ମୁମ୍ବାଇ,୫।୧୨: ନ୍ୟୁଜିଲାଣ୍ଡ ବିପକ୍ଷ ଟେଷ୍ଟ ସିରିଜ୍ ଜିତିବା ପାଇଁ ଭାରତୀୟ ଦଳକୁ ଆଉ ୫ ଉଇକେଟ ଦରକାର। ପ୍ରଥମ ଟେଷ୍ଟ ଅମୀମାଂଶିତ ଭାବେ ଶେଷ ହୋଇଥିବା ବେଳେ ଦ୍ୱିତୀୟ ଟେଷ୍ଟ ମ୍ୟାଚ୍ରେ ୫୪୦ ରନ୍ର ବିଜୟ ଲକ୍ଷ୍ୟ ପିଛା କରୁଥିବା ଭ୍ରମଣକାରୀ ନ୍ୟୁଜିଲାଣ୍ଡ ତୃତୀୟ ଦିନ ସୁଦ୍ଧା ୫ ଉଇକେଟ ହରାଇ ୧୪୦ ରନ୍ କରିଛି। ଦଳକୁ ଜିତିବା ପାଇଁ ଆହୁରି ୪୦୦ ରନ୍ ଦରକାର ଥିବାବେଳେ ମ୍ୟାଚ୍ରେ ଦୁଇ ଦିନ ବାକି ଅଛି। ଏଣୁ ଡ୍ର’ ହେବାର ସମ୍ଭାବନା ପ୍ରାୟତଃ ନାହିଁ।
ନ୍ୟୁଜିଲାଣ୍ଡ ପାଇଁ ହେନରୀ ନିକୋଲସ ୩୬ ଓ ରଚିନ ରବୀନ୍ଦ୍ର ୨ ରନ୍ କରି ଅପରାଜିତ ରହିଛନ୍ତି। ଭାରତ ପାଇଁ ରବିଚନ୍ଦ୍ରନ ଅଶ୍ୱିନ ୩ ଉଇକେଟ ନେଇଥିବା ବେଳେ ଗୋଟିଏ ସଫଳତା ହାତେଇଛନ୍ତି ଅକ୍ଷର ପଟେଲ। ପୂର୍ବରୁ ମ୍ୟାଚ୍ର ପ୍ରଥମ ଇନିଂସରେ ଭାରତ ୩୨୫ ରନ୍ କରିଥିବା ବେଳେ ମାତ୍ର ୬୨ ରନ୍ରେ ଅଲଆଉଟ୍ ହୋଇଥିଲା ନ୍ୟୁଜିଲାଣ୍ଡ। ଏହାପରେ ୨୭୬/୭ ସ୍କୋରରେ ଦ୍ୱିତୀୟ ଇନିଂସ ଘୋଷଣା କରିଥିଲା ଟିମ୍ ଇଣ୍ଡିଆ। ଫଳରେ ଭ୍ରମଣକାରୀ ଦଳ ଆଗରେ ଧାର୍ଯ୍ୟ ହୋଇଥିଲା ୫୪୦ ରନ୍ର ବିଶାଳ ବିଜୟ ଲକ୍ଷ୍ୟ।
