ଲକ୍ଷ୍ନୌ,୨୬।୩ : ଗୁରୁଜୀ ଅଧିକ ପାଠ ଲେଖିନି, ମତେ ଫେଲ କରିବେନି, ମୋର ଭବିଷ୍ୟତକୁ ନଷ୍ଟ କରନ୍ୁ ନାହିଁ, ଏହା ମିଠାଇ ଖର୍ଚ୍ଚ। ଏଭଳି ଉତ୍ତରପ୍ରଦେଶ ଦ୍ୱାଦଶ ବୋର୍ଡ ପରୀକ୍ଷା ଦେଇଥିବା ଶିକ୍ଷାର୍ଥୀଙ୍କ ଉତ୍ତର ଖାତାରେ ଦେଖିବାକୁ ମିଳୁଛି। ଖାତା ମୂଲ୍ୟାଙ୍କନ କରୁଥିବା ପରୀକ୍ଷକମାନେ ମଧ୍ୟ ଏହିପରି କାର୍ଯ୍ୟ ଯୋଗୁ ଆଶ୍ଚର୍ଯ୍ୟ ଏବଂ ଅସୁବିଧାରେ ପଡ଼ିଛନ୍ତି । ସାତ ଦିନର ମୂଲ୍ୟାଙ୍କନରେ ଏପର୍ଯ୍ୟନ୍ତ ୧୫ ହଜାର ଟଙ୍କା ଶିକ୍ଷାର୍ଥୀଙ୍କ ଉତ୍ତର ଖାତାରୁ ମିଳିଛି।
ନୋଟ ମଧ୍ୟରେ ୧୦୦ରୁ ଆରମ୍ଭ କରି ୫୦୦ ଏବଂ ୨୦୦୦ ଟଙ୍କିଆ ନୋଟ ମିଳୁଛି। ପଦାର୍ଥ ବିଜ୍ଞାନ, ଗଣିତ ଏବଂ ରସାୟନ ବିଜ୍ଞାନର ଉତ୍ତର ସିଟରେ ସର୍ବାଧିକ ପରିମାଣର ଟଙ୍କା ମିଳିଛି। ବାରାଣସୀ ଜିଲାରେ ଚାରୋଟି ମୂଲ୍ୟାଙ୍କନ କେନ୍ଦ୍ର ପ୍ରତିଷ୍ଠା କରାଯାଇଛି। ସରକାରୀ କୁଇନ୍ସ ଇଣ୍ଟର କଲେଜ ଏବଂ ପିଏନ ସରକାରୀ ଇଣ୍ଟର କଲେଜରେ ଇଣ୍ଟର ଶିକ୍ଷାର୍ଥୀମାନଙ୍କ ଉତ୍ତର ପୁସ୍ତକ ଯାଞ୍ଚ କରାଯାଉଛି।
ପରୀକ୍ଷାର୍ଥୀମାନେ ପରୀକ୍ଷାରେ ପାସ ମାର୍କ ପାଇଁ ସବୁଜ, ଗୋଲାପୀ, ନୀଳ ଏବଂ କମଳା ନୋଟ ଉତ୍ତରଖାତାରେ ରଖିଥିବାର ଦେଖିବାକୁ ମିଳିଥିଲା।କିଛି ପରୀକ୍ଷକ ନୋଟ ପାଇ ଚକିତ ହୋଇଯାଇଥିବା ବେଳେ କିଛି ହସିଥିଲେ।
ଶନିବାର, ୧୬୨୩ ପରୀକ୍ଷକ ୪୯,୪୫୭ ଉତ୍ତର ସିଟ ମୂଲ୍ୟାଙ୍କନ କରିଛନ୍ତି। ସେମାନଙ୍କ ମଧ୍ୟରୁ ୨୮୪ ପରୀକ୍ଷକ ପ୍ରଭାସ ନାରାୟଣ ସରକାରୀ ଇଣ୍ଟର କଲେଜରେ ୧୩,୮୨୩ ଉତ୍ତର ସିଟ ମୂଲ୍ୟାଙ୍କନ କରିଥିଲେ। ୨୫୩ ପରୀକ୍ଷକ ସରକାରୀ କୁଇନ୍ସ ଇଣ୍ଟର କଲେଜରେ ୯୯୭୭ କପି ଯାଞ୍ଚ୍ କରିଥିଲେ। ମହାବୋଧି ଇଣ୍ଟର କଲେଜରେ ୪୭୬ ପରୀକ୍ଷକଙ୍କ ଦ୍ୱାରା ୨୨,୧୧୧ କପି ଯାଞ୍ଚ କରାଯାଇଥିଲା । ଭାରତୀୟ ଶିକ୍ଷା ମନ୍ଦିରରେ, ୬୧୦ ପରୀକ୍ଷକଙ୍କ ଦ୍ୱାରା ୩୫୪୬ ଉତ୍ତର ସିଟ ଯାଞ୍ଚ କରାଯାଇଥିଲା। ଶନିବାର ୯୪୯ ପରୀକ୍ଷକ ସମସ୍ତ ଚାରୋଟି କେନ୍ଦ୍ରରେ ଅନୁପସ୍ଥିତ ରହିଥିଲେ। ୪୪ ଡେପୁଟି ପ୍ରିନ୍ସିପାଲ ପରୀକ୍ଷକ ଅନୁପସ୍ଥିତ ରହିଥିଲେ ।
