ଢେଙ୍କାନାଳ ଅଫିସ,୨୬।୩: ଗାଡ଼ିଚାଳକ ଫୁ’ କରିଦେଉଛନ୍ତି ଟ୍ରାଫିକ୍ ନିୟମ। ଟ୍ରାଫିକ୍ ପୋଷ୍ଟରେ ଲାଲ୍ ରଙ୍ଗର ବତି ଜଳୁଥିବା ସତ୍ତ୍ୱେ ଏହାକୁ ବେଖାତିର କରୁଛନ୍ତି। ବାଇକ୍ ଆରୋହୀମାନେ ବିନା ହେଲ୍ମେଟ୍ରେ ଦ୍ରୁତଗତିରେ ଗାଡ଼ି ଚଳାଉଛନ୍ତି। ୪ ଚକିଆ ଯାନର ଡ୍ରାଇଭର ଏବଂ ଯାତ୍ରୀ ବିନା ସିଟ୍ବେଲ୍ଟରେ ଯାତ୍ରା କରୁଛନ୍ତି। ଢେଙ୍କାନାଳ ଜିଲାର ବ୍ୟସ୍ତବହୁଳ ସଡ଼କରେ ଏଭଳି ଦୃଶ୍ୟ ନିତିଦିନିଆ ହୋଇଗଲାଣି। ଏଭଳି ବେପରୁଆ ଗାଡ଼ିଚାଳକଙ୍କୁ ସାବାଡ କରିବାକୁ ଜିଲା ଆଞ୍ଚଳିକ ପରିବହନ ବିଭାଗ ପକ୍ଷରୁ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରାଯାଉଛି। ନିୟମ ଭାଙ୍ଗିବା ଏବଂ ନିଶାସକ୍ତ ଅବସ୍ଥାରେ ଗାଡ଼ି ଚଳାଇବା ଅଭିଯୋଗରେ ଗତ ଅଢ଼େଇ ବର୍ଷ ମଧ୍ୟରେ ବିଭାଗ ପକ୍ଷରୁ ୪,୧୭୪ଜଣଙ୍କ ଲାଇସେନ୍ସ ରଦ୍ଦ କରାଯାଇଛି।
୨୦୨୧ରେ ଜିଲା ଆଞ୍ଚଳିକ ପରିବହନ ବିଭାଗ ପକ୍ଷରୁ ଯାନବାହନ ଯାଞ୍ଚ କରାଯାଇ ନିୟମ ଉଲ୍ଲଂଘନ ଅଭିଯୋଗରେ ମୋଟ ୧୦୭୬ଟି ଲାଇସେନ୍ସ ରଦ୍ଦ କରାଯାଇଥିଲା। ତନ୍ମଧ୍ୟରେ ଓଭରଲୋଡିଂ ପାଇଁ ୧୧୮ ଜଣଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଥିଲା। ଅନୁରୂପ ଭାବେ ଦ୍ରୁତଗତିରେ ଗାଡ଼ିଚାଳନା ପାଇଁ ୧୮୭, ନିଶା ସେବନ କରି ଗାଡ଼ିଚାଳନା ପାଇଁ ୩୩, ରେଡ୍ଲାଇନ୍ ପାର୍ ହେବା ପାଇଁ ୩, ବେପରୁଆ ଗାଡିଚାଳନା ପାଇଁ ୭୨, ଅଧିକ ଯାତ୍ରୀ ପରିବହନ ପାଇଁ ୧୨, ଗାଡ଼ିଚାଳନା ବେଳେ ମୋବାଇଲ ଫୋନ ବ୍ୟବହାର ପାଇଁ ୪୬, ସିଟ୍ ବେଲଟ୍ ପାଇଁ ୯୪, ହେଲ୍ମେଟ ନ ପିନ୍ଧିବାରୁ ୫୧୧ ଜଣଙ୍କ ବିରୋଧରେ ଦୃଷ୍ଟାନ୍ତମୂଳକ କାର୍ଯ୍ୟାନୁଷ୍ଠାନ ସ୍ବରୂପ ସେମାନଙ୍କ ଲାଇସେନ୍ସ ରଦ୍ଦ କରାଯାଇଛି ା
