ଜଗତସିଂହପୁର,୬ା୯(ପ୍ରମୋଦ କୁମାର ନାୟକ): ରାଜ୍ୟ ସରକାର ଲୋକାଭିମୁଖୀ ସୁଭଦ୍ରା ଯୋଜନା କାର୍ଯ୍ୟକାରୀ କରିଛନ୍ତି। ଏନେଇ ଆଧାର କେନ୍ଦ୍ର, ଜନସେବା କେନ୍ଦ୍ର (ଜେଏସ୍କେ) ଓ ମୋ ସେବା କେନ୍ଦ୍ର (ଏମ୍ଏସ୍କେ) ଆଦି ବିଭିନ୍ନ ସ୍ଥାନରେ ଭିଡ ଦେଖିବାକୁ ମିଳୁଛି। କେତେବେଳେ ସର୍ଭର ଡାଉନ ତ କେତେବେଳେ ଅନ୍ୟାନ୍ୟ ସମସ୍ୟା ଯୋଗୁ ସେବା ସଂସ୍ଥାଗୁଡିକ ସମୟ ନେଉଛନ୍ତି। ଏଥିଯୋଗୁ ଲୋକେ ବ୍ୟସ୍ତ ହେବା ଉଚିତ ନୁହେଁ। ଯୋଜନାରେ ସାମିଲ ହେବା ପାଇଁ ଇ-କେୱାଇସି ବ୍ୟବସ୍ଥା ଅଛି। ଆଧାର ଅଥେଣ୍ଟିକେଶନ୍ ପାଇଁ ମୋବାଇଲ ଲିଙ୍କ୍ କରାଯାଉଛି। କିନ୍ତୁ ଏହା ଏକମାତ୍ର ମାଧ୍ୟମ ନୁହେଁ। ମୋବାଇଲ ଲିଙ୍କ୍ ଥିଲେ ଓଟିପି ଆବଶ୍ୟକ ପଡେ। ବିନା ମୋବାଇଲ ନମ୍ବରରେ ଅର୍ଥାତ୍ ଆଇରିସ୍ (ଆଖିର ବୃତ୍ତାକାର ପରଦା), ଫେସ୍ ଅଥେଣ୍ଟିକେଶନ୍ (ମୁହଁର ସତ୍ୟତା) ଏବଂ ବାୟୋମେଟ୍ରିକ/ଫିଙ୍ଗର ପ୍ରିଣ୍ଟ (ଆଙ୍ଗୁଳି ଛାପ) ମାଧ୍ୟମରେ ମଧ୍ୟ ଆଧାର ଅଥେଣ୍ଟିକେଣ୍ଟେଡ୍ କି ନୁହେଁ ଜାଣିହେବ। ଏହି ସମୟରେ ଆବେଦନକାରୀ ନିଜେ ଉପସ୍ଥିତ ରହିିବେ।
ଗୁରୁବାର ଜିଲାପାଳଙ୍କ କାର୍ଯ୍ୟାଳୟ ପରିସର ସଦ୍ଭାବନା ସଭାଗୃହରେ ସୁଭଦ୍ରା ଯୋଜନା ଉପରେ ଅନୁଷ୍ଠିତ ଖବରଦାତା ସମ୍ମିଳନୀରେ ଜିଲାପାଳ ଜେ. ସୋନାଲ ଏବଂ ସୁଭଦ୍ରା ଯୋଜନା ଜିଲା ନୋଡାଲ ଅଫିସର ତଥା ଜଗତ୍ସିଂହପୁର ଅତିରିକ୍ତ ଜିଲାପାଳ (ରାଜସ୍ବ) ସମ୍ବିତ କୁମାର ରାଉତ ଏହା କହିଛନ୍ତି। ସେମାନେ କହିିଥିଲେ, ଜାତୀୟ ଖାଦ୍ୟ ସୁରକ୍ଷା ଅଧିନିୟମ (ଏନ୍ଏଫ୍ଏସ୍ଏ) ଏବଂ ରାଜ୍ୟ ଖାଦ୍ୟ ସୁରକ୍ଷା ଯୋଜନା (ଏସ୍ଏଫ୍ଏସ୍ଏସ୍)ରେ ଅନ୍ତର୍ଭୁକ୍ତ ମହିଳାଙ୍କୁ କେବଳ ସୁଭଦ୍ରା ଯୋଜନାରେ ସାମିଲ କରାଯିବ ବୋଲି ଅପପ୍ରଚାର ଚାଲିଛି। ଏହି ବର୍ଗ ସମେତ ବାର୍ଷିକ ୨,୫୦,୦୦୦ ଟଙ୍କାରୁ କମ୍ ଆୟ ଥିବା ପରିବାରକୁ ଯୋଜନାରେ ସାମିଲ କରାଯିବ। ସେ କହିଥିଲେ, ଜିଲାରେ ଏନ୍ଏଫଏସ୍ଏ ଓ ଏସ୍ଏଫଏସ୍ଏସ୍ରେ ମୋଟ ୧,୯୫,୬୩୦ ଜଣ ଥିବାରୁ ସେମାନଙ୍କୁ ସୁଭଦ୍ରାରେ ସାମିଲ କରାଯୀପାସହ ଅନ୍ୟ ଯୋଗ୍ୟ ହିତାଧିକାରୀଙ୍କୁ ସାମିଲ ପାଇଁ ଯୋଜନା ରହିଛି। ଜିଲାରେ ଏ ପର୍ଯ୍ୟନ୍ତ ୪,୭୮,୫୦୦ ଫର୍ମ ପ୍ରିଣ୍ଟ ହୋଇଛି। ଗୁରୁବାର ପୂର୍ବାହ୍ନ ୧୧ଟା ସୁଦ୍ଧା ୩,୭୬,୦୦୦ ଫର୍ମ ଲୋକମାନଙ୍କୁ ମାଗଣାରେ ବଣ୍ଟନ କରାଯାଇପାରିଛି। ଏହି ଫର୍ମ ଅଙ୍ଗନୱାଡି କେନ୍ଦ୍ର, ଜେଏସ୍କେ ଓ ଏମ୍ଏସ୍କେରେ ଉପଲବ୍ଧ। ଲୋକେ ଫର୍ମ ପାଇଲା ପରେ ଅଙ୍ଗନୱାଡି କର୍ମୀଙ୍କ ପରାମର୍ଶକ୍ରମେ ପୂରଣ କରି ବ୍ୟାଙ୍କ ଆକାଉଣ୍ଟ ନମ୍ବର, ମୋବାଇଲ ନମ୍ବର ଓ ଆଧାର ନମ୍ବର ସହ ଜନସେବା କେନ୍ଦ୍ର/ମୋ ସେବା କେନ୍ଦ୍ରଗୁଡ଼ିକରେ ସୁଭଦ୍ରା ପୋର୍ଟାଲରେ ନାମ ପଞ୍ଜୀକରଣ କରିପାରିବେ। ଜିଲାରେ ସହଜରେ ସେବା ପହଞ୍ଚାଇବା ପାଇଁ ୬୫୦ ଜେଏସ୍କେ ଓ ୨୭୪ଟି ଏମ୍ଏସ୍କେ କାର୍ଯ୍ୟକ୍ଷମ ରହିଛି।
ଏହି ସେବା କେନ୍ଦ୍ରଗୁଡିକ ମାଗଣାରେ ପ୍ରାପ୍ତି ସ୍ବୀକାର (ଆକ୍ନଲେଜମେଣ୍ଟ) ରସିଦ ଦେବେ। କେହି ଏଥିନେଇ ଅର୍ଥ ଦାବି କଲେ କିମ୍ବା ଅସହଯୋଗ କଲେ ତୁରନ୍ତ ଟୋଲ୍ ଫ୍ରି ନମ୍ବର ୧୪୬୭୮ରେ କିମ୍ବା ଜିଲା ପ୍ରଶାସନର ଦୃଷ୍ଟି ଆକର୍ଷଣ କରିବାକୁ ପରାମର୍ଶ ଦେଇଛନ୍ତି। ଏଥିସହ ଅନ୍ୟ କୌଣସି ବିଷୟରେ ଜାଣିବାକୁ ହେଲେ ବ୍ଲକ କିମ୍ବା ଜିଲା କାର୍ଯ୍ୟାଳୟସ୍ଥିତ ସୁଭଦ୍ରା ସହାୟତା କେନ୍ଦ୍ରର ସହାୟତା ନେଇପାରିବେ ବୋଲି କୁହାଯାଇଛି। ସମ୍ମିଳନୀରେ ଅନ୍ୟମାନଙ୍କ ମଧ୍ୟରେ ପାରାଦୀପ ଅତିରିକ୍ତ ଜିଲାପାଳ ଲଳିତ ମୋହନ ବେହେରା ଓ ଜିଲା ପରିଷଦ ମୁଖ୍ୟ ବିକାଶ ତଥା କାର୍ଯ୍ୟନିର୍ବାହୀ ଅଧିକାରୀ ରବିନାରାୟଣ ଜେଠୀ ପ୍ରମୁଖ ଉପସ୍ଥିତ ଥିଲେ।
