ମୁମ୍ୱାଇ: ୬୧ ବର୍ଷ ବୟସରେ ବଲିଉଡ ସୁପରଷ୍ଟାର ଆମିର ଖାନ ଏବେ ନିଜର ତୃତୀୟ ବିବାହକୁ ନେଇ ବେଶ ଚର୍ଚ୍ଚାରେ ଅଛନ୍ତି। ନିକଟରେ ଖବର ଆସିଛି ଯେ, ସେ ଖୁବଶୀଘ୍ର ନିଜ ଗର୍ଲଫ୍ରେଣ୍ଡ ଗୌରୀ ସ୍ପ୍ରେଟଙ୍କ ସହ ଏକ ବ୍ୟକ୍ତିଗତ ସମାରୋହରେ ବିବାହ କରିବାକୁ ଯାଉଛନ୍ତି। ଏହା ପୂର୍ୱରୁ ରୀନା ଦତ୍ତା ଏବଂ କିରଣ ରାଓଙ୍କ ସହ ମଧ୍ୟ ତାଙ୍କର ସମ୍ପର୍କ ବେଶ ଖାସ ଏବଂ ଦୀର୍ଘଦିନର ଥିଲା। ତେବେ ଉଭୟଙ୍କ ସହ ୧୬-୧୬ ବର୍ଷ ସଂସାର କରିବା ପରେ ସେ ଅଲଗା ହୋଇଯାଇଥିଲେ। ଏହି ସମୟରେ, ଆସନ୍ତୁ ଜାଣିବା ଅଲଗା ହେବା ପରେ ଆମିର ସେମାନଙ୍କୁ କେତେ ଟଙ୍କାର ଆଲିମନି (ଭରଣପୋଷଣ ଭତ୍ତା) ଦେଇଥିଲେ।
ଆମିର ଖାନଙ୍କ ଲଭ ଷ୍ଟୋରୀ କୌଣସି ଫିଲ୍ମ କାହାଣୀଠାରୁ କମ ନୁହେଁ। ମାତ୍ର ୨୧ ବର୍ଷ ବୟସରେ ଆମିର ୧୯୮୬ ମସିହାରେ ୧୯ ବର୍ଷର ରୀନା ଦତ୍ତାଙ୍କୁ ପ୍ରଥମ ବିବାହ କରିଥିଲେ। ସେତେବେଳେ ଦୁହେଁ ପଡ଼ୋଶୀ ଥିଲେ ଏବଂ ପରସ୍ପରକୁ ଭଲ ପାଇବସିଥିଲେ। ଏହି କାରଣରୁ ଦୁହେଁ ପରିବାରକୁ ନଜଣାଇ ଘରୁ ପଳାଇ ବିବାହ କରିଥିଲେ। ଆମିରଙ୍କ କ୍ୟାରିୟର ସେତେବେଳେ ଆରମ୍ଭ ହେଉଥିଲା ଏବଂ ସେ ‘କୟାମତ ସେ କୟାମତ ତକ’ ଫିଲ୍ମର ସୁଟିଂ କରୁଥିଲେ, ଯେଉଁଥିପାଇଁ ସେ ଏହି କଥାକୁ ସମସ୍ତଙ୍କଠାରୁ ଲୁଚାଇ ରଖିଥିଲେ। କିନ୍ତୁ ଯେତେବେଳେ ଏହି ଫିଲ୍ମ ସୁପରହିଟ ହେଲା, ସେହି ବର୍ଷ ଶେଷ ସୁଦ୍ଧା ସେ ନିଜ ବିବାହ ବିଷୟରେ ସମସ୍ତଙ୍କୁ ଜଣାଇଥିଲେ।
ରୀନା ଏବଂ ଆମିରଙ୍କର ଦୁଇଟି ସନ୍ତାନ ଅଛନ୍ତି ଜୁନୈଦ ଏବଂ ଇରା। ତେବେ ଏହି ସମ୍ପର୍କ ଅଧିକ ଦିନ ଚାଲିପାରିନଥିଲା ୨୦୦୨ ମସିହାରେ ଦୁହେଁ ଆପୋଷ ବୁଝାମଣାରେ ଛାଡ଼ପତ୍ର ନେଇଥିଲେ। ଗଣମାଧ୍ୟମର ରିପୋର୍ଟ ଅନୁଯାୟୀ, ଆମିର ଖାନ ଆଲିମନି ବାବଦକୁ ରୀନା ଦତ୍ତାଙ୍କୁ ୫୦ କୋଟି ଟଙ୍କା ଦେଇଥିଲେ।
