ନୂଆଦିଲ୍ଲୀ,୧୪।୧: ଦେଶରେ ହିନ୍ଦୁମାନେ କେବଳ ଥରେ ବିବାହ କରିପାରିବେ ବୋଲି ପ୍ରାବଧାନ ରହିଛି। ଯଦି ପ୍ରଥମ ସ୍ତ୍ରୀ ଜୀବିତ ଥିବାବେଳେ ଦ୍ୱିତୀୟ ବିବାହ କରୁଛନ୍ତି ତେବେ ତାହା ଅପରାଧ ବୋଲି ଧରାଯାଏ। ତଥାପି, ଭାରତରେ ହିନ୍ଦୁଙ୍କୁ ଏକାଧିକ ବିବାହ କରିବାକୁ ଅନୁମତି ଦିଆଯାଇଛି।
ଗୋଆରେ ହିନ୍ଦୁଙ୍କୁ ଏକାଧିକ ବିବାହ ପାଇଁ ଅନୁମତି ରହିଛି। ଯେତେବେଳେ ଗୋଆ ପର୍ତ୍ତୁଗୀଜ ଅଧୀନରେ ଥିଲା, ସେଠାରେ ପର୍ତ୍ତୁଗୀଜ ସିଭିଲ କୋଡ କାର୍ଯ୍ୟକାରୀ କରାଯାଇଥିଲ। ଭାରତରେ ବ୍ରିଟିଶ ଶାସନ ସମୟରେ କୌଣସି ସିଭିଲ କୋଡ ତିଆରି କରାଯାଇ ନ ଥିଲା। କିନ୍ତୁ ପର୍ତ୍ତୁଗାଲ ସରକାର ଏହାକୁ କାର୍ଯ୍ୟକାରୀ କରିଥିଲେ। ଯେତେବେଳେ ପର୍ତ୍ତୁଗୀଜ ସରକାର ଗୋଆ ପାଇଁ ଏହି ଆଇନ ପ୍ରସ୍ତୁତ କରିଥିଲେ, ଗୋଆରେ କେବଳ ଦୁଇଟି ଧର୍ମର ଲୋକଙ୍କ ସଂଖ୍ୟାଗରିଷ୍ଠ ଥିଲା। ସେମାନେ ହେଲେ ଖ୍ରୀଷ୍ଟିଆନ ଓ ହିନ୍ଦୁ।
ତେବେ ସେହି ସମୟରେ ସେଠାରେ ହିନ୍ଦୁମାନଙ୍କ ମଧ୍ୟରେ ଏକାଧିକ ବିବାହର ପ୍ରଥା ଥିଲା। ଯେତେବେଳେ ଗୋଆରେ ୟୁନିଫର୍ମ ସିଭିଲ କୋଡ ଆଇନ ହେଲା, ଏହା ସମସ୍ତଙ୍କ ପାଇଁ ଲାଗୁ ହୋଇଥିଲା। ନିୟମ ଅନୁଯାୟୀ, ସେଠାରେ ଜନ୍ମ ହୋଇଥିବା ହିନ୍ଦୁମାନଙ୍କୁ କେବଳ ଦ୍ୱିତୀୟ ଥର ବିବାହ କରିବାକୁ ଅନୁମତି ଦିଆଯାଇଥିଲା।
ଗୋଆ ସ୍ବାଧୀନ ହେବା ପରେ ସମାନ ସିଭିଲ କୋଡ ନୂଆ ରାଜ୍ୟରେ ମଧ୍ୟ ଗ୍ରହଣ କରାଯାଇଥିଲା ଯାହା ପର୍ତ୍ତୁଗୀଜ ଅଧୀନରେ ୯୩ ବର୍ଷ ଧରି ଚାଲିଥିଲା। କିଛି ନିର୍ଦ୍ଧିଷ୍ଟ ପରିସ୍ଥିତିରେ ହିନ୍ଦୁମାନଙ୍କୁ ସେଠାରେ ଏକରୁ ଅଧିକ ବିବାହ କରିବାକୁ ଅନୁମତି ଦିଆଯାଇଛି। ଯଦି ୨୫ ବର୍ଷ ବୟସ ପର୍ଯ୍ୟନ୍ତ ସ୍ତ୍ରୀଙ୍କର କୌଣସି ସନ୍ତାନ ନ ହୁଏ, ତେବେ ସ୍ବାମୀ ପୁନର୍ବାର ବିବାହ କରିପାରିବେ। ସେହିପରି ଯଦି ୩୦ ବର୍ଷ ବୟସ ପର୍ଯ୍ୟନ୍ତ ସ୍ତ୍ରୀ ପୁଅ ଜନ୍ମ କରିବାରେ ଅସମର୍ଥ, ତେବେ ସ୍ବାମୀ ପୁନର୍ବାର ବିବାହ କରିପାରିବେ।
କେବଳ ଗୋଆ ନୁହେଁ ମିଜୋରାମରେ ଏକ ଜନଜାତି ଅଛି, ଯାହାକୁ ଲମ୍ପା କୋହରାନ ତର କିମ୍ବା ଚାନା କୁହାଯାଏ। ଯେଉଁଥିରେ ଜଣେ ପୁରୁଷ ଏକାଧିକ ସ୍ତ୍ରୀଙ୍କୁ ବିବାହ କରି ପାରିବେ। ଏହି ଜନଜାତି ଖ୍ରୀଷ୍ଟିଆନ ଧର୍ମରେ ବିଶ୍ୱାସ କରନ୍ତ। ମିଜୋରାମରେ, ଚାନା ଜନଜାତିର ପୁରୁଷଙ୍କୁ ଏକାଧିକ ବିବାହ କରିବାକୁ ଅନୁମତି ଦିଆଯାଇଛି। ଏହି ଜନଜାତିର ଜିଓନା ଚାନା, ଯିଏ ଗତ ବର୍ଷ ମୃତ୍ୟୁ ବରଣ କରିଥିଲେ। ସରକାରୀ ତଥ୍ୟ ଭାବେ ତାଙ୍କର ୩୮ ଜଣ ସ୍ତ୍ରୀ ଥିଲେ।
