କୋଲକାତା,୨୧।୧୧: ନ୍ୟୁଜିଲାଣ୍ଡ ବିପକ୍ଷ ଚଳିତ ଟି୨୦ ସିରିଜରେ କ୍ଲିନ୍ ସୁଇପ୍ କରିବା ଲକ୍ଷ୍ୟରେ ରହିଛି ରୋହିତ ଶର୍ମାଙ୍କ ନେତୃତ୍ୱାଧୀନ ଭାରତୀୟ ଦଳ। ଐତିହାସିକ ଇଡେନ ଗାର୍ଡେନ ଷ୍ଟାଡିୟମରେ ରବିବାର ଦୁଇ ଦଳ ମଧ୍ୟରେ ତୃତୀୟ ତଥା ଅନ୍ତିମ ଟି୨୦ ମ୍ୟାଚ୍ ଖେଳାଯିବ। ୨-୦ରେ ସିରିଜ୍ ଜିତି ସାରିଥିବାରୁ ମାଚ୍ରେ ଗୁଡ଼ାଏ ଏକ୍ସପେରିମେଣ୍ଟ କରିପାରନ୍ତି ଭାରତୀୟ ଦଳର ମୁଖ୍ୟ କୋଚ୍ ରାହୁଲ ଡ୍ରାଭିଡ୍।
ପ୍ରଥମ ଦୁଇଟି ମ୍ୟାଚ୍ରେ ରୋହିତ ଟସ୍ ଜିତିବା ପରେ ଭାରତର କାମ ସହଜ ହୋଇଯାଇଥିଲା। ଡେଥ୍ ଓଭରରେ ଘରୋଇ ବୋଲରଙ୍କ ପ୍ରଭାବୀ ପ୍ରଦର୍ଶନ ଯୋଗୁ ଉଭୟ ମ୍ୟାଚ୍ରେ ବଡ଼ ସ୍କୋର ଛିଡ଼ା କରିପାରି ନ ଥିଲା ନ୍ୟୁଜିଲାଣ୍ଡ। ଆଉ ଭାରତ ପାଇଁ କେବଳ ଟପ୍ ୩ ବ୍ୟାଟର କାମ ଶେଷ କରି ଦେଉଛନ୍ତି। ଏଭଳି ପରିସ୍ଥିତିରେ ଋତୁରାଜ ଗାଏକ୍ୱାଡ, ଆଭେଶ ଖାଁ ଓ ଇଶାନ କିଷନଙ୍କୁ ସୁଯୋଗ ମିଳିବ ବୋଲି ଆଶା କରାଯାଉଛି। ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ) ସର୍ବାଧିକ ରନ ସଂଗ୍ରହ କରି ଅରେଞ୍ଜ କ୍ୟାପ୍ ହାସଲକାରୀ ଋତୁରାଜଙ୍କୁ ଟପ୍-୩ରେ ବ୍ୟାଟିଂ କରିବାକୁ ସୁଯୋଗ ମିଳିପାରେ। ଟପ୍ ଅର୍ଡରରେ ସେ ଶ୍ରେଷ୍ଠ ପ୍ରଦର୍ଶନ କରନ୍ତି। ତେବେ ତାଙ୍କ ପାଇଁ ଦଳର ଅଧିନାୟକ କିମ୍ବା ଉପ ଅଧିନାୟକଙ୍କ ମଧ୍ୟରୁ ଜଣଙ୍କୁ ବାଦ୍ ଦେବାକୁ ପଡ଼ିବ। ରାହୁଲଙ୍କୁ ବିଶ୍ରାମ ଦେବା ଶ୍ରେୟସ୍କର ହେବ। କାରଣ ସେ ଆଗାମୀ ଟେଷ୍ଟ ସିରିଜରେ ମଧ୍ୟ ଖେଳିବେ।
ସେହିପରି ବୋଲିଂ ବିଭାଗରେ ଆଭେସ ଖାଁଙ୍କୁ ସୁଯୋଗ ମିଳିପାରେ। ଯଦି ତାଙ୍କୁ ଦଳରେ ନିଆଯାଏ, ତେବେ ଦୀପକ ଚହର କିମ୍ବା ଅଭିଜ୍ଞ ଭୁବନେଶ୍ୱର କୁମାର ମଧ୍ୟରୁ ଜଣଙ୍କୁ ବସିବାକୁ ପଡ଼ିବ। ଅକ୍ଷର ପଟେଲ କିମ୍ବା ରବିଚନ୍ଦ୍ରନ ଅଶ୍ୱିନଙ୍କ ବଦଳରେ ଦଳକୁ ଫେରିପାରନ୍ତି ୟୁଜବେନ୍ଦ୍ର ଚହଲ।
କ୍ରମାଗତ ଭାବେ ଖେଳି ଆସୁଥିବା ଉଇକେଟକିପର ବ୍ୟାଟର ରିଷଭ ପନ୍ତଙ୍କୁ ବିଶ୍ରାମ ଦିଆଯାଇ ଇଶାନ କିଶନଙ୍କୁ ଅନ୍ତିମ ମ୍ୟାଚ୍ରେ ଖେଳାଯିବାର ସମ୍ଭାବନା ରହିଛି।
