ଧୁମ୍ଧାମରେ ବାହାଘର। ତା’ ପୁଣି ଦୁଇଟି ରାଜ୍ୟର କୁକୁରଙ୍କର। ଏକଥା ହୁଏତ ଅନେକଙ୍କୁ ଅଜବ ମନେ ହୋଇପାରେ, କିନ୍ତୁ ଏମିତି ଏକ ବାହାଘର ହୋଇଛି ମଧ୍ୟପ୍ରଦେଶର ପୁଛିକରଗୁବା ଗାଁରେ। ଇନ୍ଦ୍ର ଦେବତାଙ୍କୁ ଖୁସି କରି ଗାଁର ଜଳକଷ୍ଟ ଦୂର କରିବା ନିମନ୍ତେ ଗାଁ ଲୋକେ କୁକୁରମାନଙ୍କର ଏଭଳି ଏକ ଅଜବ ବାହାଘର କରିଛନ୍ତି। ମଧ୍ୟପ୍ରଦେଶର ପୁଛିକରଗୁବା ଗାଁରେ ମୁଲଚନ୍ଦ ନାୟକଙ୍କର ରଶ୍ମି ନାମକ ଏକ ମାଈ କୁକୁର ସହିତ ଉତ୍ତରପ୍ରଦେଶର ଅଶୋକ ଯାଦବଙ୍କର କୁକୁର ଗୋଲୁ ସହିତ ବାହାଘର ହୋଇଥିଲା। ଦୁଇ କୁକୁରଙ୍କର ବିବାହ ଧୁମଧାମରେ ହୋଇଥିଲା। ମୁଲଚନ୍ଦ କନ୍ୟାପକ୍ଷ ହିସାବରେ ଯଥାରୀତି ହିନ୍ଦୁ ପରମ୍ପରାରେ ବିବାହ କରାଇ ଗାଁର ୮୦୦ ଲୋକଙ୍କୁ ଭୋଜି ଦେଇଥିଲେ। ଏହାପରେ ରଶ୍ମିକୁ ବିଦା କରିବା ସମୟରେ ସେ ଓ ତାଙ୍କ ପରିବାର ଲୋକେ କାନ୍ଦି ପକାଇଥିଲେ। ଏଭଳି ଏକ ଭିନ୍ନ ଧରଣର ବିବାହକୁ ନେଇ ଏବେ ଚାରିଆଡ଼େ ଚର୍ଚ୍ଚା ହେଉଛି। ଗାଁ ଲୋକଙ୍କ ବିଶ୍ୱାସ କି କଥା କହି ପାରୁ ନ ଥିବା ପଶୁଙ୍କର ବିବାହ କରାଇଲେ ଇନ୍ଦ୍ର ଦେବତା ଖୁସି ହୁଅନ୍ତି ଏବଂ ଜଳ ଦାନ କରିଥାନ୍ତି। ମଧ୍ୟପ୍ରଦେଶର ପୁଛିକରଗୁବା ଗାଁରେ କିଛିଦିନ ଧରି ଜଳର ଅଭାବ ଦେଖାଦେଇଛି। ଲୋକେ ଏହି ପାଣି ସମସ୍ୟା ଦୂର କରିବା ପାଇଁ କୁକୁରଙ୍କର ବିବାହ କରାଇଥିଲେ।
