ଅନୁଗୋଳ ଅଫିସ, ୬।୮: ଅନୁଗୋଳ ଜିଲାରେ ଗଢ଼ି ଉଠିଛି ଅନେକ ଧର୍ମାନୁଷ୍ଠାନ। ହେଲେ ସେଥିମଧ୍ୟରୁ କେତୋଟି ଧାର୍ମିକ ଅନୁଷ୍ଠାନ ସରକାରୀ ଜାଗାକୁ ଜବରଦଖଲ କରିବାରେ ଲାଗିଛନ୍ତି। ଏପରି କି ଜବରଦଖଲ ଜମିକୁ ପ୍ଲଟିଂ କରି ଲକ୍ଷ ଲକ୍ଷ ଟଙ୍କାରେ ବିକ୍ରି କରୁଛନ୍ତି। କେବଳ ଅନୁଗୋଳ ସହରରେ ୨୫ ଏକର ସରକାରୀ ସମ୍ପତ୍ତି ଧର୍ମାନୁଷ୍ଠାନ ଅକ୍ତିଆରରେ ରହିଛି। ଏପରି ତଥ୍ୟ ପ୍ରଶାସନ ନିକଟରେ ପହଞ୍ଚିବା ପରେ ଧାର୍ମିକ ଅନୁଷ୍ଠାନ ଦଖଲରେ ଥିବା ଜମିର ଯାଞ୍ଚ ଆରମ୍ଭ ହୋଇଛି। ଜବରଦଖଲ ପ୍ରମାଣିତ ହେଲେ ତାହାକୁ ଉଚ୍ଛେଦ କରାଯିବ ବୋଲି ପ୍ରଶାସନ ପକ୍ଷରୁ କୁହାଯାଇଛି। ଅନୁଗୋଳ ଜିଲା ପ୍ରଶାସନର ଏପରି କଠୋର ଆଭିମୁଖ୍ୟ ଦେଖି ବିଭିନ୍ନ ଧର୍ମାନୁଷ୍ଠାନ କର୍ତ୍ତୃପକ୍ଷ ସେମାନଙ୍କ ଜମିର କାଗଜପତ୍ର ଧରି ତହସିଲ ଅଫିସରେ ଲାଇନ ଲଗାଉଥିବା ଦେଖିବାକୁ ମିଳୁଛି।
ଅନୁଗୋଳ ସହରର ହାଟ ଛକରୁ ଖଲାରୀ ଯିବା ରାସ୍ତାରେ ପଡ଼ୁଥିବା ଏକ ଧର୍ମାନୁଷ୍ଠାନ ସରକାରୀ ଜାଗାକୁ ଜବରଦଖଲ କରିଥିଲା। ପାଚେରି ବୁଲାଇ ସରକାରୀ ସମ୍ପତ୍ତିକୁ ନିଜ ଅକ୍ତିଆରକୁ ନେଇଯିବା ପରେ ତାହାକୁ ପ୍ଲଟିଂ କରି ବିକ୍ରି କରୁଥିଲା। ଉକ୍ତ ଖବର ପ୍ରଶାସନ ନଜରକୁ ଆସିବା ପରେ ସେଠାରେ ଜବରଦଖଲ ଉଚ୍ଛେଦ କରାଯାଇଛି। ସେହିପରି ଅନ୍ୟ କେତୋଟି ଧାର୍ମିକ ଅନୁଷ୍ଠାନ ସରକାରୀ ଜମି ମାଡ଼ି ବସିଥିବାରୁ ରାଜସ୍ବ ବିଭାଗ ପକ୍ଷରୁ ଛାନ୍ଭିନ୍ କରାଯାଉଛି। ଗତ ଜୁନ୍ରୁ ଏହି ତଦନ୍ତ ପ୍ରକ୍ରିୟା ଚାଲିଥିବା ସୂଚନା ମିଳିଛି। ଇତିମଧ୍ୟରେ ଅନୁଗୋଳ ସହରରେ ପାଖାପାଖି ୨୫ ଏକର ଜାଗା କେତୋଟି ଧର୍ମାନୁଷ୍ଠାନ ଜବରଦଖଲରେ ଥିବା ଚିହ୍ନଟ କରାଯାଇଛି। ସୌଭାଗ୍ୟନଗର ଠାରେ ଥିବା ଏକ ଧାର୍ମିକ ଅନୁଷ୍ଠାନ ୩ ଏକର ସରକାରୀ ଜାଗା ଦଖଲ କରିଛି। ମାଟିଆସାହିରେ ଥିବା ଏକ ଧର୍ମାନୁଷ୍ଠାନ ୬ ଏକର, ଅନ୍ୟ ଏକ ଧାର୍ମିକ ଅନୁଷ୍ଠାନ ୨.୫୫ ଏକର, ଅମଲାପଡ଼ା ନିକଟରେ ଥିବା ଏକ ଧର୍ମାନୁଷ୍ଠାନ ୧୫ ଗୁଣ୍ଠ, ଶିକ୍ଷକପଡ଼ାରେ ଥିବା ଏକ ଧର୍ମାନୁଷ୍ଠାନ ୫ ଏକର ଜମି ଜବରଦଖଲ କରିଛି। ଯାଞ୍ଚ ଶେଷ ହେବା ପରେ ଏସବୁକୁ ଉଚ୍ଛେଦ କରାଯିବ ବୋଲି ପ୍ରଶାସନ ପକ୍ଷରୁ କୁହାଯାଇଛି। ସହରାଞ୍ଚଳରେ ଥିବା ସରକାରୀ ସମ୍ପତ୍ତିକୁ ଜବରଦଖଲ ମୁକ୍ତ କରାଯିବା ପରେ ଜିଲାର କେଉଁ ସ୍ଥାନରେ କେତେ ସରକାରୀ ଜମି ଧାର୍ମିକ ଅନୁଷ୍ଠାନ ନାମରେ ରହିଛି, ତାହାର ଆକଳନ କରାଯିବ। ଏହାପରେ ଜବରଦଖଲ ମୁକ୍ତ ଅଭିଯାନ ଆରମ୍ଭ ହେବ ବୋଲି ପ୍ରଶାସନ ପକ୍ଷରୁ ସୂଚନା ପ୍ରଦାନ କରାଯାଇଛି।
(ଅମିତ କୁମାର ସାମଲ)
