ଶ୍ରୀନଗର, ୨୩।୫: ଜମ୍ମୁ ଓ କଶ୍ମୀରର ଶ୍ରୀନଗରସ୍ଥିତ ଶେର-ଇ-କଶ୍ମୀର ଅନ୍ତର୍ଜାତୀୟ ସମ୍ମେଳନ କେନ୍ଦ୍ରରେ ସୋମବାର ଅତି କଡ଼ା ସୁରକ୍ଷା ମଧ୍ୟରେ ଜି୨୦ ପର୍ଯ୍ୟଟନ କାର୍ଯ୍ୟଗୋଷ୍ଠୀ ବୈଠକ ଆରମ୍ଭ ହୋଇଛି। ଜମ୍ମୁ ଓ କଶ୍ମୀରରୁ ସମ୍ବିଧାନର ଅନୁଚ୍ଛେଦ ୩୭୦ ଉଚ୍ଛେଦ ହେବା ପରେ ଏହା ହେଉଛି ପ୍ରଥମ ଅନ୍ତର୍ଜାତୀୟ ସ୍ତରୀୟ କାର୍ଯ୍ୟକ୍ରମ। ଦୁଇଦିନିଆ ସମ୍ମିଳନୀରେ ବିଶ୍ୱର ବିଭିନ୍ନ ଭାଗରୁ ଅତିକମ୍ରେ ୬୦ ଜଣ ପ୍ରତିନିଧି ଯୋଗ ଦେଇଥିବା ବେଳେ ୨୦ ଜଣ ସାମ୍ବାଦିକ ଅଂଶଗ୍ରହଣ କରିଛନ୍ତି।
ମୁଖ୍ୟ ସମନ୍ବୟକାରୀ ହର୍ଷବର୍ଦ୍ଧନ ଶ୍ରୀଙ୍ଗଲା କହିଛନ୍ତି ଯେ, ଜି୨୦ ପର୍ଯ୍ୟଟନ କାର୍ଯ୍ୟଗୋଷ୍ଠୀର ଅନ୍ୟତମ ମୁଖ୍ୟ କାର୍ଯ୍ୟସୂଚୀ ହେଉଛି ଫିଲ୍ମ ଟୁରିଜମ୍। ସିନେମା ପର୍ଯ୍ୟଟନରେ ଜମ୍ମୁ ଓ କଶ୍ମୀରର ସମ୍ଭାବ୍ୟ ଶକ୍ତିକୁ ପ୍ରଦର୍ଶନ ଲାଗି ଏଭଳି ପ୍ରଚେଷ୍ଟା କରାଯାଇଛି। ସେ କହିଛନ୍ତି, ଏହା ନିଃସନ୍ଦେହରେ କୁହାଯାଇପାରେ ଯେ ଏଠାରେ ଅନୁଷ୍ଠିତ ଜି ୨୦ ବୈଠକ କଶ୍ମୀର ପର୍ଯ୍ୟଟନକୁ ନୂଆ ରୂପ ଦେବ। ଏଥିସହିତ ଏହି ସମ୍ମିଳନୀ ଜମ୍ମୁ ଓ କଶ୍ମୀର ଅର୍ଥନୀତିକୁ ମଧ୍ୟ ସୁଦୃଢ଼ କରିବ ବୋଲି ସେ ଆଶାବ୍ୟକ୍ତ କରିଛନ୍ତି।
ବୈଠକରେ ପୂର୍ବାପେକ୍ଷା ସର୍ବାଧିକ ପ୍ରତିନିଧି ଯୋଗ ଦେଇଛନ୍ତି ବୋଲି ଶ୍ରୀଙ୍ଗଲା କହିଛନ୍ତି। ଚାଇନା ସମେତ କେତେକ ସଦସ୍ୟ ରାଷ୍ଟ୍ର ଏହି କାର୍ଯ୍ୟକ୍ରମରୁ ଦୂରେଇ ରହିଥିବା ସେ ପ୍ରକାଶ କରିଛନ୍ତି। ଜମ୍ମୁ ଓ କଶ୍ମୀର ଏକ ବିବାଦୀୟ ଅଞ୍ଚଳ ବୋଲି ଅଭିହିତ କରି ଚାଇନା ଜି୨୦ରେ ଯୋଗ ଦେଇ ନ ଥିବା ବେଳେ ସାଉଦି ଆରବ ଏହି