ସେହିପରି ୨୦୨୨ରେ ମୋଟ ୨,୩୪୪ଟି ଲାଇସେନ୍ସ ରଦ୍ଦ କରାଯାଇଛି। ସେଥିରୁ ଓଭରଲୋଡିଂ ୨୮୯, ଦ୍ରୁତଗତି ୮୮୨, ନିଶାସେବନ କରି ଗାଡ଼ି ଚାଳନା ୧୪୮, ବେନିୟମ ଭାବେ ରେଡ୍ଲାଇଟ୍ ପାର ହେବା ୧, ବେପରୁଆ ଗାଡ଼ିଚାଳନା ୪୫, ଅଧିକ ଯାତ୍ରୀ ପରିବହନ ୨୧, ମୋବାଇଲ ଫୋନ ବ୍ୟବହାର ୪୦, ବିନା ସିଟ୍ ବେଲ୍ଡରେ ଗାଡ଼ିଚାଳନା ୩୯, ବିନା ହେଲ୍ମେଟ୍ରେ ଯାତ୍ରା ଅଭିଯୋଗରେ ୯୫୮ ଲାଇସେନ୍ସ ରଦ୍ଦ କରାଯାଇଛି। ଅନୁରୂପ ଭାବେ ୨୦୨୩ ଜାନୁୟାରୀରୁ ମାର୍ଚ୍ଚ ୧୫ ମଧ୍ୟରେ ୭୫୪ଟି ଲାଇସେନ୍ସ ରଦ୍ଦ ହୋଇଛି। ସେଥିରୁ ଓଭରଲୋଡିଂରେ ୬୭, ମଦ୍ୟପାନ କରି ଗାଡ଼ିଚାଳନାରେ ୪୯, ଦ୍ରୁତଗତି ପାଇଁ ୨୭୨, ବେପରୁଆ ଗାଡ଼ିଚଳାଇ ପାଇଁ ୪, ଅଧିକ ଯାତ୍ରୀ ପରିବହନ ପାଇଁ ୯, ମୋବାଇଲ ଫୋନ୍ ବ୍ୟବହାର କରି ୧୭ ଓ ବିନା ହେଲ୍ମେଟ୍ରେ ଗାଡ଼ିଚାଳନା ପାଇଁ ୩୩୬ ଜଣଙ୍କ ଲାଇସେନ୍ସ ରଦ୍ଦ କରାଯାଇଛି ା
ଏ ସଂକ୍ରାନ୍ତରେ ମୋଟରଯାନ ନିରୀକ୍ଷକ ଦେବାଶିଷ ସ୍ବାଇଁ କୁହନ୍ତି, ସଡ଼କ ସୁରକ୍ଷା ସମ୍ପର୍କରେ ସଚେତନତା ସୃଷ୍ଟି କରିବା ନିମନ୍ତେ ଆଞ୍ଚଳିକ ପରିବହନ ବିଭାଗ ପକ୍ଷରୁ ୫୩ନଂ. ଓ ୫୫ନଂ. ଜାତୀୟ ରାଜପଥ ଏବଂ ରାଜ୍ୟ ରାଜପଥରେ ଯାନବାହନ ଯାଞ୍ଚ କଡ଼ାକଡ଼ି କରାଯାଇଛି। ଅଢ଼େଇ ବର୍ଷ ଭିତରେ ୪,୧୭୪ ଲାଇସେନ୍ସ ରଦ୍ଦ କରାଯାଇଛି। ଜିଲା ଆଞ୍ଚଳିକ ପରିବହନ ଅଧିକାରୀ ପ୍ରଣୟ ମିଶ୍ର କୁହନ୍ତି, ରାଜ୍ୟ ସରକାରଙ୍କ ନିଷ୍ପତ୍ତି କ୍ରମେ ଦୁର୍ଘଟଣାରେ ରୋଜଗାରକ୍ଷମ ବ୍ୟକ୍ତିଙ୍କ ମୃତ୍ୟୁ ହେଲେ ମୃତକଙ୍କ ପରିବାରକୁ ଆଇନଗତ ଭାବେ ସହାୟତା ରାଶି ପ୍ରଦାନ କରାଯାଉଛି। ଜିଲାରେ ୫ ମୃତକଙ୍କ ପରିବାର ଏହାର ଅପେକ୍ଷାରେ ରହିଛନ୍ତି। ଖୁବ୍ଶୀଘ୍ର ସେମାନଙ୍କୁ ସହାୟତା ରାଶି ପ୍ରଦାନ କରାଯିବ।
