ଭୁବନେଶ୍ୱର,୧୨।୧୨(ବ୍ୟୁରୋ): ମମିତା ମେହେର ହତ୍ୟା ଘଟଣାର ପ୍ରତିବାଦ ତଥା ନ୍ୟାୟ ପ୍ରଦାନ ଦାବିରେ ଶୁକ୍ରବାର ଛାତ୍ର କଂଗ୍ରେସର ବିଧାନସଭା ଘେରାଉ ଉଦ୍ୟମକୁ ପୋଲିସ ଦମନ କରିଥିଲା। ଏହି ଘଟଣାକୁ ନେଇ ପୋଲିସ କମିଶନର ସୌମେନ୍ଦ୍ର ପ୍ରିୟଦର୍ଶୀ ଧାରଣସ୍ଥଳରେ ଢେଲା ମାଡ କରାଯାଇଥିବା ଗଣମାଧ୍ୟମକୁ ସୂଚନା ଦେଇଥିଲେ। ଏହାର ପ୍ରତିକ୍ରିୟାରେ ରବିବାର ବିଧାୟକ ତାରାପ୍ରସାଦ ବାହିନୀପତି ପାଲଟା ଜବାବ ରଖିଛନ୍ତି।
ବାହିନୀପତି କହିଛନ୍ତି, ଛାତ୍ର କଂଗ୍ରେସର ଆନ୍ଦୋଳନ ବେଳେ ଯଦି ଧାରଣାସ୍ଥଳରେ ଢେଲା ମାଡ କରାଯାଇଥିବା ପ୍ରମାଣିତ ହୁଏ। ମୁଁ ରାଜନୀତି ଛାଡି ଦେବି। କମିଶନର ଚାକିରି ଛାଡିବା ପାଇଁ ପ୍ରସ୍ତୁତ କି ଅବା ତାଙ୍କ ବିରୋଧରେ ସରକାର କାର୍ଯ୍ୟାନୁଷ୍ଠାନ ଗ୍ରହଣ କରିବେ କି ବୋଲି ପ୍ରଶ୍ନ କରିଛନ୍ତି। ସରକାର ମାଜିଷ୍ଟେଟ କିମ୍ବା ହାଇକୋର୍ଟଙ୍କ ତତ୍ତ୍ୱାବଧାନରେ ଘଟଣାର ତଦନ୍ତ କରନ୍ତୁ। ପ୍ରମାଣ କରିଦେଲେ ବିଧାୟକ ପଦରୁ ଇସ୍ତଫା ଦେବି।
ମୁଖ୍ୟମନ୍ତ୍ରୀ ହକି ପୁରସ୍କାର ବାଣ୍ଟିବାକୁ ସେହି ବାଟ ଦେଇ ଗଲେ, ସ୍ବାସ୍ଥ୍ୟ କାର୍ଡ ବାଣ୍ଟିବାକୁ ଗଲେ। ଘଣ୍ଟ ବଜେଇ ବିଧାନସଭାକୁ ଡାକିଲୁ ହେଲେ ମୁଖ୍ୟମନ୍ତ୍ରୀ ଗୃହକୁ ଆସିଲେ ନାହିଁ। ଶେଷରେ ସେ ପୋଲିସ ଲଗାଇ ଶାନ୍ତିପୂର୍ଣ୍ଣ ଆନ୍ଦୋଳନକୁ ବର୍ବରତାର ସହ ଦମନ କଲେ। ଆନ୍ଦୋଳନରେ ଆଣ୍ଡା ମାରିବା ସତ୍ୟ, ଟୋମାଟ ମାରିବା ସତ୍ୟ କିନ୍ତୁ ଢେଲା ମରାଯାଇନାହିଁ। ବରଂ ପୋଲିସ କଂଗ୍ରେସ ଭବନରେ ପଶିବାର ଭିଡିଓ ପ୍ରମାଣ ରହିଛି। ଏହାକୁ ନେଇ ଆଗକୁ ପୋଲିସ କମିଶନର ଅଫିସ ଘେରାଉ ହେବ। ପ୍ରିୟଦର୍ଶୀ କ୍ଷମା ମାଗନ୍ତୁ ସେ କ୍ଷମା ନ ମାଗିବା ଯାଏଁ ପଛକୁ ହଟିବି ନାହିଁ ବୋଲି ବାହିନୀପତି କହିଛନ୍ତି।
