ଢାକା,୨୨।୧୨: ଅଲିମ୍ପିକ୍ ବ୍ରୋଞ୍ଜ ପଦକ ହାତେଇଥିବା ଭାରତ ଚଳିତ ଏସିଆ ଚାମ୍ପିୟନଶିପ୍ ଟ୍ରଫି ହକି ଟୁର୍ନାମେଣ୍ଟରେ ବ୍ରୋଞ୍ଜ ପଦକ ଜିତିଛି। ତାହା ପୁଣି ଚିରପ୍ରତିଦ୍ୱନ୍ଦ୍ୱୀ ପାକିସ୍ତାନକୁ ହରାଇ। ବୁଧବାର ଖେଳାଯାଇଥିବା ପ୍ଲେଅପ୍ ମ୍ୟାଚ୍ରେ ଡିଫେଣ୍ଡିଂ ଚାମ୍ପିୟନ ଭାରତ ୪-୩ ଗୋଲରେ ପାକିସ୍ତାନକୁ ହରାଇ ଦେଇଛି।
ପୂରା ମ୍ୟାଚ୍ରେ ଦୁଇ ଦଳ ମଧ୍ୟରେ କଡ଼ା ମୁକାବିଲା ଦେଖିବାକୁ ମିଳିଥିଲା। ପ୍ରଥମ କ୍ୱାର୍ଟରରେ ଭାରତକୁ ମିଳିଥିବା ପେନାଲ୍ଟି କର୍ନରକୁ ଗୋଲରେ ପରିଣତ କରିଥିଲେ ହରମନପ୍ରୀତ ସିଂ। କିନ୍ତୁ ଆଫ୍ରାଜଙ୍କ ଗୋଲ ବଳରେ ସ୍କୋର ଲାଇନ୍କୁ ବରାବର ରଖିଥିଲା ପାକିସ୍ତାନ। ଏହି ସ୍କୋର ଲାଇନ ପ୍ରଥମାର୍ଦ୍ଧ ପର୍ଯ୍ୟନ୍ତ ଜାରି ରହିଥିଲା। ତୃତୀୟ କ୍ୱାର୍ଟରରେ ଅବଦୁଲ ରାଣାଙ୍କ ଗୋଲ ପାକିସ୍ତାନକୁ ଆଣି ଦେଇଥିଲା ୨-୧ର ଅଗ୍ରଣୀ। ପରବର୍ତ୍ତୀ ମୁହୂର୍ତ୍ତରେ ବରୁନ କୁମାର ଏବଂ ଗୁରସାହିବଜିତ୍ ସିଂଙ୍କ ଗୋଲ ଯୋଗୁ ଟିମ୍ ଇଣ୍ଡିଆ ମ୍ୟାଚ୍କୁ ଫେରିଥିଲା। ଚତୁର୍ଥ କ୍ୱାର୍ଟରରେ ଭାରତ ପାଇଁ ଅନ୍ତିମ ଗୋଲ ସ୍କୋର କରିଥିଲେ ଆକାଶଦୀପ ସିଂ। ଶେଷ ଆଡ଼କୁ ପାକିସ୍ତାନ ଖେଳାଳିମାନେ ତୃତୀୟ ଗୋଲ କରିଥିଲେ ମଧ୍ୟ ତାହା ଭାରତକୁ ମ୍ୟାଚ୍ ଜିତିବାରୁ ରୋକି ପାରି ନ ଥିଲା।
