ସମ୍ପ୍ରତି ବିନା କସମେଟିକ୍ସରେ ବାହାରକୁ ବାହାରିବା ଲାଗି କେହି ପ୍ରାୟ ପସନ୍ଦ କରୁନାହାଁନ୍ତି। କିନ୍ତୁ କସମେଟିକ୍ସ ଯେ ଚେହେରା ଉପରେ ଖରାପ ପ୍ରଭାବ ପକାଇଥାଏ ଏକଥା ଅନେକକୁ ଜଣା ନ ଥାଏ। କସମେଟିକ୍ସ ତଥା ଲୋଶନରେ କ୍ଷତିିକାରକ ରାସାୟନିକ ପଦାର୍ଥ ମିଶି ରହିଥାଏ। ଅଧିକାଂଶ ମହିଳା ବୟସ ଲୁଚାଇବା ପାଇଁ ଆଣ୍ଟି ଏଜିଂ କ୍ରିମ୍ କିମ୍ବା ଏହି ପ୍ରକାରର ଅନ୍ୟ କିଛି ବ୍ୟବହାର କରିଥାନ୍ତି। ଫଳରେ ସୁନ୍ଦରଦେଖା ଯିବା ପାଇଁ ଅଜାଣତରେ କେତେକ ନିଜର ପ୍ରାକୃତିକ ସୌନ୍ଦର୍ଯ୍ୟ ହରାଇ ବସିଥାନ୍ତି। ଏସବୁ କସମେଟିିକ୍ସ୍ସରେ ଥିବା ରାସାୟନିକ ପଦାର୍ଥ ପ୍ରଭାବ ଯୋଗୁ ହୋଇଥାଏ। ଆଣ୍ଟି ଏଜିଂ କ୍ରିମ୍ରେ ରହିଛି ରେଟିନାଲ୍ ନାମକ କେମିକାଲ୍। ଗର୍ଭବତୀ ମହିଳାମାନେ ରେଟିନାଲ୍ଯୁକ୍ତ ପ୍ରଡକ୍ଟର ବ୍ୟବହାରଠାରୁ ନିଜକୁ ଦୂରେଇ ରଖିବା ଜରୁରୀ। ରେଟିନାଲ୍ଯୁକ୍ତ କ୍ରିମ୍ ବ୍ୟବହାର କରିବା ଦ୍ୱାରା ତ୍ୱଚା ସୂର୍ଯ୍ୟକିରଣ ପ୍ରତି ସମ୍ବେଦନଶୀଳ ହୋଇଯାଏ। ଫଳରେ ସାରାଜୀବନ ସନସ୍କ୍ରିନ୍ ଲୋଶନ ବ୍ୟବହାର କରିବାକୁ ପଡିଥାଏ। ତେଣୁ ଯେଉଁ କ୍ରିମ୍ରେ ହାଇଡ୍ରୋକୁଇନାନ୍ ରାସାୟନିକ ପଦାର୍ଥ ରହିଛି ତାହା ବ୍ୟବହାର କରିବା ଅନୁଚିତ। ଏହା କ୍ୟାନସର କାରକ ହୋଇଥାଏ। ଏହି ରାସାୟନ ଓକ୍ରୋନୋସିସ୍ ନାମକ ତ୍ୱଚା ରୋଗର କାରଣ ମଧ୍ୟ ପାଲଟିଥାଏ। ଏହି ରୋଗରେ ତ୍ୱଚା ବିକୃତ ହୋଇଯାଇଥାଏ। ଶରୀରକୁ ପରିଷ୍କାର କରିବା ପାଇଁ ବ୍ୟବହାର କରାଯାଉଥିବା କ୍ଲିନଜର୍ସରେ ଅଧିକ ମାତ୍ରାରେ ମିନେରାଲ୍ ଅଏଲ୍ ଥାଏ। ଏହା ତ୍ୱଚାର ଲୋମକୂପକୁ ବନ୍ଦ କରିଦିଏ। ତେଣୁ ପ୍ରସାଧନ ସାମଗ୍ରୀ ବ୍ୟବହାର ସମୟରେ ସତର୍କ ରହିବା ଆବଶ୍ୟକ।
