ପ୍ରକୃତି ଏବଂ ପ୍ରାଣୀ ଜଗତ ମଧ୍ୟରେ ସମ୍ପର୍କ ଅତି ନିବିଡ଼। ଜଙ୍ଗଲ ଦ୍ୱାରା ବହୁବିଧ ପରିବେଶ ସୁରକ୍ଷା ସହିତ ଜଳବାୟୁ ଏବଂ ବାୟୁମଣ୍ଡଳର ଉତ୍ତାପ ବୃଦ୍ଧି ତଥା ବିଭିନ୍ନ ଗ୍ୟାସ୍ର ଉପଲବ୍ଧ ପରିମାଣ ମଧ୍ୟରେ ସମନ୍ବୟ ସୃଷ୍ଟି ହୋଇଥାଏ। ତେଣୁ ଜଙ୍ଗଲର ଉପକାରିତା ସମ୍ପର୍କରେ ସଚେତନତା ସୃଷ୍ଟି ପାଇଁ ପ୍ରତିବର୍ଷ ମାର୍ଚ୍ଚ ୨୧ରେ ବିଶ୍ୱ ଜଙ୍ଗଲ ଦିବସ ପାଳନ ହୋଇଥାଏ। ୨୦୧୧ରେ ଅନ୍ତର୍ଜାତୀୟ ଜଙ୍ଗଲ ବର୍ଷ ପରେ, ୨୦୧୨ ନଭେମ୍ବର ୨୮ରେ ମିଳିତ ଜାତିସଂଘର ସାଧାରଣ ସଭାର ସଂକଳ୍ପ ଦ୍ୱାରା ଅନ୍ତର୍ଜାତୀୟ ଜଙ୍ଗଲ ଦିବସ ପ୍ରତିଷ୍ଠା କରାଯାଇଥିଲା ।
ଏହା ପରେ ୨୦୧୩ ମାର୍ଚ୍ଚ ୨୧ଠାରୁ ଏହି ଦିବସ ପାଳନ କରାଯିବାକୁ ନିଷ୍ପତ୍ତି ଗ୍ରହଣ କରାଯାଇଥିଲା। ପ୍ରତିବର୍ଷ ୧୩ ନିୟୁତ ହେକ୍ଟରରୁ ଅଧିକ ଜଙ୍ଗଲ ନଷ୍ଟ ହୋଇଥାଏ। ଜଙ୍ଗଲ ରହିଲେ ଉଦ୍ଭିଦ ଏବଂ ପ୍ରାଣୀ ପ୍ରଜାତିଗୁଡିକର ବିକାଶ ସମ୍ଭବ ହୋଇପାରିଥାଏ । ସମସ୍ତ ପୃଥିବୀ ଜୈବ ବିବିଧତାର ୮୦ ପ୍ରତିଶତ ଜଙ୍ଗଲରେ ଥାଏ। ଜଳବାୟୁ ପରିବର୍ତ୍ତନରେ ଜଙ୍ଗଲ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥାଏ। ଜଙ୍ଗଲ ନଷ୍ଟ ହେବା ଦ୍ୱାରା ବିଶ୍ୱର କାର୍ବନ ନିର୍ଗମନ ପରିମାଣରେ ୧୨ରୁ ୧୮ ପ୍ରତିଶତ ବୃଦ୍ଧି ପାଇଥାଏ। ଜଙ୍ଗଲ ବହୁ ଲୋକଙ୍କ ଜୀବନ ଜୀବିକା ମଧ୍ୟ ପାଲଟିଥାଏ । ପୃଥିବୀର ପ୍ରାୟ ୧.୬ ବିଲିଅନ ଗରିବ ଲୋକ ଜଙ୍ଗଲ ଉପରେ ନିର୍ଭର କରିଥାନ୍ତି। ଜଙ୍ଗଲ ଆଦିବାସୀ ସଂସ୍କୃତିର ବିକାଶରେ କାର୍ଯ୍ୟ କରିଥାଏ।
