ବାୟୁ ପ୍ରଦୂଷଣ ରୋକିବା ଲାଗି ବିଭିନ୍ନ ଟେକ୍ନୋଲୋଜିର ବୈଦ୍ୟୁତିକ ଗାଡ଼ି ବଜାରକୁ ଆସୁଛି। ହେଲେ ଗାଡ଼ି ଚାଲିବା ସମୟରେ ବାୟୁକୁ ସ୍ବଚ୍ଛ କଲା ଭଳି କାର୍ କଥା କେବେ ଶୁଣିଛନ୍ତି କି? ଏମିତିକା କାର୍ ନିର୍ମାଣ କରିଛନ୍ତି ଲକ୍ଷ୍ନୌର ୪ ଜଣ ସ୍କୁଲ ପିଲା। ବିରାଜ, ଗର୍ବିତ, ଶ୍ରେୟାଂଶ ଏବଂ ଆର୍ଯ୍ୟଭ ଏକ ବିଦ୍ୟୁତ୍ଚାଳିତ କାର୍ ନିର୍ମାଣ କରିଛନ୍ତି, ଯାହା ଚାଲିବାବେଳେ ୬ ଫୁଟ ପରିଧି ମଧ୍ୟରେ ବାହାରର ବାୟୁକୁ ସ୍ବଚ୍ଛ କରିପାରୁଛି। ସେମାନେ କାର୍ରେ ଏକ ସ୍ବତନ୍ତ୍ର ଟେକ୍ନୋଲୋଜି ଡଷ୍ଟ ଫିଲ୍ଟ୍ରେଶନ ସିଷ୍ଟମ ଖଞ୍ଜିଛନ୍ତି, ଯାହା ଏୟାର ପ୍ୟୁରିଫାୟର ଭାବେ କାମ କରୁଛି। ସେମାନେ ନିଜକୁ ‘ଫୋର୍ ଏଭର୍’ ଭାବେ ପରିଚୟ ସୃଷ୍ଟି କରିଛନ୍ତି। ସେମାନେ ୨୫୦ ଦିନର ପ୍ରୟାସରେ କାର୍ ନିର୍ମାଣରେ ସଫଳତା ପାଇଛନ୍ତି। ପିଲାମାନଙ୍କ ପରିବାର ଏଥପାଇଁ ଆର୍ଥିକ ସାହାଯ୍ୟ ଯୋଗାଇ ଦେଇଛନ୍ତି। ଉକ୍ତ କାର୍ ଘଣ୍ଟାକୁ ୭୦ରୁ ୯୦ କି.ମି. ଯାଇପାରିବ। ଏହା ପରୀକ୍ଷଣ ଓ ସ୍ବୀକୃତି ଅପେକ୍ଷାରେ ରହିଛି। ଟେସ୍ଲା କମ୍ପାନୀ ଏବେ ଯେଉଁ ବୈଦ୍ୟୁତିକ କାର୍ ନିର୍ମାଣ କରିଛି ତାହାର ମୂଲ୍ୟ ପ୍ରାୟ ୨ କୋଟି ଟଙ୍କା ହୋଇପାରେ। କିନ୍ତୁ ଏମାନେ ତାହାଠାରୁ ଶସ୍ତା କାର୍ ନିର୍ମାଣ କରିବାକୁ ଯୋଜନା କରୁଛନ୍ତି।
