ମୁମ୍ବାଇ,୬ା୧୨(ପି.ଟି.):ବୁଧବାର ଭାରତ ଓ ଇଂଲଣ୍ଡ ମଧ୍ୟରେ ୩ ମ୍ୟାଚ୍ ବିଶିଷ୍ଟ ଟି୨୦ ସିରିଜ୍ର ପ୍ରଥମ ମ୍ୟାଚ୍ ମୁମ୍ବାଇର ଓ୍ବାଙ୍ଖେଡେ ଷ୍ଟାଡିୟମରେ ଖେଳାଯିବ। ଘରୋଇ ଦର୍ଶକଙ୍କ ସମ୍ମୁଖରେ ଇଂଲଣ୍ଡ ବିପକ୍ଷରେ ଖରାପ ରେକର୍ଡ ସୁଧାରିବାକୁ ପ୍ରୟାସ କରିବ ଭାରତ। ଚଳିତ ବର୍ଷ ଟି୨୦ ଭାରତ ପାଇଁ ବେଶ ସଫଳ ରହିଛି। ଭାରତ ବାଂଲାଦେଶ ବିପକ୍ଷ ସିରିଜକୁ ୨-୧ରେ ବିଜୟୀ ହୋଇଛି। ଅନ୍ୟ ପକ୍ଷରେ ଇଂଲଣ୍ଡ ୧-୨ରେ ଶ୍ରୀଲଙ୍କା ବିପକ୍ଷରେ ପରାଜିତ ହୋଇଛି। ଘରୋଇ ମାଟିରେ ଇଂଲଣ୍ଡ ବିପକ୍ଷରେ ଭାରତ ୯ଟି ଟି୨୦ ମ୍ୟାଚ୍ ଖେଳିଛି। ଏଥିରୁ ଦଳ ମାତ୍ର ୨ଟିରେ ବିଜୟୀ ହୋଇଥିବା ବେଳେ ଏହି ରେକର୍ଡ ସୁଧାରିବାକୁ ପ୍ରୟାସ କରିବ। ଏପରିକି ଉଭୟ ଦଳ ମଧ୍ୟରେ ଖେଳା ଯାଇଥିବା ଟି୨୦ ମ୍ୟାଚ୍ରେ ଭାରତ ଶେଷ ଥର ପାଇଁ ମାର୍ଚ୍ଚ ୨୦୨୧ରେ ବିଜୟୀ ହୋଇଥିଲା। ଏହା ପରଠାରୁ ଉଭୟ ଦଳ ୫ ଥର ମୁହାଁମୁହିଁ ହୋଇଛନ୍ତି। ଇଂଲଣ୍ଡ ଏଥି ମଧ୍ୟରୁ ୪ଟିରେ ବିଜୟୀ ହୋଇଥିବା ବେଳେ ଗୋଟିଏ ମ୍ୟାଚ୍ ଟାଇରେ ଶେଷ ହୋଇଛି। ଉଭୟ ଦଳ ଶେଷ ଟି୨୦ ବିଶ୍ୱକପରେ ସେମି ଫାଇନାଲିଷ୍ଟ ରହିଥିଲେ। ଆସନ୍ତା ସେପ୍ଟେମ୍ବର-ଅକ୍ଟୋବରରେ ଖେଳାଯିବାକୁ ଥିବା ଟି୨୦ ବିଶ୍ୱକପ ପୂର୍ବରୁ ଉଭୟ ଦଳ ପାଇଁ ଏହା ପ୍ରସ୍ତୁତିର ସୁଯୋଗ ମଧ୍ୟ ରହିବ। ଭାରତ ପକ୍ଷରୁ ଦୀପ୍ତି ଶର୍ମା ୧୬ ମ୍ୟାଚ୍ରୁ ୧୯ ଉଇକେଟ ନେଇଥିବା ବେଳେ ହରମନ୍ପ୍ରୀତ କୌର ୧୩ ମ୍ୟାଚ୍ରୁ ୩୨୩ ରନ୍ କରିଛନ୍ତି। ଉପ ଅଧିନାୟିକା ସ୍ମୃତି ମନ୍ଧାନା ସର୍ବାଧିକ ୩୬୯ ରନ୍ କରିଥିବା ବେଳେ ଜେମିମା ରୋଡ୍ରିଗୁଏଜ୍ ସ୍କୋର କରିଛନ୍ତି ୩୪୨ ରନ୍। ଚଳିତ ସିରିଜ୍ ପାଇଁ ଭାରତ ୩ ଜଣ ନୂଆ ସ୍ପିନରଙ୍କୁ ଦଳରେ ସାମିଲ କରିଛି।