ଅନ୍ୟପକ୍ଷରେ, ଦ୍ୱିତୀୟ ପତ୍ନୀଙ୍କ କଥା କହିବାକୁ ଗଲେ, ନିର୍ଦ୍ଦେଶିକା କିରଣ ରାଓଙ୍କ ସହ ଆମିର ଖାନଙ୍କ ଲଭ ଷ୍ଟୋରୀ ‘ଲଗାନ’ ଫିଲ୍ମର ସେଟ୍ରୁ ଆରମ୍ଭ ହୋଇଥିଲା। ରୀନାଙ୍କଠାରୁ ଛାଡ଼ପତ୍ର ପରେ ସେ ବହୁତ ମାନସିକ ଚିନ୍ତାରେ ରହୁଥିଲେ ଏବଂ ସେହି କଠିନ ସମୟରେ କିରଣ ତାଙ୍କୁ ସମ୍ଭାଳିଥିଲେ। ଧୀରେ ଧୀରେ ଦୁହିଁଙ୍କ ବନ୍ଧୁତା ପ୍ରେମରେ ବଦଳିଯାଇଥିଲା ଏବଂ ବିବାହ ପୂର୍ୱରୁ ହିଁ ଦୁହେଁ ଲିଭ-ଇନରେ ରହୁଥିଲେ।
୨୦୦୫ ମସିହାରେ ଦୁହେଁ ବିବାହ ବନ୍ଧନରେ ବାନ୍ଧି ହୋଇଥିଲେ, ସେତେବେଳେ କିରଣ ଆମିରଙ୍କଠାରୁ ୧୦ ବର୍ଷ ସାନ ଥିଲେ। ଏହାପରେ ୨୦୧୧ ମସିହାରେ ଦୁହେଁ ସେମାନଙ୍କ ପୁତ୍ର ଆଜାଦଙ୍କୁ ସୱାଗତ କରିଥିଲେ। କିନ୍ତୁ ଏହି ସମ୍ପର୍କ ମଧ୍ୟ ୧୬ ବର୍ଷରୁ ଅଧିକ ଚାଲିପାରିନଥିଲା ଏବଂ ୨୦୨୧ ମସିହାରେ ଦୁହେଁ ଅଲଗା ହୋଇଯାଇଥିଲେ। ତେବେ କିରଣଙ୍କ ଆଲିମନିକୁ ନେଇ କୌଣସି ସଠିକ ଖବର ସାମ୍ନାକୁ ଆସିନାହିଁ।
ସୂଚନାଯୋଗ୍ୟ ଯେ, ଗୌରୀ ସ୍ପ୍ରେଟଙ୍କ ସହ ଆମିର ଖାନ ପ୍ରାୟ ବର୍ଷରୁ ଅଧିକ ସମୟ ହେବ ସମ୍ପର୍କରେ ଅଛନ୍ତି। ନିଜର ୬୦ତମ ଜନ୍ମଦିନରେ ସେ ଗଣମାଧ୍ୟମକୁ ଗୌରୀଙ୍କ ବିଷୟରେ ଜଣାଇଥିଲେ ଏବଂ ସେବେଠାରୁ ଦୁହିଁଙ୍କୁ ଏକାଠି ଦେଖିବାକୁ ମିଳୁଛି। ଆମିର ମଧ୍ୟ ତାଙ୍କ ସହ ବହୁତ ଖୁସି ଅଛନ୍ତି ଏବଂ ଏହି ସମ୍ପର୍କକୁ ଏକ ନୂଆ ନାମ ଦେବାକୁ ଚାହୁଁଛନ୍ତି। ଏହି କାରଣରୁ ଆସନ୍ତା ଜୁଲାଇ ୫ ତାରିଖରେ ଦୁହେଁ ନିଜ ଘରେ ପରିବାର ଏବଂ ନିକଟତର ସଙ୍ଗୀସାଥୀଙ୍କ ଗହଣରେ ବିବାହ କରିବାକୁ ଯାଉଛନ୍ତି।
