ପାରାଦୀପ,୨୬।୧୧(ସ୍ବ.ପ୍ର.): ଭାରତୀୟ ତଟରକ୍ଷୀ ବାହିନୀ (କୋଷ୍ଟଗାର୍ଡ)ର ଓଡ଼ିଶା ଉପକୂଳରେ ଗତ ୨୦ ବର୍ଷ ଧରି ସାମୁଦ୍ରିକ ପାଟ୍ରୋଲିଂ କରୁଥିବା ଜାହାଜ ‘ଆଇସିଜିଏସ୍ ସରୋଜିନୀ ନାଇଡୁ’ ଶୁକ୍ରବାର ସୂର୍ଯ୍ୟାସ୍ତ ସମୟରେ ସେବା ନିବୃତ୍ତ ହୋଇଛି। ଏନେଇ କୋଷ୍ଟଗାର୍ଡ ପକ୍ଷରୁ ପାରାଦୀପ ବନ୍ଦର ଭିତରେ ଥିବା କୋଷ୍ଟଗାର୍ଡ ବର୍ଥରେ ବିଦାୟକାଳୀନ ସଭା ଅନୁଷ୍ଠିତ ହୋଇଥିଲା। ମୁଖ୍ୟଅତିଥି ଭାବେ କୋଷ୍ଟଗାର୍ଡ ଡିଆଇଜି ୱାଇ.କେ.ସିଂ ଯୋଗଦେଇ ଏହା ଘୋଷଣା କରିଥିଲେ। ଏହାପରେ କୋଷ୍ଟଗାର୍ଡ ଯବାନମାନେ ଜାହାଜରେ ଲାଗିଥିବା ପତାକାକୁ ସସମ୍ମାନେ ଅବତରଣ କରି କୋଷ୍ଟଗାର୍ଡ କମାଣ୍ଡାଣ୍ଟ ଜଗନ୍ନାଥ ବେହେରାଙ୍କୁ ଦେଇଥିଲେ।
ଏହି ପାଟ୍ରୋଲିଂ ଜାହାଜ ଗୋଆରେ ପ୍ରଥମ କରି ସେବା ଆରମ୍ଭ କରିଥିଲା। ପରେ ଓଡ଼ିଶା ଓ ପଶ୍ଚିମବଙ୍ଗ ସାମୁଦ୍ରିକ ସୀମାରେ ସେବା ଯୋଗାଉଥିଲା। ମହିଳା ସ୍ବାଧୀନତା ସଂଗ୍ରାମୀ ସରୋଜିନୀ ନାଇଡୁଙ୍କ ନାମାନୁସାରେ ଏହାର ନାମକରଣ କରାଯାଇଥିଲା।
