କେରଳ ଏର୍ନାକୁଲମ୍ ନିବାସୀ ଇକୋ-ଇନୋଭେଟର ଲକ୍ଷ୍ମୀ ମେନନ ‘ପିୟୋର ଲିଭିଂ’ ସଂସ୍ଥା ମାଧ୍ୟମରେ ବର୍ଜ୍ୟବସ୍ତୁରୁ ବିଭିନ୍ନ ବ୍ୟବହାର ଉପଯୋଗୀ ସାମଗ୍ରୀ ତିଆରି କରୁଛନ୍ତି। ପ୍ରଥମେ ବର୍ଜ୍ୟ କାଗଜରୁ କଲମ ତିଆରି କରିବା ପରେ ଏବେ ପର୍ସନାଲ ପ୍ରୋଟେକ୍ଟିଂ ଇକ୍ୟୁପିମେଣ୍ଟ (ପିପିଇ) କିଟ୍ ତିଆରିରୁ ବାହାରୁଥିବା ବର୍ଜ୍ୟରୁ ଗଦି ପ୍ରସ୍ତୁତ କରୁଛନ୍ତି। ଏହାର ନାମ ଦେଇଛନ୍ତି ଶଯ୍ୟା। ବର୍ଜ୍ୟ ପରିଚାଳନା ସହ କୋଭିଡ୍-ସେଣ୍ଟରରେ ଗଦିର ଆବଶ୍ୟକତା ପୂରଣ କରିବା ଲକ୍ଷ୍ୟରେ ସେ ଏହା କରିଛନ୍ତି। ଏହି ଶଯ୍ୟାର ଲମ୍ବ ୬ ଫୁଟ ଓ ଚଉଡା ୨.୫ ଫୁଟ। ବର୍ଜ୍ୟଗୁଡିକୁ ପରସ୍ପର ସହ ବାନ୍ଧି ବିନା ସିଲେଇରେ ଏହି ଗଦି ତିଆରି କରାଯାଉଛି। ଏହା ଓ୍ବାଟର ପ୍ରୁଫ୍। ସଫା କରିହେବ। କେରଳରେ (ପିପିଇ)ଗାଉନ ତିଆରି କରୁଥିବା କେତେଜଣ ଟେଲର୍ଠାରୁ ବର୍ଜ୍ୟ ସଂଗ୍ରହ କରୁଛନ୍ତି। ତାଙ୍କ ଘର ପାଖରେ ଚାକିରି ହରାଇଥିତ୍ବା ୧୦ ଜଣ ମହିଳାଙ୍କୁ ଗଦି ତିଆରି ପାଇଁ ନିଯୁକ୍ତି ଦେଇଛନ୍ତି। ଏହାକୁ ବଢ଼ାଇବା ଲାଗି ଯୋଜନା ବି କରୁଛନ୍ତି। ଏବେ ଜଣେ ମହିଳା ଦିନକୁ ୩୦୦ ଟଙ୍କା ମଜୁରି ନେଉଛନ୍ତି ଓ ଗୋଟିଏ ଗଦି କରୁଛନ୍ତି। ସେ ଗଦି ବାବଦକୁ ମଜୁରି ଖର୍ଚ୍ଚ ୩୦୦ ଟଙ୍କା ନେଇ କେରଳର ସବୁ ପଞ୍ଚାୟତକୁ ଦେବା ପାଇଁ ସ୍ଥିର କରିଛନ୍ତି। ପ୍ରଥମେ ଆମ୍ବାଲୁର ପଞ୍ଚାୟତ ତାଙ୍କ ଠାରୁ ୫ଟି ଗଦି ନେଇଛିି। ୯ ଟନ୍ ବର୍ଜ୍ୟରୁ ୨,୪୦୦ଟି ଗଦି ତିଆରି କରାଯାଇପାରିବ ବୋଲି କହନ୍ତି ଲକ୍ଷ୍ମୀ। ଗଦିକୁ ତଳେ ଶୋଉଥିବା ଗରିବମାନଙ୍କୁ ବାଣ୍ଟିବା ଲାଗି ସେ ଲକ୍ଷ୍ୟ ରଖିଛନ୍ତି।
