ଦେଶୀ ଗଛର ସୁରକ୍ଷା କରୁଛନ୍ତି ମହାରାଷ୍ଟ୍ରର ଅନନ୍ତ ଭିକାଜି ତୟାଡେ। ସେ ୩୫୦ କିସମର ଦେଶୀ ଗଛ ପୁନରୁଦ୍ଧାର କରିପାରିଛନ୍ତି। ଅନନ୍ତ ୧୯୭୭ରେ ବିଦର୍ଭ ଅଞ୍ଚଳର ଫୁଲି ଗାଁରେ ଜନ୍ମଗ୍ରହଣ କରିଥିଲେ। ବଲ୍ଧାନା ଜିଲାର ଏହି ଗାଁର ଗ୍ରାମବାସୀ କୃଷି ଉପରେ ନିର୍ଭର କରିଥାନ୍ତି। ସେମାନେ ଉତ୍ପାଦନ ବୃଦ୍ଧି କରିବା ଲକ୍ଷ୍ୟରେ ଦେଶୀ ଗଛ ସବୁ କାଟି ଦେଇଥିଲେ, ଯାହାର ପୁନରୁଦ୍ଧାର କରିବା ଲାଗି ଅନନ୍ତ କାର୍ଯ୍ୟ କରୁଛନ୍ତି। ୨୦୦୮ରେ ସେ ପୁଣେସ୍ଥିତ ‘୧୪ ଟ୍ରି ଫାଉଣ୍ଡେଶନ’ରେ କାର୍ଯ୍ୟକରି ପରିସଂସ୍ଥା ପୁନରୁଦ୍ଧାର ବିଷୟରେ ଅଭିଜ୍ଞତା ହାସଲ କରିଥିଲେ। ପରେ ସେ ‘୮ ନେଚୁରାଲ୍ସ’ ସଂସ୍ଥା ଗଠନ କରି ୨୦୧୮ରେ ଭିଟେଲ ଗାଁରେ ଦୁଇଜଣ କର୍ମଚାରୀଙ୍କୁ ନେଇ ଏକ ନର୍ସରି କରିଥିଲେ। ପରେ ସେ ଦେଶୀ ଗଛର ମଞ୍ଜି ସଂଗ୍ରହ କରି ଫୁଲି ଓ କହ୍ନଓ୍ବୋଡ଼ି ଗାଁରେ ଆଉ ଦୁଇଟି ନର୍ସରି କରିଛନ୍ତି। ତିନୋଟି ନର୍ସରିରେ ୬ ଲକ୍ଷରୁ ଊର୍ଦ୍ଧ୍ୱ ଦେଶୀ ଗଛର ଚାରା ରହିଛି। ଏବେ ୩୫୦ ପ୍ରଜାତିର ଦେଶୀ ଗଛ ସଂରକ୍ଷିତ କରିପାରିଥିବାବେଳେ ସିଡ୍ ବ୍ୟାଙ୍କରେ ୨୫୦ରୁ ଅଧିକ କିସମର ଦେଶୀମଞ୍ଜି ରଖାଯାଇଛି।
