କେରଳର ଏକ ଓପନ୍ ଜେଲ ବା ମୁକ୍ତାକାଶ କାରାଗାର ଚାଷରୁ ବର୍ଷକୁ ପାଖାପାଖି ୨ କୋଟି ଟଙ୍କା ରୋଜଗାର କରିବା କିଛି କମ୍ କଥା ନୁହେଁ। ଥିରୁଭାନନ୍ତପୁରମ୍ ସହରଠାରୁ ୩୫ କି.ମି. ଦୂର ନେତୁକାଲଥେରିସ୍ଥିତ ମୁକ୍ତାକାଶ କାରାଗାରର ୩୯୦ ଜଣ ଅନ୍ତେବାସୀ ଚାଷରେ ଲାଗିଛନ୍ତି। ୧୯୬୨ରେ ପ୍ରତିଷ୍ଠା କରାଯାଇଥିବା ଏହି ଜେଲରେ ଲକ୍ଅପ୍ ବଦଳରେ ଡର୍ମିଟୋରୀ ସିଷ୍ଟମ୍ ରହିଛି। ଏଠାରେ ବିଚାରାଧୀନ କଏଦୀଙ୍କ ସହ ୨୫୦ରୁ ଊର୍ଦ୍ଧ୍ୱ କଏଦୀ ଆଜୀବନ କରାଦଣ୍ଡ ଭୋଗୁଛନ୍ତି। କାରାଗାର ଚାରିପାଖରେ ଥିବା ୪୭୪ ଏକର ଜମି ସେମାନେ ଚାଷ କରୁଛନ୍ତି। ୨୦୦ ଏକର ଜମିରେ ରବର ଗଛ ଲଗାଇଛନ୍ତି। ୨୦ ଏକରରେ ପରିବା ଚାଷ କରିବା ସହ ଏକ ଡାଏରି ଫାର୍ମ, ଛେଳି ଫାର୍ମ, କୁକୁଡା ଫାର୍ମ ରହିଛିି। ସେମାନେ ଏକ ଚେକ୍ ଡ୍ୟାମ୍ ନିର୍ମାଣ କରି ଜଳସେଚନ ସୁବିଧା କରିବା ସହ ସେଥିରେ ମାଛ ଚାଷ ବି କରୁଛନ୍ତି। ରାଜ୍ୟର ସବୁ ଜିଲାରୁ କଏଦୀମାନଙ୍କୁ ଚୟନ କରାଯାଇ ଏହି ଜେଲରେ ସେମାନଙ୍କୁ ଚାଷରେ ଲଗାଯାଉଛି। ସେମାନଙ୍କ ଉତ୍ପାଦିତ ଶସ୍ୟ ଓ ପନିପରିବା ଜେଲ ମେସ୍ରେ ଲାଗିବା ପରେ ବଳକାକୁ ବିକ୍ରି କରି ବର୍ଷକୁ ୧୦ ଲକ୍ଷ ଟଙ୍କା ରୋଜଗାର କରୁଛନ୍ତି। ୨୦୦ ଏକର ରବର ଚାଷରୁ ବର୍ଷକୁ ୧ କୋଟି ଟଙ୍କା ମିଳୁଛି। ସବୁ ପ୍ରକାର ଚାଷରୁ ବର୍ଷକୁ ପାଖାପାଖି ୨ କୋଟି ଟଙ୍କା ମିଳୁଛି।
