ସେ ମୁସଲମାନ, ପୁଣି ଦିବ୍ୟାଙ୍ଗ; ତଥାପି ଭାରତନାଟ୍ୟମ୍ର ଜଣେ ଶ୍ରେଷ୍ଠ ଡ୍ୟାନ୍ସର। ସେହି ସଫଳ କଳାକାର ହେଉଛନ୍ତି ଦିଲ୍ଲୀର ହୁସେନ। ହ୍ବିଲ୍ଚେୟାର ତାଙ୍କର ଶାହା ହେଲେ ମଧ୍ୟ ବହୁ ଘାତପ୍ରତିଘାତ ମଧ୍ୟରେ ହୁସେନ ନାଚ ଶିଖି ଏବେ ୯୦ରୁ ଅଧିକ ଲୋକଙ୍କୁ ନାଚ ଶିଖାଉଛନ୍ତି ଓ ସେମାନେ ମଧ୍ୟ ସମସ୍ତେ ଦିବ୍ୟାଙ୍ଗ। କେବଳ ଭାରତନାଟ୍ୟମ୍ ନୁହେଁ, ବରଂ ସାଲ୍ସା ନୃତ୍ୟଗୁରୁ ଭାବେ ତାଙ୍କର ବେଶ୍ ଖ୍ୟାତି ରହିଛି। ୨୦୧୬ରେ ‘ଓ୍ବି ଆର୍ ଓ୍ବାନ୍’ ଡ୍ୟାନ୍ସ ଏକାଡେମୀ ଗଠନ କରି ସେ ନୃତ୍ୟ ଶିକ୍ଷାଦେବା ଜାରି ରଖିଛନ୍ତି। ତାଙ୍କ ପାଖରେ ୮ରୁ ଆରମ୍ଭ କରି ୬୫ ବର୍ଷ ବୟସ ଯାଏ ଲୋକେ ଭାରତନାଟ୍ୟମ୍ ଓ ସାଲ୍ସା ଶିକ୍ଷା କରୁଛନ୍ତି। ୩୦ ବର୍ଷୀୟ ହୁସେନ କହନ୍ତି, ପଢ଼ିବା ଓ ନୃତ୍ୟ ଶିକ୍ଷା କରିବାରେ ତାଙ୍କୁ ଏକ ସଂଘର୍ଷମୟ ସମୟ ଦେଇ ଗତିକରିବାକୁ ହୋଇଛି। ଜନ୍ମର ବର୍ଷେ ଭିତରେ ସେ ପୋଲିଓ ଆକ୍ରାନ୍ତ ହୋଇଥିଲେ। ସେ ଫିଜିକାଲ ଓ୍ବିଥ୍ ଡିଜାବିଲିଟି (ପିଡବ୍ଲ୍ୟୁଡି) ପିଲାମାନଙ୍କ ସହ ଶିକ୍ଷା ଲାଭ କରି ଭାରତନାଟ୍ୟମ୍ ମଧ୍ୟ ଶିକ୍ଷା କରିଥିଲେ। ପରେ ବିଭିନ୍ନ କାର୍ଯ୍ୟକ୍ରମରେ ତାହା ପ୍ରଦର୍ଶନ କରିବା ସହ ନିଜେ ‘ଓ୍ବି ଆର୍ ଓ୍ବାନ୍’ ଡ୍ୟାନ୍ସ ଏକାଡେମୀ ଗଠନ କରି ଅନ୍ୟ ଦିବ୍ୟାଙ୍ଗଙ୍କୁ ଡ୍ୟାନ୍ସ ପ୍ରତି ଆକୃଷ୍ଟ କରିପାରିଛନ୍ତି। ସେ ଓ ତାଙ୍କ ସାଥୀ ଛାତ୍ରମାନେ ଏବେ ସୁଦ୍ଧା ୮ଟି ଦେଶରେ ୧,୫୦୦ରୁ ଊର୍ଦ୍ଧ୍ୱ ଶୋ’ରେ ଭାଗ ନେଇଛନ୍ତି। ହ୍ବିଲ୍ଚେୟାରରେ ତାଙ୍କର ଡ୍ୟାନ୍ସ ପ୍ରଦର୍ଶନ ବେଶ୍ ଆକର୍ଷଣୀୟ ହେଉଛି। ସେ ମଧ୍ୟ ହ୍ବିଲ୍ଚେୟାରରେ ମଣିପୁରୀ ସମରକଳା ଏବଂ ଯୋଗ ପ୍ରଦର୍ଶନ କରିବାରେ ଧୁରନ୍ଧର। ଦିଲ୍ଲୀ ବ୍ୟତୀତ ଭାରତର ବିଭିନ୍ନ ସହରରେ ଅଧିକ ଡ୍ୟାନ୍ସ ସେଣ୍ଟର ଖୋଲି ଦିବ୍ୟାଙ୍ଗମାନଙ୍କୁ ଭାରତନାଟ୍ୟମ୍ ଶିକ୍ଷା ଦେବା ଲାଗି ଯୋଜନା କରିଛନ୍ତି।
