ଦିଲ୍ଲୀ ବିଶ୍ୱବିଦ୍ୟାଳୟରେ ପଢ଼ୁଛନ୍ତି ଏବଂ ସମୟ ବାହାର କରି ବୁଲାକୁକୁରଙ୍କୁ ଖାଇବାକୁ ଦେବା ସହ ଆହତ କୁକୁରଙ୍କୁ ଉଦ୍ଧାର କରୁଛନ୍ତି ଯଶଦୀପ କୌର ଏବଂ ଇଶାନ ଜୋଶୀ। ଏବେ ସୁଦ୍ଧା ସେମାନେ ୧୦୦୦ରୁ ଊର୍ଦ୍ଧ୍ୱ କୁକୁରଙ୍କୁ ଉଦ୍ଧାର କରିସାରିଲେଣି। ପ୍ରଥମେ ସେମାନେ ୨୦ଟି କୁକୁରଙ୍କୁ ନିଜେ ରୋଷେଇ କରି ଖାଇବାକୁ ଦେବା ଆରମ୍ଭ କରିଥିଲେ। ପରେ ୨୦୨୦ରେ ‘ପରିବାର’ ସଂସ୍ଥା ଗଠନ କରି ତା’ ମାଧ୍ୟମରେ ଲକ୍ଷ୍ମୀବାଈ ନଗରରେ ୨୦୦ରୁ ଅଧିକ କୁକୁରଙ୍କୁ ପ୍ରତିଦିନ ଖାଇବାକୁ ଦେଉଛନ୍ତି। ଏଥିପାଇଁ ସେମାନେ ରୋଷେଇ ବ୍ୟବସ୍ଥା କରିବା ସହ ଜଣେ ରୋଷେୟା ନିଯୁକ୍ତ କରିଛନ୍ତି। ଅପରାହ୍ନରେ ଖାଦ୍ୟ ପ୍ରସ୍ତୁତ କରିବା ପରେ ରାତିରେ କୁକୁରଙ୍କୁ ଖାଇବାକୁ ଦିଆଯାଉଛି। ଏହି କାର୍ଯ୍ୟରେ ସେମାନଙ୍କୁ ସ୍ଥାନୀୟ ଅଞ୍ଚଳର ଶ୍ରମିକମାନେ ସହଯୋଗ କରୁଛନ୍ତି। ଦିନକୁ ୧୮ରୁ ୨୦ କେ.ଜି. ଚିକେନ୍ ଏବଂ ୨୫ରୁ ୩୦ କେ.ଜି. ଚାଉଳ ରୋଷେଇ ହେଉଛି। ଏ ବାବଦରେ ସମସ୍ତ ଖର୍ଚ୍ଚ ଯଶଦୀପ ଓ ଇଶାନ ବହନ କରୁଛନ୍ତି। ଅନ୍ୟମାନେ ବି ଏହି ଦୁଇ ଜଣଙ୍କୁ ଆର୍ଥିକ ସାହାଯ୍ୟ କରୁଛନ୍ତି। ‘ପରିବାର’ ମାଧ୍ୟମରେ ମଧ୍ୟ ୧୧୩ ବୁଲାକୁକୁରଙ୍କୁ ପୋଷ୍ୟ ଭାବେ ଗ୍ରହଣ କରିଛନ୍ତି। ଖୁବ୍ଶୀଘ୍ର ପ୍ରାଣୀମାନଙ୍କ ପାଇଁ ଏକ ଆଶ୍ରୟସ୍ଥଳୀ ଖୋଲିବା ସହ ଦିଲ୍ଲୀର ଅନ୍ୟ ସ୍ଥାନଗୁଡ଼ିକରେ ଅଧିକ କୁକୁରଙ୍କୁ ଖାଇବାକୁ ଦେବା ଲାଗି ଯୋଜନା କରିଛନ୍ତି ବୋଲି ଇଶାନ କହିଛନ୍ତି। କୁକୁରଙ୍କ ବ୍ୟତୀତ ଇଶାନ ଓ ଯଶଦୀପ ପ୍ରତି ସପ୍ତାହରେ ଦୁଇ ଦିନ ମାଙ୍କଡ଼ ଓ ବୁଲା ଗୋରୁଙ୍କୁ ଖାଇବାକୁ ଦେଉଛନ୍ତି।
