ନୂଆଦିଲ୍ଲୀ,୨୮।୮: ଯଦି ଆପଣ ଭାବୁଛନ୍ତି ଯେ ପେଟ୍ରୋଲ ପମ୍ପ ମାଲିକ ଟ୍ୟାଙ୍କର ଭର୍ତ୍ତି ପେଟ୍ରୋଲ ଆଣି ପ୍ରତି ଲିଟରରେ ୧୦-୧୨ ଟଙ୍କା ରୋଜଗାର କରନ୍ତି, ତେବେ ତାହା ସମ୍ପୂର୍ଣ୍ଣ ଭୁଲ। ପେଟ୍ରୋଲର ମୂଲ୍ୟ ତୈଳ କମ୍ପାନୀ ଓ ସରକାରଙ୍କ ନିୟମ ଅନୁଯାୟୀ ସ୍ଥିର ହୋଇଥାଏ। ଡିଲରଙ୍କୁ ପ୍ରତି ଲିଟରରେ ପ୍ରାୟ ୩-୪ ଟଙ୍କା କମିଶନ ମିଳିଥାଏ। ଏଥିରୁ କର୍ମଚାରୀଙ୍କ ଦରମା, ବିଦ୍ୟୁତ ବିଲ, ମେସିନ ରକ୍ଷଣାବେକ୍ଷଣ, ଭଡ଼ା ଏବଂ ଅନ୍ୟାନ୍ୟ ଖର୍ଚ୍ଚ ବାହାରିଥାଏ। ସବୁ ଖର୍ଚ୍ଚ କାଟିବା ପରେ ଲିଟର ପିଛା ମାତ୍ର ୧-୧.୫ ଟଙ୍କା ହିଁ ଲାଭ ରହେ। ଅର୍ଥାତ ଅଧିକ ରୋଜଗାର ପାଇଁ ଅଧିକ ପେଟ୍ରୋଲ ବିକ୍ରି କରିବା ଆବଶ୍ୟକ।
୧ ଡିସେମ୍ୱର ୨୦୨୪ରୁ ପେଟ୍ରୋଲ ପମ୍ପ ଡିଲରଙ୍କ କମିଶନର ନୂଆ ହିସାବ ଲାଗୁ ହୋଇଛି। ପ୍ରତି ୧,୦୦୦ ଲିଟର ପେଟ୍ରୋଲରେ ତାଙ୍କୁ ୩,୧୪୪.୦୩ ଟଙ୍କାର ର୍ନିଦ୍ଧାରିତ କମିଶନ ମିଳେ। ଅର୍ଥାତ ଲିଟର ପିଛା ପ୍ରାୟ ୩.୧୪ ଟଙ୍କା। ଏହା ବ୍ୟତୀତ ପେଟ୍ରୋଲର ବିଲ ମୂଲ୍ୟର ୦.୮୭୦ ପ୍ରତିଶତ ଭାଗ ମଧ୍ୟ କମିଶନରେ ଯୋଡ଼ିହୁଏ। ଉଭୟକୁ ମିଶାଇ ଡିଲରଙ୍କୁ ଲିଟର ପିଛା ପ୍ରାୟ ୩ ରୁ ୩.୫ ଟଙ୍କା ମିଳିପାରେ। ତେବେ ଏହି ପୂରା ଟଙ୍କା ତାଙ୍କର ଲାଭ ନୁହେଁ, କାରଣ ପମ୍ପ ଚଲାଇବାର ଅନେକ ଖର୍ଚ୍ଚ ଏହି ଅର୍ଥରୁ ହିଁ ବହନ କରାଯାଏ।
ଧରିନିଅନ୍ତୁ କୌଣସି ପେଟ୍ରୋଲ ପମ୍ପ ଦିନକୁ ୧,୦୦୦ ଲିଟର ପେଟ୍ରୋଲ ବିକ୍ରି କରୁଛି। ଏହା ଉପରେ ତାଙ୍କୁ ର୍ନିଦ୍ଧାରିତ କମିଶନ ବାବଦକୁ ପ୍ରାୟ ୩,୧୪୪ ଟଙ୍କା ମିଳିଥାଏ। ଏହା ବ୍ୟତୀତ ବିଲ ମୂଲ୍ୟ ଉପରେ ୦.୮୭୦ ପ୍ରତିଶତ କମିଶନ ମଧ୍ୟ ଯୋଡ଼ିହୁଏ। ଯଦି ବିକ୍ରି ୫,୦୦୦ ଲିଟରରେ ପହଞ୍ଚେ, ତେବେ ର୍ନିଦ୍ଧାରିତ କମିଶନ ପ୍ରାୟ ୧୫,୭୨୦ ଟଙ୍କା ହୋଇଯାଏ ଏବଂ ପ୍ରତିଶତ ହିସାବର କମିଶନ ଅଲଗା ମିଳେ। ତେଣୁ ପେଟ୍ରୋଲ ପମ୍ପର ରୋଜଗାର କେବଳ ଲିଟର ପିଛା କମିଶନରୁ ସ୍ଥିର ହୁଏନାହିଁ, ବରଂ ଦୈନିକ କେତେ ପେଟ୍ରୋଲ ଓ ଡିଜେଲ ବିକ୍ରି ହେଉଛି ତାହା ଉପରେ ର୍ନିଭର କରେ।
