ଜୟପୁର, ୩୦।୬: କରୋନା ସଂକ୍ରମଣ ନେଇ ଏବେ ଲୋକଙ୍କ ମଧ୍ୟରେ ଆତଙ୍କ ଦେଖାଦେଇଛି। ବହୁ ଗୁରୁତର ସମସ୍ୟା ନେଇ ଆସୁଥିବା ରୋଗୀଙ୍କୁ ମଧ୍ୟ ହସ୍ପିଟାଲରେ ଭର୍ତ୍ତି କରାଯିବାକୁ ମନା କରି ଦିଆଯାଉଛି। ରାଜସ୍ଥାନ ବାଂସଓ୍ବାଡ଼ାରେ ଏଭଳି ଏକ ଅଭାବନୀୟ ଘଟଣା ଘଟିଛି। ସ୍ଥାନୀୟ କରଣଘାଟି ଗାଁ ବାସିନ୍ଦା ମାନସିଂଙ୍କ ଗର୍ଭବତୀ ସ୍ତ୍ରୀ କାନ୍ତୁଙ୍କର ପ୍ରସବ ଯନ୍ତ୍ରଣା ସୋମବାର ରାତ୍ରରେ ଆରମ୍ଭ ହୋଇଥିଲା। ଗାଁରେ ଥିବା ପ୍ରାଥମିକ ସ୍ବାସ୍ଥ୍ୟ କେନ୍ଦ୍ର ପକ୍ଷରୁ କାନ୍ତୁଙ୍କୁ ବାଂସଓ୍ବାଡ଼ା ହସ୍ପିଟାଲ ନେବାକୁ କୁହାଯାଇଥିଲା। ତେବେ ନେବା ଲାଗି କୌଣସି ଆମ୍ବୁଲାନ୍ସ୍ ବ୍ୟବସ୍ଥା କରାଯାଇ ନ ଥିଲା। ମାନସିଂ ଏକ ଘରୋଇ ଗାଡ଼ିରେ କାନ୍ତୁଙ୍କୁ ନେଇ ହସ୍ପିଟାଲ ଅଭିମୁଖେ ବାହାରି ଥିଲେ। ତେବେ ବାଟରେ ଅତ୍ୟଧିକ ଯନ୍ତ୍ରଣା ହେବାରୁ ତାଙ୍କୁ ମୋହକମପୁରା ହସ୍ପିଟାଲରେ ଭର୍ତ୍ତି ଲାଗି ମାନସିଂ ନେଇଥିଲେ। କିନ୍ତୁ ହସ୍ପିଟାଲ କର୍ତ୍ତୃପକ୍ଷ ଭର୍ତ୍ତି କରିବାକୁ ମନା କରିଥିଲେ। କିନ୍ତୁ ବାଂସଓ୍ବାଡ଼ା ଯିବା ପାଇଁ ସମୟ ନ ଥିଲା। ମାନସିଂ ହସ୍ପିଟାଲ ପରିସରରେ ଅପେକ୍ଷା କରିଥିଲେ। ଅତ୍ୟଧିକ ଯନ୍ତ୍ରଣା ହେବାରୁ କାନ୍ତୁଙ୍କ ପ୍ରସବ ତାଙ୍କ ଶାଶୁ ନିକସ୍ଥ ରାସ୍ତା କଡ଼ରେ କରାଇଥିଲେ। ଏଠାରେ ସେଲୁନ୍ କରିଥିବା ଜଣେ ବ୍ୟକ୍ତି ଏକ ଚାଦର ଦେଇଥିଲେ। ଚାଦର ଘେରାଇ କାନ୍ତୁଙ୍କ ପ୍ରସବ କରାଯାଇଥିଲା। ପ୍ରସବର ଅଧଘଣ୍ଟା ପରେ ମୋହକମପୁରା ହସ୍ପିଟାଲର ଆୟୁର୍ବେଦିକ ମେଲ୍ ନର୍ସିଂ ଷ୍ଟାଫ୍ ଶିଶୁର ନାହିନାଡ଼ କାଟିବା ସହିତ ତାଙ୍କୁ କୁଶଲଗଡ଼ ନେଇ ଯିବାକୁ ପରାମର୍ଶ ଦେଇଥିଲେ। ଖବର ପ୍ରଚାର ହେବା ପରେ ହସ୍ପିଟାଲ ସିଏମ୍ଓ ଡ. ଏଚ୍.ଏଲ୍. ତାବିୟାର କହିଛନ୍ତି ଯେ, କରୋନା ସଂକ୍ରମଣ ଲାଗି ଏପରି କରା ଯାଇନାହିଁ। ମୋହକମପୁରାରେ ଜଣେ ନର୍ସିଂ କର୍ମଚାରୀ ଥିଲେ। ତେଣୁ ଗର୍ଭବତୀଙ୍କୁ କୁଶଲଗଡ଼ ନେବାକୁ କୁହାଯାଇଥିଲା। ତେବେ କୁଶଲଗଡ଼ରେ କାହିଁକି ଡାକ୍ତର ଉପସ୍ଥିତ ନ ଥିଲେ ଏହାର ତଦନ୍ତ ପାଇଁ ନିର୍ଦ୍ଦେଶ ଦିଆଯାଇଛି।
