ନୂଆଦିଲ୍ଲୀ,୧୫।୧୦ : ବିଶ୍ୱ କ୍ଷୁଧା ସୂଚକାଙ୍କରେ (ଗ୍ଲୋବାଲ ହଙ୍ଗର ଇଣ୍ଡେକ୍ସ)-୨୦୨୨ରେ ଭାରତ ୧୨୧ଟି ଦେଶର ମଧ୍ୟରେ ପୂର୍ବର ୧୦୧ ସ୍ଥାନରୁ ୧୦୭ ତମ ସ୍ଥାନକୁ ଖସି ଆସିଛି। ବର୍ତ୍ତମାନ ପଡୋଶୀ ଦେଶ ପାକିସ୍ଥାନ, ବାଂଲାଦେଶ, ନେପାଳ ଏବଂ ଶ୍ରୀଲଙ୍କା ମଧ୍ୟ ଏହି ସୂଚକାଙ୍କରେ ଭାରତକୁ ପଛରେ ପକାଇ ଦେଇଛନ୍ତି।
କ୍ଷୁଧା ଏବଂ ପୁଷ୍ଟିହୀନତାକୁ ଟ୍ରାକ କରୁଥିବା ଗ୍ଲୋବାଲ ହଙ୍ଗର ଇଣ୍ଡେକ୍ସର ୱେବସାଇଟ ଶନିବାର ରିପୋର୍ଟ କରିଛି ଯେ ଚାଇନା, ତୁର୍କୀ ଏବଂ କୁଏତ ସମେତ ୧୭ ଟି ଦେଶର ସ୍କୋର ୫ ରୁ କମ ରହିଛି। ସେସବୁ ଦେଶ ତାଲିକାରେ ଶୀର୍ଷରେ ରହିଛନ୍ତି।
ଆଇରିଶ୍ ସହାୟତା ଏଜେନ୍ସି କନର୍ନ ୱାଲର୍ଡଓ୍ବାଇର୍ଡ ଏବଂ ଜର୍ମାନ ସଂଗଠନ ୱେଲ୍ଟ ହଙ୍ଗର ହିଲ୍ଫ ଦ୍ୱାରା ମିଳିତ ଭାବେ ପ୍ରସ୍ତୁତ ହୋଇଥିବା ଏହି ରିପୋର୍ଟରେ ଭାରତରେ କ୍ଷୁଧା ସ୍ତର ଗୁରୁତର ବୋଲି ବର୍ଣ୍ଣନା କରାଯାଇଛି।
୨୦୨୧ ମସିହାରେ, ୧୧୬ ଦେଶ ତାଲିକାରେ ଭାରତ ୧୦୧ ରେ ସ୍ଥାନ ପାଇଥିଲା। କିନ୍ତୁ ଚଳିତ ୨୦୨୨ରେ ଭାରତ ୧୨୧ ଦେଶ ତାଲିକାରେ ୬ଟି ପଏଣ୍ଟ ହ୍ରାସ କରି ୧୦୭ ନମ୍ବର ସ୍ଥାନରେ ରହିଛି। ଏହା ସହିତ ଭାରତର ଗ୍ଲୋବାଲ ହଙ୍ଗର ଇଣ୍ଡେକ୍ସ (ଜିଏଚଆଇ) ସ୍କୋର ମଧ୍ୟ ହ୍ରାସ ପାଇଛି। ୨୦୦୦ରେ ଏହା ୩୮.୮ଥିଲା। ୨୦୧୪ରୁ ୨୦୨୨ ମଧ୍ୟରେ ଏହା ୨୮.୨ରୁ ୨୯.୧ ମଧ୍ୟରେ ପହଞ୍ଚିଛି।
ଭାରତର ମାନ୍ୟତା ହ୍ରାସ ପାଇବା ପରେ ସରକାର ଗତ ବର୍ଷ ଏହି ରିପୋର୍ଟକୁ ସମାଲୋଚନା କରି କହିଥିଲେ ଯେ ଗ୍ଲୋବାଲ ହଙ୍ଗର ଇଣ୍ଡେକ୍ସକୁ ହିସାବ ପାଇଁ ବ୍ୟବହୃତ ପଦ୍ଧତି ଅବୈଜ୍ଞାନିକ ଅଟେ।
ସୂଚକାଙ୍କ ପ୍ରକାଶ କରିଥିବା ସଂଗଠନ ଅନୁଯାୟୀ ଏହି ତାଲିକାରେ ଶ୍ରୀଲଙ୍କା ୬୪ ତମ ସ୍ଥାନରେ, ନେପାଳ ୮୧, ବାଂଲାଦେଶ ୮୪ଏବଂ ପାକିସ୍ତାନ ୯୯ ତମ ସ୍ଥାନରେ ରହିଛି। ଦକ୍ଷିଣ ଏସିଆରେ କେବଳ ଆଫଗାନିସ୍ତାନ ଭାରତ ପଛରେ ରହିଛି। ଏହି ସୂଚକାଙ୍କରେ ଆଫଗାନିସ୍ତାନ ୧୦୯ ସ୍ଥାନରେ ଅଛି। ସୂଚନାଯୋଗ୍ୟ ଯେ ସୁଦାନ, ଇଥୋପିଆ, ରୁୱାଣ୍ଡା, ନାଇଜେରିଆ, କେନିଆ, ଗାମ୍ବିଆ, ନାମ୍ବିଆ, କାମ୍ବୋଡିଆ, ମ୍ୟାନମାର, ଘାନା, ଇରାକ, ଭିଏତନାମ, ଲେବାନନ, ଗୁଏନା, ୟୁକ୍ରେନ ଏବଂ ଜାମାଇକା ଭଳି ଦେଶ ମଧ୍ୟ ଏହି ସୂଚକାଙ୍କରେ ଭାରତଠାରୁ ବହୁ ଉଚ୍ଚ ସ୍ଥାନରେ ଅଛନ୍ତି।
