ଜଗନ୍ନାଥପ୍ରସାଦ, ୧।୭(ବିଭୁ ପ୍ରସାଦ ପଟ୍ଟନାୟକ): ଅଞ୍ଚଳର ସମସ୍ୟାକୁ ପ୍ରଶାସନର ସାମ୍ନାକୁ ଆଣିବା ଏବଂ ସମାଜରେ ସକାରାତ୍ମକ ପରିବର୍ତ୍ତନର ସୂତ୍ରଧର ସାଜିବା ହିଁ ଜଣେ ସଚେତନ ଖବରଦାତାଙ୍କ ପ୍ରକୃତ କର୍ତ୍ତବ୍ୟ। ବୁଧବାର ଏଭଳି ଏକ କର୍ତ୍ତବ୍ୟର ସଫଳ ପରିଣାମ ଦେଖିବାକୁ ମିଳିଛି ଗଞ୍ଜାମ ଜିଲାର ଜଗନ୍ନାଥପ୍ରସାଦ ଅଞ୍ଚଳରେ।
ନୂତନ ଭାବେ ଘୋଷିତ ଏହି ଏନ୍ଏସି (NAC)ର ମୁଖ୍ୟ ବଜାରରେ ମାସ ମାସ ଧରି ଅଳିଆ-ଆବର୍ଜନା ଗଦା ହୋଇ ପଡ଼ିରହିବା ଯୋଗୁଁ ପରିବେଶ ଦୂଷିତ ହେଉଥିବା ନେଇ ଗତ ଜୁନ୍ ୨୬ ତାରିଖରେ ଲୋକପ୍ରିୟ ଦୈନିକ ଖବରକାଗଜ ‘ଧରିତ୍ରୀ’ରେ ଏକ ବିଶେଷ ଖବର ପ୍ରକାଶ ପାଇଥିଲା।
ଏହି ଖବର ପ୍ରଶାସନର ନିଦ ଭାଙ୍ଗିବାରେ ସଫଳ ହୋଇଛି। ‘ଧରିତ୍ରୀ’ର ଏହି ଖବରକୁ ଗୁରୁତ୍ୱର ସହ ନେଇ ଜଗନ୍ନାଥପ୍ରସାଦ ବ୍ଲକ ତଥା ବର୍ତ୍ତମାନ ଏନ୍ଏସିର ଦାୟିତ୍ୱରେ ଥିବା ଉନ୍ନୟନ ଅଧିକାରୀ ମନ୍ମଥ ମଲ୍ଲିକ ବୁଧବାର ମୁଖ୍ୟ ବଜାରରେ ପହଞ୍ଚିଥିଲେ। କେବଳ ନିର୍ଦ୍ଦେଶ ଦେଇ ସେ ବସି ରହିନଥିଲେ, ବରଂ ନିଜେ ଉପସ୍ଥିତ ରହି ସମଗ୍ର ବଜାର ଅଞ୍ଚଳର ସଫେଇ କାର୍ଯ୍ୟର ପ୍ରତ୍ୟକ୍ଷ ତଦାରଖ କରିଥିଲେ।
ଦୀର୍ଘ ଦିନ ଧରି ଜମି ରହିଥିବା ଅଳିଆ-ଆବର୍ଜନାକୁ ସଫେଇ କରାଯିବା ସହ ନିର୍ଦ୍ଦିଷ୍ଟ ସ୍ଥାନକୁ ସ୍ଥାନାନ୍ତର କରାଯାଇଥିଲା। ଏହା ସହ ସ୍ୱଚ୍ଛତା ବ୍ୟବସ୍ଥା ଯେପରି ଆଗାମୀ ଦିନରେ ବ୍ୟାହତ ନହୁଏ, ସେଥିପାଇଁ ଉନ୍ନୟନ ଅଧିକାରୀ ମଲ୍ଲିକ ଏକ ସ୍ଥାୟୀ ରୋଡ୍ମ୍ୟାପ୍ ପ୍ରସ୍ତୁତ କରିଛନ୍ତି।
ଏନ୍ଏସିର ସଫେଇ ଟେଣ୍ଡର ପ୍ରକ୍ରିୟା ଶେଷ ହେବା ପର୍ଯ୍ୟନ୍ତ ବଜାରର ସ୍ୱଚ୍ଛତା କାର୍ଯ୍ୟ ବନ୍ଦ ହେବ ନାହିଁ। ଜନସାଧାରଣ ଓ ବ୍ୟବସାୟୀମାନଙ୍କ ସୁବିଧାକୁ ଦୃଷ୍ଟିରେ ରଖି ଅସ୍ଥାୟୀ ସଫେଇ କର୍ମଚାରୀଙ୍କ ମାଧ୍ୟମରେ ପ୍ରତିଦିନ ସଫେଇ କାର୍ଯ୍ୟ ଜାରି ରହିବ ବୋଲି ପ୍ରଶାସନ ପକ୍ଷରୁ ପ୍ରତିଶ୍ରୁତି ଦିଆଯାଇଛି।
‘ଧରିତ୍ରୀ’ର ଜନହିତକର ସାମ୍ବାଦିକତା ଏବଂ ପ୍ରଶାସନର ତ୍ୱରିତ ଓ ସକାରାତ୍ମକ ପଦକ୍ଷେପ ଯୋଗୁଁ ସ୍ଥାନୀୟ ବ୍ୟବସାୟୀ ଓ ଜନସାଧାରଣଙ୍କ ମଧ୍ୟରେ ଖୁସିର ଲହରୀ ଦେଖିବାକୁ ମିଳିଛି। ଏହି ପଦକ୍ଷେପକୁ ସମସ୍ତେ ସ୍ୱାଗତ କରିବା ସହ ‘ଧରିତ୍ରୀ’ର ଜନସ୍ୱାର୍ଥମୂଳକ ସାମ୍ବାଦିକତାକୁ ପ୍ରଶଂସା କରିଛନ୍ତି।
