ଦୁବାଇ,୧୯।୭(ପି.ଟି.): ସୋମବାର ଅନ୍ତର୍ଜାତୀୟ କ୍ରିକେଟ କାଉନସିଲ (ଆଇସିସି)ର ଭର୍ଚୁଆଲ ବୋର୍ଡ ବୈଠକ ବସିବ। ଅଷ୍ଟ୍ରେଲିଆରେ ଆୟୋଜନ ହେବାକୁ ଥିବା ଟି୨୦ ବିଶ୍ୱକପ୍ ନେଇ ଗତ ଦୁଇମାସ ହେବ କୌଣସି ନିଷ୍ପତ୍ତି ନିଆଯାଇପାରି ନାହିଁ। ଏହି ବୈଠକରେ ବିଶ୍ୱକପ୍ ନେଇ ନିର୍ଣ୍ଣାୟକ ନିଷ୍ପତ୍ତି ନିଆଯିବ ବୋଲି ଆଶା କରାଯାଉଛି। ଟି୨୦ ବିଶ୍ୱକପ୍ ବାତିଲ ହେବ ବୋଲି ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ଆଶା ରଖିଛି। ଏପରି ହେଲେ ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ) ଆୟୋଜନ ହେବା ପାଇଁ ବାଟ ଫିଟିବ।
ଟି୨୦ ବଶ୍ୱକପ୍ ଅକ୍ଟୋବର ୧୮ରୁ ଆରମ୍ଭ ହୋଇ ନଭେମ୍ବର ୧୫ ତାରିଖରେ ଶେଷ ହେବାର କାର୍ଯ୍ୟକ୍ରମ ରହିଥିଲା। ତେବେ ଦେଶରେ କୋଭିଡ୍-୧୯ ମହାମାରୀର ପ୍ରକୋପ ଜାରି ରହିଥିବା ବେଳେ ଅଷ୍ଟ୍ରେଲିଆ ଏହି ମେଗା ଇଭେଣ୍ଟ ଆୟୋଜନ କରିବାକୁ ଅକ୍ଷମତା ପ୍ରକାଶ କରିଛି। ପଳରେ ବିଶ୍ୱକପ୍ ଘୁଞ୍ଚାଯିବା ନିଶ୍ଚିତ ମନେ ହେଉଛି। ଏପଟେ ଭାରତରେ ମଧ୍ୟ ଏହି ମହାମାରୀ ଉଗ୍ର ରୂପ ଧାରଣ କରିଛି। ତେଣୁ ଯଦି ସରକାର ଅନୁମତି ଦିଅନ୍ତି ତା’ହେଲେ ୟୁନାଇଟେଡ ଆରବ ଏମିରାଟ୍ସ (ୟୁଏଇ)ରେ ଆଇପିଏଲ ଆୟୋଜନ ହେବାର ଯଥେଷ୍ଟ ସମ୍ଭାବାନ ରହିଛି।
ପୂର୍ବରୁ ଏସିଆ କପ୍ ଭଳି ଗୁରୁତ୍ୱପୂର୍ଣ୍ଣ ଇଭେଣ୍ଟ ମଧ୍ୟ ସମକାରଣ ଯୋଗୁ ଘୁଞ୍ଚାଇ ଦିଆଯାଇଛି। ଆଇସିସି ବିଶ୍ୱକପ୍ ଘୁଞ୍ଚିବା ନେଇ ଘୋଷଣା କରିବା ପରେ ବିସିସିଆଇ ତା’ର ପ୍ରସ୍ତୁତି ଆରମ୍ଭ କରିବ। ଏହି ଟି୨୦ ବିଶ୍ୱକପ୍ ୨୦୨୨ରେ ଆୟୋଜନ ହୋଇପାରେ। କାରଣ ଭାରତ ତା’ର ୨୦୨୧ ଆୟୋଜନ ଅଧିକାରକୁ ବଦଳ କରିବାକୁ ଚାହୁଁନାହିଁ। ଅନ୍ୟପେଟ ନିଷ୍ପତ୍ତି ନେବା ପୂର୍ବରୁ ଆଇସିସି ସବୁ ପ୍ରକାର ବିକଳ୍ପ ନେଇ ଆଲୋଚନ କରିବ।
ଇତିମଧ୍ୟରେ ଶଶାଙ୍କ ମନୋହର ଆଇସିସି ଅଧ୍ୟକ୍ଷ ପଦରୁ ଇସ୍ତଫା ଦେଇଛନ୍ତି। ଫଳରେ ବୈଠକରେ ପରବର୍ତ୍ତୀ ଆଇସିସି ଅଧ୍ୟକ୍ଷ ପଦ ନିର୍ବାଚନ ଓ ନାମାଙ୍କନ ପ୍ରକ୍ରିୟା ନେଇ ଆଲୋଚନା ହେବ ବୋଲି ଆଶା କରାଯାଉଛି। ଅଧ୍ୟକ୍ଷ ପଦ ଦୌଡ଼ରେ ଇଂଲଣ୍ଡ ଓ ଓ୍ବେଲ୍ସ କ୍ରିକେଟ ବୋର୍ଡ (ଇସିବି) ମୁଖ୍ୟ କଲିନ ଗ୍ରେଭ୍ସ ସବୁଠାରୁ ଆଗରେ ରହିଛନ୍ତି। ସେହିପରି ବିସିସିଆଇ ସଭାପତି ସୌରଭ ଗାଙ୍ଗୁଲି, ନ୍ୟୁଜିଲାଣ୍ଡର ଗ୍ରେଗର ବାରକ୍ଲେ ଓ ହଂକଂର ଇମ୍ରାନ ଖ୍ବାଜା ମଧ୍ୟ ଏହି ଦୌଡ଼ରେ ସାମିଲ ହେବା ନେଇ ଚର୍ଚ୍ଚା ହେଉଛି।
