ନୂଆଦିଲ୍ଲୀ, ୧୦।୭: ଦେଶରେ କୋଭିଡ୍ ସଂକ୍ରମଣ ହ୍ରାସ ପାଇବା ପରେ ସରକାର କଟକଣା କୋହଳ କରିଦେବାରୁ ଉତ୍ତରାଖଣ୍ଡ ଓ ହିମାଚଳପ୍ରଦେଶର ବିଭିନ୍ନ ପର୍ଯ୍ୟଟନ ସ୍ଥଳରେ ଲୋକଙ୍କ ପ୍ରବଳ ଗହଳି ଦେଖିବାକୁ ମିଳୁଛି। ନୈନିତାଲ, ମସୁରୀ, ମନାଲି ଆଦି ଲୋକପ୍ରିୟ ପର୍ଯ୍ୟଟନ ସ୍ଥଳକୁ ଲକ୍ଷାଧିକ ଲୋକ ଆସୁଥିବାବେଳେ କୋଭିଡ୍ କଟକଣାକୁ ସମସ୍ତେ ଭୁଲିଯାଇଥିବା ଦେଖାଯାଇଛି। ଭୂତାଣୁ ପୁଣି ଥରେ ଆସି ସଂକ୍ରମଣ କରୁ ଏଥିପାଇଁ ଆମେ ଖୋଲା ଆମନ୍ତ୍ରଣ କରୁଛେ ବୋଲି ସ୍ବାସ୍ଥ୍ୟ ମନ୍ତ୍ରଣାଳୟ ଯୁଗ୍ମ ସଚିବ ଲବ୍ ଅଗ୍ରଓ୍ବାଲ୍ ଶୁକ୍ରବାର ଏକ ଖବରଦାତା ସମ୍ମିଳନୀରେ କହିଛନ୍ତି। ଏଭଳି ଗହଳି ତୃତୀୟ ଲହର ଆଣିବାରେ ସହାୟକ ହେବ ବୋଲି କୁହାଯାଉଛି।
ଦେଶର ଅର୍ଦ୍ଧାଧିକ କରୋନା ସଂକ୍ରମିତ ଦୁଇଟି ରାଜ୍ୟ ମହାରାଷ୍ଟ୍ର ଓ କେରଳରେ ରହିିଛି। ଦ୍ୱିତୀୟ ଲହର ସମ୍ପୂର୍ଣ୍ଣ ଶେଷ ହୋଇ ନ ଥିବାରୁ କୋଭିଡ୍ ନିୟମ ଉଲ୍ଲଂଘନ ନ କରିବାକୁ ମନ୍ତ୍ରଣାଳୟ ପରାମର୍ଶ ଦେଇଛି। ମହାରାଷ୍ଟ୍ରର ୧୫ ଏବଂ କେରଳର ୧୪ ଜିଲା ଚିନ୍ତାର କାରଣ ପାଲଟିଛି।
ଅଗ୍ରଓ୍ବାଲ କହିଥିଲେ, ଦୈନିକ ସଂକ୍ରମଣ କ୍ରମାଗତ ଭାବେ ହ୍ରାସ ପାଉଛି। ତେବେ ନୂଆ ମାମଲାର ୮୦ ପ୍ରତିଶତ ଦେଶର ୯୦ଟି ଜିଲାରୁ ଆସୁଛି। ବ୍ରିଟେନରେ ୟୁରୋ କପ ୨୦୨୧ ସେମିଫାଇନାଲ ଆୟୋଜନ କାରଣରୁ ସେଠାରେ ସଂକ୍ରମଣ ପୁଣିଥରେ ବୃଦ୍ଧି ପାଇଛି। ସେହିପରି ରୁଷିଆ ଏବଂ ବାଂଲାଦେଶରେ ମଧ୍ୟ ସଂକ୍ରମଣ ବଢ଼ୁଛି। ତେଣୁ କୋଭିଡ୍ ସତର୍କତା ପାଳନ କରିବା ଗୁରୁତ୍ୱପୂର୍ଣ୍ଣ। ଶୁକ୍ରବାର ସକାଳ ସୁଦ୍ଧା ୨୪ ଘଣ୍ଟା ମଧ୍ୟରେ ୪୩,୩୯୩ ସଂକ୍ରମିତ ଚିହ୍ନଟ ହୋଇଛନ୍ତି। ସକ୍ରିୟ ମାମଲା ସଂଖ୍ୟା ୪,୫୮,୭୨୭କୁ ହ୍ରାସ ପାଇଛି।
