ଜାତିସଂଘ,୨୮।୧୦: ଗାଜାରେ ଯୁଦ୍ଧବିରାମ ଆଣିବା ପାଇଁ ଜାତିସଂଘ ଏକ ପ୍ରସ୍ତାବ ଆଗତ କରିଛି। ଶୁକ୍ରବାର ଏହି ଆଗତ ପ୍ରସ୍ତାବରେ ୧୨୦ଟି ଦେଶ ସମର୍ଥନ ମିଳିଥିବାବେଳେ ଭାରତ ସମେତ ୪୫ଟି ଦେଶ ଏଥିରେ ଯୋଗ ଦେଇ ନାହାନ୍ତି। ଇସ୍ରାଏଲ ଏହି ପ୍ରସ୍ତାବକୁ ପ୍ରତ୍ୟାଖ୍ୟାନ କରିିଛି। ହମାସକୁ ପ୍ରତିହତ କରିବା ପାଇଁ ଦେଶ ସମସ୍ତ ଉପାୟ ଅବଲମ୍ବନ କରିବ ବୋଲି ଇସ୍ରାଏଲ କହିଛି। ଅନ୍ୟପଟେ ହମାସ ଯୁଦ୍ଧ ବିରତିକୁ ସ୍ବାଗତ କରିଛି।
ଭାରତ ଏହି ପ୍ରସ୍ତାବରେ ମତଦାନ କରିବାକୁ ନିଜକୁ ଦୂରେଇ ରଖିବା ସହ ଜାତିସଂଘର ସ୍ବତନ୍ତ୍ର ଅଧିବେଶନରେ ଭାରତର ଉପ ସ୍ଥାୟୀ ପ୍ରତିନିଧୀ ରାଷ୍ଟ୍ରଦୂତ ୟୋଜନା ପଟେଲ କହିଛନ୍ତି, ଗାଜାରେ ଚାଲିଥିବା ସଂଘର୍ଷରେ ଆହତଙ୍କ ସଂଖ୍ୟା ଗୁରୁତର ଓ ନିରନ୍ତର ଚିନ୍ତାର ବିଷୟ ଅଟେ। ସାଧାରଣ ନାଗରିକ ବିଶେଷକରି ମହିଳା ଏବଂ ଶିଶୁଙ୍କୁ ଯୁଦ୍ଧ ପାଇଁ ବହୁମୂଲ୍ୟ ଦେବାକୁ ପଡୁଛି। ଏହି ମାନବିକ ସଙ୍କଟର ସମାଧାନ ହେବା ଆବଶ୍ୟକ। ଉତ୍ତେଜନାକୁ ଦୂର କରିବା ଏବଂ ଗାଜାବାସୀଙ୍କୁ ମାନବିକ ସହାୟତା ଯୋଗାଇବା ପାଇଁ ଅନ୍ତର୍ଜାତୀୟ ସମୁଦାୟର ଉଦ୍ୟମକୁ ଆମେ ସ୍ବାଗତ କରୁଛୁ। ଏହି ପ୍ରୟାସରେ ଭାରତ ମଧ୍ୟ ସହଯୋଗ କରିଛି। ଇସ୍ରାଏଲ-ପାଲେଷ୍ଟାଇନ ସମସ୍ୟାର ସମାଧାନ ପାଇଁ ଭାରତ ସବୁବେଳେ ଚେଷ୍ଟା କରି ଆସୁଛିି। ଇସ୍ରାଏଲ ସୀମାରେ ବାସ କରୁଥିବା ପାଲେଷ୍ଟାନୀୟମାନେ ଯେପରି ଶାନ୍ତିରେ ସୁରକ୍ଷିତ ଏବଂ ସ୍ବାଧୀନ ଭାବେ ବସବାସ କରିପାରିବେ ସେନେଇ ଭାରତ ସବୁବେଳେ ସମର୍ଥନ କରି ଆସୁଛି ବୋଲି ପଟେଲ ଜାତିସଂଘରେ କହିଛନ୍ତି।
