲା। ଜାଡେଜା, ଅଶ୍ୱିନ, ହାର୍ଦ୍ଦିକ ପାଣ୍ଡ୍ୟା ଓ ରିଷଭ ପନ୍ତ ଉପସ୍ଥିତ ରହିଲେ ଭାରତର ଲୋୟର ମିଡ୍ଲ ଅର୍ଡର ଖୁବ୍ ଶକ୍ତିଶାଳୀ ହୋଇପାରିବ। ଓଭାଲ ଟେଷ୍ଟ ପାଇଁ ମିଡ୍ଲ ଅର୍ଡରରେ ଡାହାଣ ଓ ବାମହାତୀ ବ୍ୟାଟ୍ସମ୍ୟାନଙ୍କ ମଧ୍ୟରେ ସନ୍ତୁଳନ ରକ୍ଷା କରିବାକୁ ଯାଇ ହୁଏତ ଟିମ୍ ମ୍ୟାନେଜମେଣ୍ଟ ଜାଡେଜାଙ୍କୁ ୫ମ ସ୍ଥାନରେ ବ୍ୟାଟିଂ ପାଇଁ ମନୋନୀତ କରିଥାଇପାରନ୍ତି। ଲଣ୍ଡନର ଓଭାଲଠାରେ ଭାରତ ଓ ଇଂଲଣ୍ଡ ଚତୁର୍ଥ ଟେଷ୍ଟ ମ୍ୟାଚ ଖେଳାଯାଇଥିଲା। ଜାଡେଜା ଯଦି ତାଙ୍କ ସ୍ଥାନରେ ଉପଯୁକ୍ତ ମନେ ହୁଅନ୍ତି ତେବେ ଦଳରେ ଯେଉଁ ସିମ୍ ବୋଲର ଅଲରାଉଣ୍ଡରଙ୍କୁ ନିଆଯିବ ସେ ନେଇ ଦ୍ୱନ୍ଦ୍ୱ ସୃଷ୍ଟି ହେବ। ଏକ୍ଷେତ୍ରରେ ବର୍ତ୍ତମାନ ସମ୍ପୂର୍ଣ୍ଣ ଫିଟ୍ ଥିବା ହାର୍ଦ୍ଦିକ ପାଣ୍ଡ୍ୟା ଉପଯୁକ୍ତ ମନେହୁଅନ୍ତି। ସେମାନଙ୍କ ପାଇଁ ଦ୍ୱିତୀୟ ବିକଳ୍ପ ରହିଛନ୍ତି ଶାର୍ଦ୍ଦୁଳ ଠାକୁର। ମିଡ୍ଲ ଅର୍ଡରରେ ଜାଡେଜା, ରିଷଭ ପନ୍ତ ଓ ଅଶ୍ୱିନ ରହିଲେ ଏମାନଙ୍କଠାରୁ ଭଲ ସ୍କୋର ଆଶା କରାଯାଇ ପାରିବ। ଏହା ପରେ ୩ ଫାଷ୍ଟ ବୋଲର ବ୍ୟାଟିଂ କରିବାକୁ ଆସିବେ। ଦଳ ବେଶ୍ ସନ୍ତୁଳିତ ହୋଇପାରିବ ବୋଲି ଚାପେଲ କହିଛନ୍ତି।
