କୃଷ୍ଣପ୍ରସାଦ୧୧।୯(କୈଳାଶ ଚନ୍ଦ୍ର ପଟ୍ଟନାୟକ ): ପୁରୀ ଜିଲା କୃଷ୍ଣପ୍ରସାଦ ବ୍ଳକ ବିରିପଦର ମଜାର ଚିଲିକା ମଝିରେ ଥିବା ବେଆଇନ ଫାର୍ମ ହାଉସକୁ ଆଜି ଉଚ୍ଛେଦ କରାଯାଇଛି । ଏହି ଫାର୍ମ ହାଉସ ଦୀର୍ଘ ୫ ବର୍ଷ ଧରି ୩୦ ଡିସିମିଲ ଜାଗା ଉପରେ ଦୁଇ ମହଲାର ଅଟ୍ଟାଳିକା ଠିଆ ହୋଇଥିଲା । ଏହି ବେଆଇନ ଫାର୍ମ ହାଉସ କୃଷ୍ଣପ୍ରସାଦ ବ୍ଳକ ବଡଝାଡ଼ ଗ୍ରାମର ଅକ୍ଷୟ ତରେଇ ନିର୍ମାଣ କରିଥିବା ଜଣାପଡିଛି । ବେଆଇନ ଅଟ୍ଟାଳିକା ଉଚ୍ଛେଦ ନିମନ୍ତେ ଦୀର୍ଘ ଦିନ ଧରି ଅଭିଯୋଗ ହୋଇ ଆସୁଥିଲେ ମଧ୍ୟ ବିଜେଡି ଛାମୁଆଙ୍କ ଛତ୍ର ଛାୟା ତଳେ ରହିଯାଉଥିଲା । ଲୋକଙ୍କ ମୁହଁରୁ ଶୁଣିବାକୁ ମିଳେ ଦଳୀୟ ସଭା ଏବଂ ବିଭିନ୍ନ କାର୍ଯ୍ୟ ପାଇଁ ତାହା ସୁରକ୍ଷିତ ଅଞ୍ଚଳ ଥିଲା । ବେଆଇନ ଫାର୍ମ ହାଉସକୁ ଭାଙ୍ଗିବା ପାଇଁ ୨୦୨୨ ଏବଂ ୨୦୨୪ ରେ ଦୁଇଥର କୃଷ୍ଣପ୍ରସାଦ ତହସିଲ ପକ୍ଷରୁ ନୋଟିସ କରାଯାଇଥିଲେ ମଧ୍ୟ ବେଖାତିର ମନୋଭାବ ପ୍ରଦର୍ଶନ କରୁଥିଲେ। ନୂତନ ସରକାର ଆସିବା ପରେ ରାଜ୍ୟର ବିଭିନ୍ନ ସ୍ଥାନରେ ଥିବା ଜବର ଦଖଲ ଉଚ୍ଛେଦକୁ ସରକାର ହାତକୁ ନେଇଛନ୍ତି । ଗୁରୁବାର ଜିଲାପାଳଙ୍କ ନିର୍ଦ୍ଦେଶ କ୍ରମେ ବିରିପଦର ମୌଜାର ଖାତା ନଂ୨୯, ପ୍ଲଟ ନଂ ୧୦୨ ଉପରେ ଚିଲିକା ମଝିରେ ଗଢ଼ି ଉଠିଥିବା ଜାଆଁଣ ଫାର୍ମ ହାଉସକୁ ଉଚ୍ଛେଦ କରାଯାଇଛି । ୩ ଗୋଟି ବୁଲଡୋଜର ସହିତ କିଛି ଶ୍ରମିକ ଭଙ୍ଗା କାର୍ଯ୍ୟରେ ନିୟୋଜିତ ହୋଇଛନ୍ତି । ଶୃଙ୍ଖଳା ରକ୍ଷା କରିବା ପାଇଁ ୫ ପ୍ଲାଟୁନ ମହିଳା ପୁରୁଷ ପୋଲିସ ଫୋର୍ସ ଜଣେ ଅତିରିକ୍ତ ଆରକ୍ଷୀ ଅଧିକ୍ଷକ, ୨ ଜଣ ଡିଏସପି, ୪ ଜଣ ଆରକ୍ଷୀ ନିରୀକ୍ଷକ ଉପସ୍ଥିତ ରହିଛନ୍ତି। ମାଜିଷ୍ଟ୍ରେଟ ଶରତ ଚନ୍ଦ୍ର ଦେହୁରୀ, କୃଷ୍ଣପ୍ରସାଦ ତହସିଲଦାର ବିକାଶ ସେଠୀ, କୃଷ୍ଣପ୍ରସାଦ ପୋଲିସ ଉପଖଣ୍ଡ ଅଧିକାରୀ ଭାବଗ୍ରାହୀ ରାଉତଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ଉଛେଦ କାର୍ଯ୍ୟ ଚାଲିଛି । ଉଚ୍ଛେଦ ସମୟରେ ବାହାରର କୌଣସି ଜନସାଧାରଣଙ୍କୁ ଘଟଣାସ୍ଥଳ ପ୍ରବେଶକୁ ବାରଣ କରାଯାଇଥିଲା ।