କାର୍ଯ୍ୟକ୍ରମ ପାଇଁ ନାମ ପଞ୍ଜୀକରଣ କରିନାହିଁ। ସେହିପରି ତୁର୍କୀ ଏହି ବୈଠକରୁ ନିଜକୁ ଦୂରେଇ ରଖିଛି। ହେଲେ ଇସ୍ଲାମୀୟ ରାଷ୍ଟ୍ର ସଙ୍ଗଠନ (ଓଆଇସି)ର ସଦସ୍ୟ, ନାଇଜେରିଆ ଓ ଇଣ୍ଡୋନେସିଆର ରାଷ୍ଟ୍ରଦୂତମାନେ ଏଥିରେ ଯୋଗ ଦେଇଛନ୍ତି। ପ୍ରତିନିଧିମାନେ ପରି ମହଲ, ଚେସ୍ମାସାହି ଓ ମୋଗଲ ଗାର୍ଡେନ ପରିଦର୍ଶନ କରିବେ। ଏଥିସହିତ ସେମାନେ ପୁନରୁଦ୍ଧାର ହୋଇଥିବା ପୋଲୋ ଭିଉ ମାର୍କେଟ ବୁଲିବା ସହ ବୁଧବାର କଶ୍ମୀର ଉପତ୍ୟକା ଯିବାର କାର୍ଯ୍ୟକ୍ରମ ରହିଛି। ବିଶ୍ୱ ସ୍ତରୀୟ ପ୍ରତିନିଧି ଏହି ସମ୍ମିଳନୀରେ ଯୋଗ ଦେଇଥିବାରୁ କଶ୍ମୀରରେ ସୁରକ୍ଷା ବ୍ୟବସ୍ଥାକୁ ସମ୍ପୂର୍ଣ୍ଣ କଡ଼ାକଡ଼ି କରିଦିଆଯାଇଛି। ଏନ୍ଏସ୍ଜିର ଡ୍ରୋନ୍ ନିରୋଧୀ ଟିମ୍ ଆକାଶମାର୍ଗ ଉପରେ ନଜର ରଖିଥିବା ବେଳେ ଡାଲ୍ ହ୍ରଦ ନିକଟରେ ମରିନ୍ କମାଣ୍ଡୋମାନେ ପଇଁତରା ମାରୁଛନ୍ତି। ଚେନାବ ନଦୀରେ ସୀମା ସୁରକ୍ଷା ବଳ (ବିଏସ୍ଏଫ୍)ର ଯବାନମାନେ ଡଙ୍ଗାରେ ରହି ସୁରକ୍ଷା ବ୍ୟବସ୍ଥାକୁ ତଦାରଖ କରୁଛନ୍ତି। ଜମ୍ମୁର ଅଖନୁର ସ୍ଥିତ ଭାରତ-ପାକିସ୍ତାନ ସୀମାନ୍ତ ଉପରେ ମଧ୍ୟ କଡ଼ା ନଜର ରଖାଯାଇଛି। ସେନା ସହ ଜମ୍ମୁ ଓ କଶ୍ମୀର ପୋଲିସ ମିଶି ବୈଠକ ସ୍ଥଳ ଜବାରଓ୍ବାନ୍ ରେଞ୍ଜ ଉପରେ ଦୃଷ୍ଟି ରଖିଛନ୍ତି। ଦେଶର ବିଭିନ୍ନ ଭାଗରେ ହୋଇଥିବା ନିର୍ବାଚନ ଲାଗି ଜମ୍ମୁ ଓ କଶ୍ମୀରରୁ ଯାଇଥିବା ସିଆର୍ପିଏଫ୍ ଯବାନମାନଙ୍କୁ ଜି୨୦ ସମ୍ମିଳନୀ ସ୍ଥଳକୁ ଫେରାଇ ଅଣାଯାଇଛି। ପଣବନ୍ଦୀ ଭଳି ସ୍ଥିତିକୁ ଟାଳିବା ଲାଗି ‘ବ୍ଲାକ୍ କ୍ୟାଟ୍’ କମାଣ୍ଡୋମାନଙ୍କୁ ମଧ୍ୟ ମୁତୟନ କରାଯାଇଛି।
