ଓ୍ବାଶିଂଟନ୍, ୪।୪: ଦୁନିଆରେ ଜନ୍ମ ଓ ମୃତ୍ୟୁ ଏକମାତ୍ର ସତ ବୋଲି କୁହାଯାଏ, ଯାହାର ଜନ୍ମ ଅଛି ତାହାର ମୃତ୍ୟୁ ସୁନିଶ୍ଚିତ। ବିଜ୍ଞାନ ତଥା ଚିକିତ୍ସା କ୍ଷେତ୍ରରେ ଉନ୍ନତି ଯୋଗୁ ବର୍ତ୍ତମାନ ସମୟରେ ବହୁ ଦୁଃସାଧ୍ୟ ରୋଗକୁ ଭଲ କରାଯାଇ ପାରୁଛି। ଫଳରେ ମଣିଷ ନିଜର ମୃତ୍ୟୁ କାଳକୁ କିଛି ସମୟ ପାଇଁ ଟାଳି ଦେଉଛି। ତେବେ ମଣିଷକୁ ଅମର କରି ରଖିବାରେ ଅଦ୍ୟାବଧି କୌଣସି ବୈଜ୍ଞାନିକ ପଦ୍ଧତି ବିକାଶଲାଭ କରି ନାହିଁ। କିନ୍ତୁ ମଣିଷ ଖୁବ୍ଶୀଘ୍ର ଏହାକୁ ସତ ପ୍ରମାଣିତ କରିବାକୁ ଯାଉଛି। ୨୦୩୦ ବେଳକୁ ମଣିଷ ଅମର ହୋଇଯିବ ବୋଲି ଗୁଗଲ କମ୍ପାନୀର ପୂର୍ବତନ ଇଞ୍ଜିନିୟର୍ ରେ’ କୁର୍ଜଓ୍ବେଲ ଦାବି କରିଛନ୍ତି।
କୁର୍ଜଓ୍ବେଲ୍ଙ୍କ ପୁସ୍ତକ ‘ଦ ସିଙ୍ଗୁଲାରିଟି ଇଜ୍ ନିୟର୍’ ଅନୁସାରେ ଭବିଷ୍ୟକତରେ ମଣିଷ ନିଜେ ନଜର ଭାଗ୍ୟ ନିର୍ଦ୍ଧାରଣ କରିବ। ମଣିଷ ଅମର ହେବା ଲାଗି ଯେଉଁ ସ୍ବପ୍ନ ଦେଖିଥିଲା, ତାହା ଆଗାମୀ ୭ ବର୍ଷ ମଧ୍ୟରେ ପୂରା ହେବାକୁ ଯାଉଛି। ଏହା କେବଳ ନାନୋରୋବଟ୍ସ୍ ମାଧ୍ୟମରେ ସମ୍ଭବପର ହେବ ବୋଲି କୁର୍ଜଓ୍ବେଲ୍ ତାଙ୍କ ପୁସ୍ତକ ଜରିଆରେ କହିଛନ୍ତି। ଅନ୍ୟପକ୍ଷେ ଅମରତ୍ୱ ଲାଭ କରିବା ସକାଶେ ବିଜ୍ଞାନାଗାରରେ ବୈଜ୍ଞାନିକମାନଙ୍କ ପକ୍ଷରୁ ଅନେକ ପ୍ରକାର ଗବେଷଣା କରାଯାଉଥିଲେ ହେଁ କୌଣସିଥିରେ ଅଦ୍ୟାବଧି ସଫଳତା ମିଳିପାରି ନାହିଁ।
୨୦୦୫ରେ କୁର୍ଜଓ୍ବେଲଙ୍କ ପୁସ୍ତକ ‘ଦ ସିଙ୍ଗୁଲାର ଇଜ୍ ନିୟର’ ଉନ୍ମୋଚିତ ହୋଇଥିଲା। ନ୍ୟୁୟର୍କ ପୋଷ୍ଟରେ ପ୍ରକାଶିତ ଖବର ଅନୁସାରେ କିଛିଦିନ ପୂର୍ବେ ଟେକ୍ ବ୍ଲଗର୍ ଆଡାଜିଓ ଏ ନେଇ ଏକ ଭିଡିଓ ପ୍ରସ୍ତୁତ କରିଛନ୍ତି। ଜେନେଟିକ୍ସ, ରୋବୋଟିକ୍ସ, ନାନୋ ଟେକ୍ନୋଲୋଜି ଏବଂ ଆର୍ଟିଫିସିଆଲ୍ ଇଣ୍ଟେଲିଜେନ୍ସ (ଏଆଇ) କୁ ପ୍ରୟୋଗ କରି ମଣିଷକୁ ଅମର କରାଯିବ। ୨୦୨୯ବେଳକୁ ଉନ୍ନତମାନର ଏଆଇ ବୈଜ୍ଞାନିକମାନେ ବିକାଶ କରିବେ ବୋଲି କୁର୍ଜଓ୍ବେଲ୍ ୨୦୧୭ରେ କହିଥିଲେ। ‘ଦ ସିଙ୍ଗୁଲାରିଟି ଇଜ୍ ନିୟର୍’ ଅନୁସାରେ ଟେକ୍ନୋଲୋଜିରେ ଦ୍ରୁତ ପରିବର୍ତ୍ତନର ପ୍ରଭାବ ମଣିଷ ଜୀବନ ଉପରେ ପଡ଼ିବ। ଏହାଦ୍ୱାରା ମଣିଷ ନିଜେ ହିଁ ନିଜର ଭାଗ୍ୟ ନିର୍ମାତା ସାଜିବ। ଫଳରେ ମଣିଷ ଯେତିକି ବର୍ଷ ଜିଇବାକୁ ଚାହିଁବ ସେତିକି ସମୟ ଜୀବିତ ରହିପାରିବ। ଏ ନେଇ କରାଯାଇଥିବା ୧୪୭ ପୂର୍ବାନୁମାନ ଭିତରୁ ୮୬% ଆଗାମୀ ଦିନରେ ସତ ହେବାକୁ ଯାଉଥିବା କୁର୍ଜଓ୍ବେଲ ୨୦୧୦ରେ କହିଥିଲେ।
୭୫ ବର୍ଷୀୟ କମ୍ପ୍ୟୁଟର ସାଇଣ୍ଟିଷ୍ଟ୍ କୁର୍ଜଓ୍ବେଲ ୧୯୯୯ରେ ଟେକ୍ନୋଲୋଜି କ୍ଷେତ୍ରରେ ନ୍ୟାଶନାଲ ପୁରସ୍କାରରେ ସମ୍ମାନିତ ହୋଇଛନ୍ତି। କୁର୍ଜଓ୍ବେଲ୍ ପ୍ରଥମ କରି ସିସିଡି ଫ୍ଲାଟ୍-ବେଡ୍ ସ୍କାନର ବିକାଶ କରିଥିଲେ। ୨୦୧୨ରେ ସେ ଗୁଗଲର ଡିରେକ୍ଟର ଅଫ୍ ଇଞ୍ଜିନିୟରିଂ ଦାୟିତ୍ୱ ଗ୍ରହଣ କରିଥିଲେ। ଆମେରିକାର ୩ ରାଷ୍ଟ୍ରପତିଙ୍କ ଦ୍ୱାରା ୧୩ ଡକ୍ଟରେଟ୍ ପୁରସ୍କାରରେ କୁର୍ଜଓ୍ବେଲ୍ ସମ୍ମାନିତ ହୋଇଛନ୍ତି।
