ଲକ୍ଷ୍ନୌ,୧୭।୧୨: ଉତ୍ତରପ୍ରଦେଶର ମୁଜାଫରନଗର ଜିଲାରେ ଏକ ଅଭାବନୀୟ ଘଟଣା ଘଟିଛି। ରାସ୍ତାକଡରେ ଜଣେ ବେସାହାରା କୁନି ବାଳକ ଏକ କୁକୁର ସହିତ ଶୋଇଥିବା ଫଟୋ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ଫଟୋ ଭାଇରାଲ ହେବା ପରେ ଜିଲା ପ୍ରଶାସନ କାର୍ଯ୍ୟାନୁଷ୍ଠାନ ଗ୍ରହଣ କରିଥିଲା ଏବଂ ବରିଷ୍ଠ ଅଧିକାରୀଙ୍କ ନିର୍ଦ୍ଦେଶ କ୍ରମେ ଜିଲା ପୋଲିସ ଏହି ଅସହାୟ ବାଳକକୁ ନିଜ ଆୟତକୁ ନେଇଥିଲା। ଏହାପରେ ବାଳକର ଭାବପ୍ରବଣ କାହାଣୀ ଶୁଣି ସମସ୍ତଙ୍କ ଆଖିରୁ ଆସିଯାଇଥିଲା ଲୁହ। ପ୍ରାୟ ୯ ରୁ ୧୦ ବର୍ଷର ଦେଖାଯାଉଥିବା ଏହି ବାଳକଙ୍କ ନାମ ଅଙ୍କିତ। ସ୍ଥାନୀୟ ପିଲାଙ୍କ କହିବାନୁସାରେ, ତାଙ୍କ ବାପା ଜେଲରେ ଅଛନ୍ତି ଏବଂ ମାଆ ଚାଲିଯାଇଛନ୍ତି। ଏହି ନିରୀହ ପିଲାଟି ତାଙ୍କ ପରିବାର କିମ୍ବା ଘର ବ୍ୟତୀତ ଅନ୍ୟ କାହା ବିଷୟରେ ଜାଣେ ନାହିଁ। ଚା ’ଦୋକାନରେ କାମ କରି ଟଙ୍କା ରୋଜଗାର କରି ପେଟ ପୋଷନ୍ତି। ନିଜେ ଖାଇବା ସହ କୁକୁରକୁ ମଧ୍ୟ ଖାଇବାକୁ ଦିଅନ୍ତି। କୁକୁରକୁ ସେ ଡାନି ବୋଲି ଡାକନ୍ତି । ରାତିରେ ଅସହ୍ୟ ଥଣ୍ଡାରେ ମୁଜାଫରନଗରର ଶିବ ଚକ ବଜାରରେ ଥିବା ଏକ ଦୋକାନ ଆଗରେ ଶୋଇଥିଲେ। କୁକୁରଟି ରାତିସାରା ଏହାର ମାଲିକର ଯତ୍ନ ନେଉଥିଲା। କିଛି ଦିନ ପୂର୍ବରୁ ନିଆଯାଇଥିବା ଶିଶୁର ଏହି ଫଟୋ ଭାଇରାଲ ହେବା ପରେ ଜିଲାର ଏସଏସପି ଅଭିଷେକ ଯାଦବ ବାଳକକୁ ଖୋଜିବା ପାଇଁ ପୋଲିସ ଟିମ ଗଠନ କରିବା ପରେ ସହରରୁ ପୋଲିସ ଉଦ୍ଧାର କରିଥିଲା। ଏବେ ବାଳକଟିକୁ ଶିଶୁ ଓ ମହିଳା କଲ୍ୟାଣ ବିଭାଗର ତତ୍ତ୍ୱାବଧାନରେ ଛଡାଯାଇଛି।
