ଦିଗପହଣ୍ଡି,୨୫।୧୨(ଅଶେଷ ନାଥ ମିଶ୍ର): ଦିଗପହଣ୍ଡି ବ୍ଳକ ବାସୁଦେବପୁର ଗ୍ରାମର ପି.ଶ୍ରୀୟା ରେଡ୍ଡୀଙ୍କ ସ୍ଵାମୀ ପି.ଶିବରାମ ପାତ୍ର ବିବାହର ୭ ବର୍ଷ ପରେ ପ୍ରତାରଣା କରି ଦ୍ୱିତୀୟ ବିବାହ କରିବାକୁ ଉଦ୍ୟମ କରୁଥିବା ଅଭିଯୋଗ ହୋଇଛି। ପ୍ରତିବାଦରେ ବୁଧବାର ବ୍ରହ୍ମପୁର ସ୍ଥିତ ଏକ ମହିଳା ସ୍ବେଚ୍ଛାସେବୀ ସଙ୍ଗଠନ କାର୍ଯ୍ୟକର୍ତ୍ତାଙ୍କ ସହାୟତାରେ ଶ୍ରୀୟା ତାଙ୍କ ୨ ବର୍ଷର ପୁଅ ସହ ସ୍ବାମୀଙ୍କ ଘର ଆଗରେ ଧାରଣା ଦେବା ଘଟଣା ଚର୍ଚ୍ଚା ର ପ୍ରସଙ୍ଗ ପାଲଟିଛି।
ସ୍ତ୍ରୀଙ୍କ ଧାରଣା ଦେଖି ପି.ଶିବରାମ କୌଶଳକ୍ରମେ ଗାଁ’ରୁ ଫେରାର ହୋଇଯାଇଛନ୍ତି। ଗତ ପ୍ରାୟ ୭ ବର୍ଷ ପୂର୍ବେ ପି.ସୂର୍ଯ୍ୟଙ୍କ ବଡ଼ ପୁଅ ଶିବରାମ ଶ୍ରୀୟାଙ୍କୁ ପ୍ରେମ ବିବାହ କରିଥିଲେ। ପରେ ଉଭୟେ ଚେନ୍ନାଇ ଯାଇ ସେଠାରେ କାମ କରୁଥିଲେ। ଉଭୟଙ୍କ ଔରସରୁ ଏକ ପୁତ୍ର ସନ୍ତାନ ଜନ୍ମ ହୋଇଥିଲା। ଶ୍ରୀୟା ସେଠାରେ କାମ କରୁଥିବା ବେଳେ ପ୍ରତି ମାସର ଦରମା ଟଙ୍କା ତାଙ୍କ ସ୍ବାମୀ ଙ୍କ ଆକାଉଣ୍ଟରେ ଡିପୋଜିଟ କରୁଥିଲେ। ଗତ ପ୍ରାୟ ଦେଢ଼ମାସ ପୂର୍ବେ ସ୍ତ୍ରୀ ଓ ପୁଅକୁ ଚେନ୍ନାଇରେ ଛାଡି ଦେଇ ଶିବରାମ ଗାଁ’କୁ ଚାଲିଆସି ପରିବାର ଲୋକଙ୍କ ଚାପରେ ଅନ୍ୟତ୍ର ବିବାହ କରିବାକୁ ଉଦ୍ୟମ ଚଳାଇଥିବା ଜାଣିବାକୁ ପାଇ ସେ ତାଙ୍କ ସ୍ବାମୀଙ୍କୁ ଫୋନ କରିବାରୁ ”ତୁ ସେଠାରେ ବିଷ ପିଇ ମରିଯା କିମ୍ବା ରଶି ଲଗାଇ ଆତ୍ମହତ୍ୟା କରିବାକୁ କହିଥିଲେ।” ସେ ବାଧ୍ୟ ହୋଇ ଚେନ୍ନାଇରୁ ବ୍ରହ୍ମପୁର ରେଳ ଷ୍ଟେସନରେ ପହଞ୍ଚି ଫୋନରେ ସମସ୍ତ ଘଟଣା ଭଉଣୀ ଭିଣୋଇଙ୍କୁ ଜଣାଇଥିଲେ। ସେ ଦୁହେଁ ବ୍ରହ୍ମପୁର ଷ୍ଟେସନ ରେ ପହଞ୍ଚି ତାଙ୍କୁ ନେଇ ଏକ ଭଡ଼ା ଘରେ ରଖିଥିବା ଶ୍ରୀୟା କହିଛନ୍ତି।
ଦିଗପହଣ୍ଡି ପୋଲିସ ଟିମ୍ ବାସୁଦେବପୁର ଗ୍ରାମରେ ପହଞ୍ଚି ଶ୍ରୀୟାଙ୍କୁ ବୁଝାସୁଝା କରିବା ପରେ ମଧ୍ୟ ତାଙ୍କୁ ସ୍ତ୍ରୀ’ର ମର୍ଯ୍ୟାଦା ଦେବାସହ ପୁଅଙ୍କୁ ପିତୃତ୍ୱର ପରିଚୟ ଦାବୀ ହାସଲ ପର୍ଯ୍ୟନ୍ତ ସେ ତାଙ୍କ ଶାନ୍ତିପୂର୍ଣ୍ଣ ଧାରଣା ଜାରି ରଖିବେ ବୋଲି କହିଛନ୍ତି। ଏନେଇ ଦିଗପହଣ୍ଡି ଥାନା ଆଇଆଇସି ପ୍ରଶାନ୍ତ କୁମାର ପାତ୍ରଙ୍କୁ ପଚାରିବାରୁ ଗତ ନଭେମ୍ବର ୨୪ ତାରିଖରେ ଶ୍ରୀୟା ତାଙ୍କ ସ୍ଵାମୀଙ୍କ ବିରୋଧରେ ଏତଲା ଦେଇଥିଲେ। ଏତଲାକୁ ଭିତ୍ତିକରି ଥାନା ମାମଲା ନଂ.୪୬୫/୨୪ ଅନୁଯାୟୀ ଅଭିଯୁକ୍ତ ସ୍ବାମୀଙ୍କ ବିରୋଧରେ ମକଦ୍ଦମା ରୁଜୁ କରାଯାଇ ଏଏସଆଇ ଅଜୟ କୁମାର ନାୟକଙ୍କୁ ତଦନ୍ତଭାର ଦିଆଯାଇଥିବା କହିଛନ୍ତି।
