ଅତାବିରା, ୧୭।୪(ଯୁଧିଷ୍ଠିର ମହାପାତ୍ର): ବରଗଡ ଜିଲା ଅତାବିରାକୁ ସ୍ବାସ୍ଥ୍ୟମନ୍ତ୍ରୀ ମୁକେଶ ମହାଲିଙ୍ଗ ପହଞ୍ଚି ଆଜି ପୂର୍ବାହ୍ନରେ ସ୍ଥାନୀୟ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ପରିଦର୍ଶନ ସହିତ ଆୟୁଷ୍ମାନ ଭାରତ ପ୍ରଧାନମନ୍ତ୍ରୀ ଜନ ଆରୋଗ୍ୟ ଯୋଜନା ଅନ୍ତର୍ଗତ ଗୋପବନ୍ଧୁ ଜନ ଆରୋଗ୍ୟ ଯୋଜନାରେ କାର୍ଡ ବଣ୍ଟନ କରିଥିଲେ। ଅତାବିରା ନିବାସୀ ମୀନା ସାହୁ ଏବଂ ଶ୍ରୀକାନ୍ତ ମହାରଣାଙ୍କୁ ସେ ସ୍ବାସ୍ଥ୍ୟକାର୍ଡ ବଣ୍ଟନ କରିଥିଲେ ।
ସେହିପରି ଚନ୍ଦ୍ରକାନ୍ତି ସାହୁ, ରଏବାରୀ ବିଶ୍ୱାଳ ଓ ଶ୍ରୀଧର ସାହୁଙ୍କୁ ଅତାବିରା ବିଧାୟକ ନିହାର ରଞ୍ଜନ ମହାନନ୍ଦ କାର୍ଡ ପ୍ରଦାନ କରି ଅତାବିରାରେ ଏକକ ସ୍ବାସ୍ଥ୍ୟ କାର୍ଡ ବଣ୍ଟନର ଶୁଭାରମ୍ଭ କରିଥିଲେ । ତେବେ ସ୍ବାସ୍ଥ୍ୟ କାର୍ଡ ଘର ଦ୍ୱାରରେ ପାଇଥିବା ହିତାଧିକାରୀ ରୀନା ସାହୁଙ୍କ ଅନୁରୋଧ କ୍ରମେ ସ୍ବାସ୍ଥ୍ୟ ମନ୍ତ୍ରୀ ତାଙ୍କ ଘରେ ଚା’ ପିଇଥିଲେ । ଏହି ଅବସରରେ ଅତାବିରା ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରର ୨୦ଜଣ ଡାକ୍ତର ପଦବୀ ସ୍ଥାନରେ ୬ ଜଣ କାର୍ଯ୍ୟରତ ଥିବାରୁ ଖାଲି ଥିବା ଭେଷଜ, ଶିଶୁ ରୋଗ ସ୍ତ୍ରୀ ଓ ପ୍ରସୂତି ବିଶେଷଜ୍ଞ ପଦବୀ ପୂରଣ ସହ ବହୁ ବିଧ ଅସୁବିଧା ଦୂର କରିବାକୁ ଅଞ୍ଚଳବାସୀ ଏକ ସ୍ମାରକ ପତ୍ର ସ୍ବାସ୍ଥ୍ୟମନ୍ତ୍ରୀଙ୍କୁ ପ୍ରଦାନ କରିଥିଲେ । ଏହି ଅବସରରେ ବରଗଡ଼ ଜିଲା ମୁଖ୍ୟ ଚିକିତ୍ସା ଅଧିକାରୀ ଡା. ପ୍ରଶାନ୍ତ କିଶୋର ଦାଶ, ଅତାବିରା ମୁଖ୍ୟ ଡା. ରବି ନାରାୟଣ ମିଶ୍ର, ବରଗ ଡାକ୍ତରଖାନାର ମୁଖ୍ୟ ଡା. ସୁବାଷ ଅଗ୍ରୱାଲ, ଅତାବିରା ତହସିଲଦାର କେ. ରିଚୀ କୁମାର ପ୍ରମୁଖ ଉପସ୍ଥିତ ଥିଲେ ।
