ଯାଜପୁର ଅଫିସ,୩ା୫:ରାଜ୍ୟର ବିଭିନ୍ନ ଆଞ୍ଚଳିକ ପରିବହନ କାର୍ଯ୍ୟାଳୟ(ଆର୍ଟିଓ)ରେ କନଷ୍ଟେବଳ ନିଯୁକ୍ତି ନ ହେବା ପର୍ଯ୍ୟନ୍ତ ୮୦ ଜଣ ହୋମଗାର୍ଡ ସଡକ ସୁରକ୍ଷା କାର୍ଯ୍ୟରେ ନିୟୋଜିତ ହେବେ। କଟକ ପରିବହନ ଆୟୁକ୍ତ(ଟ୍ରାନ୍ସପୋର୍ଟ କମିଶନର)ଙ୍କ ଏହି ପ୍ରସ୍ତାବକୁ ବାଣିଜ୍ୟ ଓ ପରିବହନ ବିଭାଗର ଯୁଗ୍ମ ସଚିବ କିଶୋର ଚନ୍ଦ୍ର ଦାସ ଗତ ୩୦ ତାରିଖରେ ମଞ୍ଜୁର କରିଛନ୍ତି। ଏହାସହ ହୋମଗାର୍ଡ ନିଯୁକ୍ତିରେ ହେବାକୁ ଥିବା ଖର୍ଚ୍ଚ ସଡକ ସୁରକ୍ଷା ପାଣ୍ଠିରୁ ବିନିଯୋଗ କରାଯିବ। ତେବେ ହୋମଗାର୍ଡମାନେ ସଡ଼କ ସୁରକ୍ଷା କାର୍ଯ୍ୟରେ କେତେଦୂର ଉପଯୋଗୀ ହୋଇପାରିବେ ତାହା ସାଧାରଣରେ ପ୍ରଶ୍ନବାସୀ ସୃଷ୍ଟି କରିଛି। ରାଜ୍ୟର ବିଭିନ୍ନ ଜାତୀୟ ରାଜପଥ ଏବଂ ରାସ୍ତାରେ ବେଆଇନ ପାର୍କିଂ ଥମିବାର ନଁା ଧରୁ ନାହିଁ। ଯାଜପୁର ଜିଲା କଳିଙ୍ଗନଗର ଶିଳ୍ପାଞ୍ଚଳର ଡୁବୁରୀଠାରୁ ଗୋପବନ୍ଧୁ ଛକ ମାର୍ଗ ପର୍ଯ୍ୟନ୍ତ ଏବଂ ୨୦୦ ନମ୍ବର ଜାତୀୟ ରାଜପଥର ପାଣିକୋଇଲି ଛକଠାରୁ ବେଣାପୁର ଛକ ପର୍ଯ୍ୟନ୍ତ ରାସ୍ତାକୁ ଉଦାହରଣ ଭାବେ ନିଆଯାଇପାରେ। ଏହି ରାସ୍ତାର ଉଭୟ ପାର୍ଶ୍ୱରେ ବେଆଇନ ଟ୍ରକ ପାର୍କିଂ ବନ୍ଦ ହେଉନାହିଁ। ଯେତେ ଅଭିଯୋଗ କଲେ ମଧ୍ୟ କେତେଜଣ ଦୁର୍ନୀତିଗ୍ରସ୍ତ କର୍ମଚାରୀଙ୍କ ଅବହେଳା ଯୋଗୁ ଏଥିପାଇଁ ଦୁର୍ଘଟଣା ବଢିବାରେ ଲାଗିଛି ବୋଲି ମତପ୍ରକାଶ ପାଇଛି। ଅନ୍ୟପକ୍ଷେ ବାଣିଜ୍ୟ ଓ ପରିବହନ ବିଭାଗର ପ୍ରିନ୍ସିପାଲ ସେକ୍ରେଟାରୀ ବିଷ୍ଣୁପଦ ସେଠୀ ଦୁର୍ଘଟଣା ଏବଂ ଦୁର୍ଘଟଣା ଜନିତ ମୃତ୍ୟୁକୁ ହ୍ରାସ କରିବାକୁ ଦୃଢ ଭାବେ ପଦକ୍ଷେପ ନେବାକୁ ରାଜ୍ୟର ସମସ୍ତ ଆରଟିଓ ଅଧିକାରୀଙ୍କୁ ନିର୍ଦ୍ଦେଶ ଦେଇଛନ୍ତି। ଏହି ନିର୍ଦ୍ଦେଶପତ୍ରରେ ସେ ରାଜ୍ୟରେ ଅବିଚଳ ଭାବେ ଦୁର୍ଘଟଣା ଜନିତ ମୃତ୍ୟୁହାର ବୃଦ୍ଧି ପାଉଛି ବୋଲି ଦର୍ଶାଇ ୨୦୧୪ରେ ୩୯୩୧ ଜଣ ଏବଂ ୨୦୨୧ରେ ୫୦୮୧ରେ ଜଣଙ୍କ ମୃତ୍ୟୁ ହୋଇଥିଲା ବୋଲି କହିଛନ୍ତି। ଅର୍ଥାତ ଏହି ୮ ବର୍ଷରେ ମୃତ୍ୟୁ ସଂଖ୍ୟା ୨୯%କୁ ବୃଦ୍ଧି ପାଇଛି ବୋଲି ସେ ଦର୍ଶାଇଛନ୍ତି। ୧୯ା୪ା୨୦୨୨ରେ ମୁଖ୍ୟ ଶାସନ ସଚିବ ଏବଂ ବରିଷ୍ଠ ଅଧିକାରୀଙ୍କୁ ନେଇ ଅନୁଷ୍ଠିତ ଆଲୋଚନାରେ ‘ସୁପ୍ରିମକୋର୍ଟ କମିଟି ଅନ୍ ରୋଡ୍ ସେଫଟି’ର ଅଧ୍ୟକ୍ଷ ଏନେଇ ଉଦ୍ବେଗ ପ୍ରକାଶ କରିଛନ୍ତି। ବିଶେଷକରି ଏମ୍ଭି ଆକ୍ଟର ଉଲ୍ଲଂଘନକୁ ଏଥିପାଇଁ ଦାୟୀ କରାଯାଇଛି। ତେଣୁ ଏହାକୁ ରୋକିବାକୁ ଏନଫୋର୍ସମେଣ୍ଟ ଅଫିସିଆଲଙ୍କ ବହୁ ଗୁରୁତ୍ୱପୂର୍ଣ୍ଣ ଭୂମିକା ରହିଛି। ଗୋଟିଏ ଟ୍ରାଫିକ ଆଇନ ଉଲ୍ଲଂଘନ ଲୋକଙ୍କ ଜୀବନ ନେଉଛି। ତେଣୁ ଟ୍ରାଫିକ ଆଇନ ଉଲ୍ଲଂଘନକାରୀଙ୍କ ବିରୋଧରେ କୌଣସି ସମବେଦନା ନ ଜଣାଇ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯାଉ ବୋଲି ସଚିବ ସେଠୀ ତାଙ୍କ ପତ୍ରରେ ଆହ୍ବାନ ଦେଇଛନ୍ତି।
