ନୂଆଦିଲ୍ଲୀ, ୧୪ା୬: ଦୀର୍ଘ ୮ ବର୍ଷ ପରେ ଆୟୋଜିତ ହେବାକୁ ଯାଉଛି ହକି ଇଣ୍ଡିଆ ଲିଗ୍(ଏଚ୍ଆଇଏଲ୍)। ଏଥିରେ ୮ ପୁରୁଷ ଓ ୬ ମହିଳା ଦଳ ଅଂଶଗ୍ରହଣ କରିବେ। ପଞ୍ଜୀକରଣ ପାଇଁ ଅନ୍ତିମ ଦିବସ ଜୁନ୍ ୩୦ ରଖାଯାଇଛି।
ଲିଗ୍ରେ ଭାଗ ନେବାକୁ ଆଗ୍ରହୀ ଖେଳାଳି ଓ ସପୋର୍ଟ ଷ୍ଟାଫ୍ଙ୍କଠାରୁ ହକି ଇଣ୍ଡିଆ ଦରଖାସ୍ତ ଆହ୍ବାନ କରିଛି। ଏଚ୍ଆଇଏଲ୍ ଡିସେମ୍ବର ୨୦୨୪ ଓ ୨୦୨୫ ଫେବୃଆରୀ ମଧ୍ୟରେ ହେବ। ଲିଗ୍ ଯେଉଁ ସମୟରେ ହେବ ତାହା ଇଣ୍ଟରନ୍ୟାଶନାଲ ହକି ମହାସଂଘ (ଏଫ୍ଆଇଏଚ୍) ଦ୍ୱାରା ଅନୁମୋଦନ ଲାଭ କରିଛି।
ଏହି ପରିପ୍ରେକ୍ଷୀରେ ହକି ଇଣ୍ଡିଆର ସଭାପତି ଦିଲୀପ ତିର୍କୀ ଏକ ପ୍ରେସ୍ ଇସ୍ତାହାରରେ କହିଛନ୍ତି ଯେ, ଏଚଆଇଏଲ୍ ବିଶ୍ୱବ୍ୟାପୀ ହକି ଖେଳାଳି ଓ ସମର୍ଥକ ମାନଙ୍କ ଦ୍ୱାରା ବେଶ୍ ଆଦୃତ ଲାଭ କରିପାରିଥିଲା। ଆମେ ଏଚ୍ଆଇଏଲ୍ର ପୁନଃ ଆରମ୍ଭ କରିବାକୁ ଯାଉଛି ବୋଲି ନିଆଯାଇଥିବା ପଦକ୍ଷେପରୁ ସୂଚୀତ ହେଉଛି।
ଭାରତର ଉଦୀୟମାନ ଖେଳାଳିମାନେ ଏହି ଲିଗ୍ରେ ଅଂଶଗ୍ରହଣ କରିବା ଦ୍ୱାରା ସେମାନେ ବିଶ୍ୱର ଶ୍ରେଷ୍ଠ ଖେଳାଳିମାନଙ୍କ ସହ ଖେଳିବାର ସୁଯୋଗ ପାଇବେ। ଏଚ୍ଆଇଏଲ୍ ପ୍ରଥମେ ୨୦୧୩ରେ ଆରମ୍ଭ ହୋଇଥିଲା। ଶେଷଥର ପାଇଁ ଏହା ୨୦୧୭ରେ ଖେଳାଯାଇଥିଲା। ଏଥିରେ କଳିଙ୍ଗ ଲାନ୍ସର୍ସ ଟାଇଟଲ ବିଜୟୀ ହୋଇଥିଲା। ସମସ୍ତ ୫ଟି ସଂସ୍କରଣରେ ଭିନ୍ନ ଭିନ୍ନ ଦଳ ଚାମ୍ପିୟନ ହୋଇଛନ୍ତି। ରାଞ୍ଚି ଦୁଇଥର ଟାଇଟଲ ଜିତିଥିଲା। ରାଞ୍ଚି ରାଇନୋଜ ଉଦ୍ଘାଟନୀ ସଂସ୍କରଣରେ ଚାମ୍ପିୟନ ହୋଇଥିଲା। ଏହାପରେ ଦଳ ଅଂଶଗ୍ରହଣରୁ ବିରତ ରହିଥିଲା। ପରେ ଏକ ନୂଆ ରାଞ୍ଚିଫ୍ରାଞ୍ଚାଇଜ୍ ଗଠିତ ହୋଇଥିଲା। ଏହାର ନାମ ରଖାଯାଇଥିଲା ରାଞ୍ଚି ରେଜ୍। କିମ୍ବଦନ୍ତୀ କ୍ରିକେଟର ମହେନ୍ଦ୍ର ସିଂ ଧୋନୀ ଏହାର ମାଲିକ ରହିଥିଲେ। ଏହି ଦଳ ୨୦୧୫ରେ ଏହାର ପଦାର୍ପଣ ବର୍ଷରେ ଟାଇଟଲ ବିଜୟୀ ହୋଇପାରିଥିଲା।
