ହାଟଡ଼ିହୀ,୩୦ା୯(ଡି.ଏନ.ଏ.)- କେନ୍ଦୁଝର ଜିଲା ହାଟଡ଼ିହୀ ବ୍ଲକ କପୁଣ୍ଡି ଗ୍ରାମର ବୃନ୍ଦାବନ ପଲେଇଙ୍କ ପରିବାର ଦୟନୀୟ ଅବସ୍ଥାରେ କାଳାତିପାତ କରୁଛନ୍ତି। ସ୍ତ୍ରୀ, ଦୁଇ ବିଧବା ବୋହୂ ଓ ୪ ନାତୁଣି ନାତିଙ୍କୁ ମିଶାଇ ଆଠ ପ୍ରାଣୀ କୁଟୁମ୍ବଙ୍କ ପେଟ ଚିନ୍ତା ଘାରୁଛି ବୟସର ଅପରାହ୍ନରେ ପହଞ୍ଚିଥିବା ବୃନ୍ଦାବନଙ୍କୁ। ଦୁଇ ପୁଅ ଆରପାରିକୁ ଚାଲି ଯିବା ପରେ ତାଙ୍କ ପରିବାର ଉପରେ ଯେମିତି ଦୁଃଖର ପାହାଡ଼ ଭାଙ୍ଗି ପଡ଼ିଛି। ଚାଲି ବୁଲି ପାରୁ ନ ଥିବା ବୃନ୍ଦାବନ ଓ ତାଙ୍କ ସ୍ତ୍ରୀ ଏବେ ସେମାନଙ୍କ ପରିବାରର ଭବିଷ୍ୟତ ପାଇଁ ସରକାରୀ ସହାୟତାକୁ ଚାହିଁ ରହିଛନ୍ତି। ନା ସେମାନଙ୍କୁ ମିଳୁଛି ବଦାନ୍ୟତା ନା ସରକାରୀ ବାବୁଙ୍କ ଅନୁକମ୍ପା। ମାଳମାଳ ସରକାରୀ ଯୋଜନା ଅଛି ସତ ହେଲେ ବୃନ୍ଦାବନଙ୍କ ପାଖରେ ସେ ସବୁ ଅପହଞ୍ଚ।
ମୂଲ ମଜୁରୀ ଲାଗି ପେଟ ପୋଷୁଥିବା ବୃନ୍ଦାବନଙ୍କ ଘରଡିହ ସମେତ ୪ ଡେସିମିଲର ଚାଷ ଜମି ଅଛି। ତାଙ୍କ ବଡ଼ ପୁଅ ଉମାକାନ୍ତ(୪୨) ଗତ ୨୦୧୫ ଜୁନ ମାସ ଶେଷ ରଜ ଦିନ ହୃଦ୍ଘାତରେ ପ୍ରାଣ ହରାଇଥିବା ବେଳେ ସାନ ପୁଅ ରମାକାନ୍ତ (୩୯) ଚଳିତ ବର୍ଷ ଜୁଲାଇ ମାସରେ କରୋନା ସମୟରେ ଛାତି ଯନ୍ତ୍ରଣାରେ ଆରପାରିକୁ ଚାଲିଗଲେ। ଉମାକାନ୍ତଙ୍କ ସ୍ତ୍ରୀ କାବେରୀ ପଲେଇଙ୍କର ୫ବର୍ଷର ଗୋଟିଏ ପୁଅ ଓ ୪ବର୍ଷର ଝିଅଟିଏ ଅଛି। ସାନ ପୁଅ ରମାକାନ୍ତଙ୍କ ସ୍ତ୍ରୀ କନକଲତାଙ୍କର ୩ ବର୍ଷ ଓ ୨ ବର୍ଷର ଦୁଇଟି ପୁଅ ଅଛନ୍ତି। ସେମାନଙ୍କୁ ଚଳାଇବା ପାଇଁ ବୃଦ୍ଧ ବୃନ୍ଦାବନ ଅସମର୍ଥ ଥିବା ବେଳେ ପରିବାର ବୋଝକୁ ଉଠାଇବା ଭଳି ମାନସିକ ଚାପ ଏବଂ ଦୁଃଖରେ ସେ ଏବେ ମ୍ରିୟମାଣ ହୋଇ ପଡ଼ିଛନ୍ତି। କେବଳ ବଡ଼ ପୁଅ ଉମାକାନ୍ତ ପାଇଥିବା ସରକାରୀ ଆବାସର ଦୁଇ ବଖରା ଘରେ ୮ ପ୍ରାଣୀ ରହୁଛନ୍ତି। ରାଶନ କାର୍ଡରେ ମାସକୁ ୨୦ କିଲୋ ଚାଉଳ ମିଳୁଛି। ସେତିକିରେ ମାସ ସାରା ଚଳି ହେଉନି। ବହୁ ସମୟରେ ସେମାନେ ଭୋକିଲା ବି ରହୁଛନ୍ତି।
ବୃଦ୍ଧ ବୃନ୍ଦାବନ କୁହନ୍ତି, ମୁଁ ଆଉ କେତେ ଦିନ ଏ ସଂସାରରେ ରହିବି। ମୁଁ ଚାଲିଗଲା ପରେ ମୋ ବୋହୂ, ନାତୁଣୀ, ନାତି କେମିତି ବଞ୍ଚିବେ, କେମିତି ଚଳିବେ ଏବଂ କିଏ ସେମାନଙ୍କୁ ସହାୟ ହେବ। ସରକାର ଏବଂ ପ୍ରଶାସନ ଯଦି ଦୟା କରନ୍ତେ ତେବେ ମୋ ପରିବାର ବଞ୍ଚିବାର ରାହା ପାଆନ୍ତେ। ତେବେ ଏହି ଅସହାୟ ପରିବାର ପ୍ରତି ପ୍ରଶାସନ ଦୃଷ୍ଟି ଦେଇ ସହାୟତା ଯୋଗାଇ ଦେବାକୁ ସ୍ଥାନୀୟ ଗ୍ରାମବାସୀ ଦାବି କରିଛନ୍ତି।