ଡିଜେଲ ବିକ୍ରି ଉପରେ ମଧ୍ୟ ପେଟ୍ରୋଲ ପମ୍ପ ଡିଲରଙ୍କୁ ତୈଳ କମ୍ପାନୀରୁ କମିଶନ ମିଳିଥାଏ। ୧ ଡିସେମ୍ୱର ୨୦୨୪ରୁ ପ୍ରତି ୧,୦୦୦ ଲିଟର ଡିଜେଲରେ ପ୍ରାୟ ୨,୩୩୩ ଟଙ୍କାର ର୍ନିଦ୍ଧାରିତ କମିଶନ ରହିଛି। ଅର୍ଥାତ ଲିଟର ପିଛା ପ୍ରାୟ ୨.୩୩ ଟଙ୍କା। ଏହା ବ୍ୟତୀତ ଡିଜେଲ ବିଲ ମୂଲ୍ୟର ୦.୨୬୬ ପ୍ରତିଶତ ଭାଗ କମିଶନ ଭାବେ ଯୋଡ଼ିହୁଏ। ଯଦି କୌଣସି ପମ୍ପ ଦୈନିକ ୫,୦୦୦ ଲିଟର ଡିଜେଲ ବିକ୍ରି କରେ, ତେବେ ର୍ନିଦ୍ଧାରିତ କମିଶନରୁ ପ୍ରାୟ ୧୧,୬୬୩ ଟଙ୍କା ମିଳିବ। ଏହା ଉପରେ ପ୍ରତିଶତ କମିଶନ ଅଲଗା ମିଳିବ।
ଯଦି ଆପଣ ଭାବୁଛନ୍ତି ୧୦୦ ଟଙ୍କାର ପେଟ୍ରୋଲ ବିକ୍ରି କଲେ ମାଲିକଙ୍କୁ ସିଧାସଳଖ ୪ ଟଙ୍କାର ଲାଭ ହୁଏ, ତେବେ ତାହା ନୁହେଁ। ତୈଳ କମ୍ପାନୀରୁ ମିଳୁଥିବା କମିଶନ ତାଙ୍କର ସମ୍ପୂର୍ଣ୍ଣ ରୋଜଗାର ନୁହେଁ। ଏହି ଅର୍ଥରୁ କର୍ମଚାରୀଙ୍କ ଦରମା, ବିଦ୍ୟୁତ୍ ବିଲ, ମେସିନ ରକ୍ଷଣାବେକ୍ଷଣ, ସଫେଇ, ସୁରକ୍ଷା ଏବଂ ଡିଜିଟାଲ ପେମେଣ୍ଟ ଭଳି ଅନେକ ଖର୍ଚ୍ଚ ବହନ କରିବାକୁ ପଡ଼ିଥାଏ।
ଉଦାହରଣ: ଯଦି ଗୋଟିଏ ପେଟ୍ରୋଲ ପମ୍ପ ଦୈନିକ ୫,୦୦୦ ଲିଟର ପେଟ୍ରୋଲ ବିକ୍ରି କରେ, ତେବେ ର୍ନିଦ୍ଧାରିତ କମିଶନରୁ ଦିନକୁ ପ୍ରାୟ ୧୫,୭୨୦ ଟଙ୍କା ମିଳିଥାଏ।ମାସିକ ଆୟ: ଏହି ବିକ୍ରି ପୂରା ୩୦ ଦିନ ଜାରି ରହିଲେ ମାସିକ କମିଶନ ପ୍ରାୟ ୪.୭୧ ଲକ୍ଷ ଟଙ୍କା ହେବ।ପ୍ରକୃତ ଲାଭ: ସବୁ ଖର୍ଚ୍ଚ କାଟିବା ପରେ ଯେଉଁ ଅର୍ଥ ବଞ୍ଚେ, ତାହା ହିଁ ମାଲିକଙ୍କ ପ୍ରକୃତ ଲାଭ। ଯଦି ଏହି ଖର୍ଚ୍ଚ ବାବଦକୁ ପ୍ରାୟ ୨ ଲକ୍ଷ ଟଙ୍କା ଚାଲିଯାଏ, ତେବେ ମାସ ଶେଷରେ ପ୍ରାୟ ୨.୭ ଲକ୍ଷ ଟଙ୍କା ବଞ୍ଚିପାରିବ। ତେଣୁ ୧୦୦ ଟଙ୍କାର ପେଟ୍ରୋଲରେ ୪ ଟଙ୍କାର ଶୁଦ୍ଧ ଲାଭ (Net Profit) ଭାବିବା ଠିକ ନୁହେଁ।
